Royal Enfield Himalayan 750 Details: రాయల్ ఎన్‌ఫీల్డ్, తన కొత్త హిమాలయన్ 750 అడ్వెంచర్ టూరర్‌ను అధికారికంగా పరిచయం చేసింది. కంపెనీ అందిస్తున్న అతి పెద్ద ఇంజిన్ ఉన్న అడ్వెంచర్ టూరర్‌ ఇది. ఇప్పటికే 750cc విభాగంలో మరో కేఫ్ రేసర్ మోడల్ ఉన్నప్పటికీ, హిమాలయన్ 750 కి ప్రత్యేకతలు చాలా ఉన్నాయి. ఈ బైక్‌లో ఇంజిన్ నుంచి టెక్నాలజీ, సస్పెన్షన్ వరకు చాలా మార్పులు ఉన్నాయి. భారత్‌లో ఎప్పుడు విడుదలవుతుంది? ఇందులో ఎలాంటి ఫీచర్లు ఉన్నాయి? తెలుసుకోవాల్సిన 10 ముఖ్యమైన విషయాలు ఇవే.
1. 743cc ఇంజిన్.. ఎంత పవర్ వస్తుంది?
రాయల్ ఎన్‌ఫీల్డ్ హిమాలయన్ 750లో 743cc ఎయిర్ & ఆయిల్ కూల్డ్ ప్యారలల్ ట్విన్ ఇంజిన్‌ను అందించింది. ఈ ఇంజిన్ 7,000rpm వద్ద 55hp పవర్‌ను, 5,000rpm వద్ద 63Nm టార్క్‌ను ఉత్పత్తి చేస్తుంది. ఇందులోని మొత్తం టార్క్‌లో 90 శాతం, అంటే సుమారు 57Nm టార్క్‌ 3,500rpm నుంచే అందుబాటులో ఉంటుందని కంపెనీ చెబుతోంది. ఈ బైక్ ఐడిల్ వేగం 1,300rpmగా ఉంది.
2. బైక్ బరువు ఎంత?
యూరప్ & యూకే మార్కెట్లలో హిమాలయన్ 750 కెర్బ్ వెయిట్ 223 కిలోలు. భారత్‌లో మాత్రం ఇది 224 కిలోలకు చేరుతుంది. అదనంగా ఉండే కిలో బరువులో ఎక్కువ భాగం చట్టపరంగా తప్పనిసరి అయిన శారీ గార్డ్ వల్ల వచ్చి ఉంటుందని అంచనా.
3. TFT డిస్‌ప్లేలో ప్రత్యేకత ఏమిటి?
చూడటానికి హిమాలయన్ 750 TFT డిస్‌ప్లే, హిమాలయన్ 450లో ఉన్న డిస్‌ప్లే మాదిరిగానే కనిపిస్తుంది. అయితే ఇందులో మరిన్ని ఫీచర్లు ఉన్నాయి. బిల్ట్-ఇన్ SIM, వైఫై & బ్లూటూత్‌ కనెక్టివిటీ అందించారు. హిమాలయన్ 450లో ఉన్న కనెక్టివిటీ ఫీచర్లతో పాటు, ఇందులోని ఆన్‌బోర్డ్ మాడ్యూల్ వల్ల కనెక్టివిటీ మరింత సులభంగా ఉండే అవకాశం ఉంది.
ఇది కూడా చదవండి: Skoda Slavia vs Honda City: కంపెనీ ప్రకటించిన మైలేజ్‌ ఈ కార్లు నిజంగా ఇస్తున్నాయా? ఒరిజినల్‌ కెపాసిటీ ఎంత?
4. 6-యాక్సిస్ IMUతో అదనపు టెక్నాలజీ
హిమాలయన్ 750లో 6-యాక్సిస్ IMU అందించడం ప్రత్యేక ఆకర్షణ. రాయల్ ఎన్‌ఫీల్డ్ నుంచి ఈ టెక్నాలజీ పొందిన తొలి మోటార్‌సైకిల్ ఇదే. దీని ద్వారా కార్నరింగ్ ABS, లీన్ సెన్సిటివ్ ట్రాక్షన్ కంట్రోల్, ఐదు రైడింగ్ మోడ్‌లు అందుబాటులో ఉంటాయి.
రోడ్, రోడ్ స్పోర్ట్, రైన్, ట్రైల్ & కస్టమ్ అనే ఐదు రైడింగ్ మోడ్‌లు ఉన్నాయి. వీటితో పాటు క్రూయిజ్ కంట్రోల్, ఇమ్మొబిలైజర్ & టైర్ ప్రెజర్ మానిటరింగ్ సిస్టమ్ (TPMS) కూడా ఉన్నాయి. ఈ ఫీచర్లన్నీ స్టాండర్డ్‌గా వస్తాయి. ఇప్పటివరకు వచ్చిన రాయల్ ఎన్‌ఫీల్డ్ బైక్స్‌లో అత్యంత అధునాతన మోడల్‌గా హిమాలయన్ 750 నిలుస్తుందని చెప్పవచ్చు.
5. మూడు వేరియంట్లు.. రంగుల్లో తేడా
హిమాలయన్ 750 మొత్తం మూడు వేరియంట్లలో లభిస్తుంది. ప్రధానంగా రంగులు, వీల్స్ & టూరింగ్ యాక్సెసరీల ఆధారంగా వీటి మధ్య తేడా ఉంటుంది.
