Royal Enfield Classic 650 Hypershift Edition: పాపులర్‌ టూవీలర్ కంపెనీ Royal Enfield మరోసారి తన బ్రాండ్ క్రేజ్‌ను నిరూపించింది. కంపెనీ 125వ వార్షికోత్సవాన్ని పురస్కరించుకుని లాంచ్‌ చేసిన Classic 650 Hypershift స్పెషల్ ఎడిషన్‌కు భారీ స్పందన లభించింది. భారత్ కోసం మొత్తం 125 యూనిట్లను కేటాయించగా.. అమ్మకాలు ప్రారంభమైన కేవలం 6 నిమిషాల్లోనే అన్నీ పూర్తిగా అమ్ముడయ్యాయి. ఈ ప్రత్యేక ఎడిషన్ ధర రూ.4.26 లక్షలు.
రాయల్ ఎన్ఫీల్డ్ క్లాసిక్‌ 650 హైపర్‌షిఫ్ట్‌ ఎడిషన్ కొనేవాళ్ల కోసం అక్టోబర్ 16 నుంచి అక్టోబర్ 28 వరకు రిజిస్ట్రేషన్లు స్వీకరించారు. పరిమిత సంఖ్యలో మాత్రమే అందుబాటులో ఉంచిన ఈ మోడల్‌కు వచ్చిన స్పందనతో రాయల్ ఎన్ఫీల్డ్ ప్రత్యేక ఎడిషన్లపై ఉన్న ఆసక్తి మరోసారి వెల్లడైంది.
Classic 650 Hypershift ప్రత్యేకతలు ఏమిటి?
Classic 650 Hypershift ఎడిషన్‌లో సాధారణ Classic 650తో పోలిస్తే ప్రధానంగా కాస్మెటిక్ మార్పులు చేశారు. మెకానికల్ అంశాలన్నీ ప్రొడక్షన్ వెర్షన్ Classic 650 మాదిరిగానే ఉంటాయి. అయితే దీని ప్రత్యేకమైన రంగుల కలయిక బైక్‌కు కొత్త రూపాన్ని ఇస్తుంది.
ఈ బైక్‌పై కాంతి పడే కోణాన్ని బట్టి ఎరుపు, ఆకుపచ్చ, బంగారు రంగుల షేడ్స్ మారుతూ కనిపిస్తాయి. ఈ ప్రత్యేక పెయింట్ స్కీమ్ దీనికి ప్రధాన ఆకర్షణగా నిలుస్తుంది. పెట్రోల్ ట్యాంక్, సైడ్ బాక్స్‌లపై ‘125 years’ ప్రత్యేక క్రెస్ట్‌లను ఏర్పాటు చేశారు. చేతితో వేసిన పిన్‌స్ట్రైప్స్ కూడా ఉన్నాయి.
ఇది కూడా చదవండి: కోటికి పైగా ధర తగ్గిన జేమ్స్ బాండ్ లగ్జరీ కార్లు.. కొత్త ధరలు చూశారా
ఇంజిన్, పనితీరు వివరాలు
Classic 650 Hypershift ఎడిషన్‌లో 648cc ఎయిర్/ఆయిల్ కూల్డ్ పారలల్-ట్విన్ ఇంజిన్ ఉంటుంది. ఇది 47hp పవర్, 52.3Nm టార్క్ ఉత్పత్తి చేస్తుంది. ఇదే ఇంజిన్‌ను Interceptor 650లో కూడా ఉపయోగిస్తున్నారు.
ఈ బైక్ ఛాసిస్‌ను Super Meteor 650 నుంచి తీసుకున్నారు. అయితే సస్పెన్షన్ విషయంలో రెండు మోడళ్ల మధ్య తేడా ఉంది. Super Meteor 650లో USD ఫోర్క్ ఉండగా, Classic 650లో సంప్రదాయ రైట్-సైడ్-అప్ ఫోర్క్‌ను ఉపయోగించారు.
ధరలో ఎంత తేడా?
Classic 650 Hypershift స్పెషల్ ఎడిషన్ ధర రూ.4.26 లక్షలు. సాధారణ Classic 650 వేరియంట్లతో పోలిస్తే దీని ధర ఎక్కువగా ఉంది.
- Vallam Red బేస్ వేరియంట్ ధర రూ.3.68 లక్షలు.- Black Chrome టాప్-స్పెక్ వేరియంట్ ధర రూ.3.82 లక్షలు.- Hypershift స్పెషల్ ఎడిషన్ ధర రూ.4.26 లక్షలు.
అంటే Vallam Red వేరియంట్‌తో పోలిస్తే Hypershift ధర సుమారు రూ.58,000 ఎక్కువ. Black Chrome వేరియంట్‌తో పోలిస్తే దాదాపు రూ.43,500 అధికం.
ఇది కూడా చదవండి: ఎలక్ట్రిక్‌ కార్లపై కళ్లు చెదిరే ఆఫర్లు.. రూ.3.35 లక్షల వరకు తగ్గింపు! ఏ కారు కొంటే ఎక్కువ లాభమో తెలుసా?
నవంబర్‌లో డెలివరీలు
భారత్ కోసం కేటాయించిన మొత్తం 125 యూనిట్లు ఇప్పటికే అమ్ముడయ్యాయి. ఈ బైక్‌ల డెలివరీలను నవంబర్‌లో ప్రారంభించనున్నట్లు సమాచారం. పరిమిత సంఖ్యలో మాత్రమే అందుబాటులో ఉండటం, ప్రత్యేకమైన రంగుల డిజైన్, 125వ వార్షికోత్సవ గుర్తులు ఈ మోడల్‌కు ప్రత్యేకతను తీసుకొచ్చాయి.
గమనిక: అన్ని ధరలు ఎక్స్-షోరూమ్ ధరలు.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.