TVS Ntorq 125 Price And Features: దేశీయ ద్విచక్ర వాహన తయారీ సంస్థ టీవీఎస్ మోటార్ కంపెనీ, తన పాపులర్‌ స్పోర్టీ స్కూటర్ ఎన్‌టార్క్ 125కు కొత్త కలర్స్ & గ్రాఫిక్స్‌ను పరిచయం చేసింది. ఎన్‌టార్క్ 125లో అత్యంత అందుబాటు ధరలో లభించే డిస్క్ & రేస్ ఎడిషన్ వేరియంట్లకు ఈ కొత్త రంగులను అందించింది. కొత్త కలర్స్‌తో పాటు బ్లూటూత్ కనెక్టివిటీ కలిగిన నెగెటివ్ LCD ఇన్‌స్ట్రుమెంట్ క్లస్టర్‌ను కూడా అందించడం విశేషం. కొత్త ఫీచర్లతో స్కూటర్ మరింత స్టైలిష్‌గా కనిపించడంతో పాటు టెక్నాలజీ పరంగానూ మరింత మెరుగైంది.

టీవీఎస్ ఎన్‌టార్క్ 125 డిస్క్ వేరియంట్ ఎక్స్ షోరూమ్ ధరను రూ.82,500గా నిర్ణయించగా, రేస్ ఎడిషన్ ధర రూ.87,950గా ఉంది. కొత్త రంగులను మాత్రమే అందుబాటులోకి తీసుకొచ్చిన కంపెనీ, ఇంజిన్ & ఇతర మెకానికల్ అంశాల్లో ఎలాంటి మార్పులు చేయలేదు.

డిస్క్ వేరియంట్ ఇప్పుడు బ్లాక్, వైట్ & గ్రే రంగుల్లో లభిస్తోంది. వీటిపై యెల్లో & ఆరెంజ్ గ్రాఫిక్స్‌ను జోడించి మరింత ఆకర్షణీయమైన లుక్ ఇచ్చారు. మరోవైపు... రేస్ ఎడిషన్ బ్లూ, రెడ్ & గ్రీన్ రంగుల్లో అందుబాటులోకి వచ్చింది. వీటికి స్పోర్టీ స్టైల్ గ్రాఫిక్స్‌ను అందించి యువతను ఆకట్టుకునేలా డిజైన్ చేశారు.

ఇది కూడా చదవండి: హీరో ప్యాషన్ ప్లస్‌లో ఫ్రంట్ డిస్క్ బ్రేక్‌, బ్లూటూత్ డిస్‌ప్లే కూడా - కొత్త వేరియంట్‌లో అదిరే ఫీచర్లు

ఈ రెండు వేరియంట్లలోనూ బ్లూటూత్ కనెక్టివిటీతో కూడిన కొత్త నెగెటివ్ LCD డిస్‌ప్లేను TVS అందించింది. కంపెనీ సొంత మొబైల్ యాప్ ద్వారా స్కూటర్‌ను స్మార్ట్‌ఫోన్‌తో కనెక్ట్ చేసుకోవచ్చు. దీంతో కాల్ అలర్ట్స్, నావిగేషన్ & ఇతర ఉపయోగకరమైన సమాచారం డిస్‌ప్లేపై చూడొచ్చు.

ఇంజిన్‌లో ఎలాంటి మార్పులు చేయలేదు. గతంలో ఉన్న అదే 124.8cc సింగిల్ సిలిండర్ ఇంజిన్‌తో స్కూటర్ కొనసాగుతోంది. మంచి పనితీరు & స్పోర్టీ రైడింగ్ అనుభవం కారణంగా ఎన్‌టార్క్ 125 యువతలో మంచి ఆదరణ పొందుతోంది.

తెలుగు రాష్ట్రాల్లో ఈ స్కూటర్ ఆన్‌రోడ్ ధరలు: CNG ఆటోమేటిక్ కారు కొనాలని చూస్తున్నారా ? ఈ లిస్ట్ చూసి డిసైడ్ అవ్వండి

హైదరాబాద్‌లో డిస్క్ వేరియంట్ ఎక్స్ షోరూమ్ ధర రూ.82,500 కాగా, RTO ఛార్జీలు రూ.11,400 & సమగ్ర బీమా రూ.6,181, ఇతర ఖర్చులు కలిపి ఆన్‌రోడ్ ధర సుమారు రూ.1,02,000 అవుతుంది.

విజయవాడలో ఇదే డిస్క్ వేరియంట్‌ ఎక్స్ షోరూమ్ ధర రూ.82,500. RTO ఛార్జీలు రూ.11,400, 10 శాతం సెస్ రూ.1,140, సమగ్ర బీమా రూ.6,151, ఇతర ఖర్చులు కలిపి ఆన్‌రోడ్ ధర సుమారు రూ.1,03,000 అవుతుంది.

ఇది కూడా చదవండి: 

రేస్ ఎడిషన్ (TVS Ntorq 125 Race Edition‌) విషయానికి వస్తే... హైదరాబాద్‌లో ఎక్స్ షోరూమ్ ధర రూ.87,950. ఆర్టీఓ ఛార్జీలు రూ.12,054 & సమగ్ర బీమా రూ.6,285, ఇతర ఖర్చులు కలిపి ఆన్‌రోడ్ ధర సుమారు రూ.1,08,000 అవుతుంది.

విజయవాడలో రేస్ ఎడిషన్ ఎక్స్ షోరూమ్ ధర రూ.87,950. ఆర్టీఓ ఛార్జీలు రూ.12,054, 10 శాతం సెస్ రూ.1,205, సమగ్ర బీమా రూ.6,253, ఇతర ఖర్చులు కలిపి ఆన్‌రోడ్ ధర సుమారు రూ.1,09,000 అవుతుంది.

కొత్త రంగులు, ఆకర్షణీయమైన గ్రాఫిక్స్, బ్లూటూత్ కనెక్టివిటీతో కూడిన డిజిటల్ డిస్‌ప్లే వంటి మార్పులతో టీవీఎస్ ఎన్‌టార్క్ 125 ఇప్పుడు మరింత స్టైలిష్‌గా మారింది. కొత్త స్కూటర్ కొనుగోలు చేయాలనుకునే వారికి ఈ వేరియంట్లు మంచి ఎంపికగా నిలిచే అవకాశముంది.

ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.