బేస్ వేరియంట్లలో అజ్‌టెక్ గ్రీన్, టెక్టోనిక్ బ్లాక్ రంగులు ఉన్నాయి. వీటికి అల్లాయ్ వీల్స్ వస్తాయి. సైబీరియా వైట్, వైకింగ్ బ్రాంజ్ వేరియంట్లలో క్రాస్-స్పోక్ వీల్స్ అందిస్తారు. అన్నింటికంటే పైన ఉండే అంటార్కిటిక్ సిల్వర్ వేరియంట్‌లో టూరింగ్‌కు ఉపయోగపడే యాక్సెసరీలు స్టాండర్డ్‌గా లభిస్తాయి. యూకేలో బేస్ & టాప్ వేరియంట్ల మధ్య ధర వ్యత్యాసం సుమారు GBP 1,700 (రూ.2.15 లక్షలు)గా ఉంది.
6. బ్రేకింగ్ సిస్టమ్ ఎలా ఉంది?
ముందు భాగంలో రెండు డిస్క్ బ్రేకులు ఉన్నాయి. ఒక్కో డిస్క్ వ్యాసం 280mm. వీటికి రెండు పిస్టన్ కాలిపర్లు అమర్చారు. వెనుక భాగంలో 255mm డిస్క్‌తో రెండు పిస్టన్ కాలిపర్ ఉంది. ఆసక్తికరమైన విషయం ఏమిటంటే, హిమాలయన్ 450లో వెనుక 270mm డిస్క్ ఉంటుంది. అయితే అందులో సింగిల్ పిస్టన్ కాలిపర్ మాత్రమే ఉంది. హిమాలయన్ 750లో డ్యూయల్ ఛానల్ ABS, కార్నరింగ్ సెన్సిటివ్ ABS స్టాండర్డ్‌గా వస్తాయి. వెనుక ABSను స్విచ్ ఆఫ్ చేసుకునే సదుపాయం కూడా ఉంది.
ఇది కూడా చదవండి: Renault Duster, Kiger, Triber, Kwid కార్లపై రూ.2.10 లక్షల వరకు డిస్కౌంట్లు.. ఏ మోడల్‌పై ఎంత తగ్గిందంటే?
7. సస్పెన్షన్ & టైర్లలో మార్పులు
ఆఫ్‌రోడింగ్‌ను ఎక్కువగా ఇష్టపడేవారికి ఈ విషయంలో కొంత నిరాశ కలగవచ్చు. ఇప్పటివరకు వచ్చిన ఇతర హిమాలయన్ మోడళ్లతో పోలిస్తే, హిమాలయన్ 750లో ముందు 19-అంగుళాల వీల్ ఇచ్చారు. వెనుక 17-అంగుళాల వీల్ కొనసాగుతుంది.
రాయల్ ఎన్‌ఫీల్డ్ తొలిసారిగా ఈ మోడల్‌లో అల్లాయ్ వీల్స్ & స్పోక్ వీల్స్‌లో ఒకదానిని ఎంచుకునే ఆప్షన్‌ అందిస్తోంది. రెండు రకాల వీల్స్‌లోనూ ట్యూబ్‌లెస్ టైర్లు స్టాండర్డ్‌గా ఉంటాయి.
సస్పెన్షన్ విషయానికి వస్తే, ముందు 43mm USD ఫోర్క్‌ను అందించారు. ఇది పూర్తిగా అడ్జస్టబుల్‌గా ఉంటుంది. వెనుక Showa లింకేజ్ మోనోషాక్‌ను ఉపయోగించారు. ఇందులో కంప్రెషన్ & రీబౌండ్ డ్యాంపింగ్‌ను అడ్జస్ట్ చేసుకోవచ్చు. ముందు సస్పెన్షన్ ట్రావెల్ 190mm, వెనుక 175mmగా ఉంది. హిమాలయన్ 450లో రెండు వైపులా 200mm ట్రావెల్ ఉంటుంది.
8. సీట్ హైట్ & గ్రౌండ్ క్లియరెన్స్
హిమాలయన్ 750లో సీట్ హైట్ 815mmగా ఉంది. హిమాలయన్ 450లో ఇది 825mm. 450లో సీటును అడ్జస్ట్ చేసి 845mm వరకు పెంచుకోవచ్చు. కానీ 750లో స్టాండర్డ్ సీటుకు అడ్జస్టబిలిటీ లేదు. అయితే సీట్ హైట్‌ను పెంచడానికి లేదా తగ్గించడానికి యాక్సెసరీ సీట్లు అందుబాటులో ఉంటాయి. హిమాలయన్ 450లో కూడా యాక్సెసరీ సీట్‌తో హైట్‌ను 805mmకు తగ్గించుకోవచ్చు.
హిమాలయన్ 750 గ్రౌండ్ క్లియరెన్స్ 205mm. హిమాలయన్ 450లో ఇది 230mm.
9. ఫ్యూయల్ ట్యాంక్ సామర్థ్యం
హిమాలయన్ 750లో 17.8 లీటర్ల ఫ్యూయల్ ట్యాంక్ అందించారు. హిమాలయన్ 450లోని 17 లీటర్ల ట్యాంక్‌తో పోలిస్తే ఇది సుమారు 800ml ఎక్కువ.
10. భారత్‌లో ఎప్పుడు విడుదలవుతుంది?
హిమాలయన్ 750 భారత్‌లో విడుదలయ్యే తేదీని రాయల్ ఎన్‌ఫీల్డ్ ఇంకా అధికారికంగా ప్రకటించలేదు. 2026 నవంబర్ 27 నుంచి 29 వరకు గోవాలోని వాగటర్‌లో జరగనున్న Motoverse 2026 ఈవెంట్‌లో ఈ బైక్‌ను భారత మార్కెట్‌లో లాంచ్‌ చేసే అవకాశం ఉందని అంచనా. అదే జరిగితే, ఆ సమయంలో ధరల వివరాలు కూడా వెల్లడయ్యే అవకాశం ఉంది.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.