ల్యాండ్ రోవర్ మనదేశంలో కొత్త రేంజ్ రోవర్ స్పోర్ట్ ఎస్‌యూవీని లాంచ్ చేయనుంది. ఇది ఫ్లాగ్ షిప్ రేంజ్ రోవర్ ఆప్షన్ కంటే చవకైన ఆప్షన్‌గా రానుంది. కానీ దీని డిజైన్ స్పోర్టీగా ఉండనుంది. అందుకే దీనికి స్పోర్ట్ అనే పేరు పెట్టారు. దీని డిజైన్ గతంలో వచ్చిన రేంజ్ రోవర్ స్పోర్ట్ తరహాలోనే ఉండనుంది. కానీ సన్నని హెడ్ ల్యాంప్స్, ఫ్లష్ డోర్ హ్యాండిల్స్ వంటివి ఇందులో కొత్తగా ఉండనున్నాయి.
ఇది ఒక పెద్ద లగ్జరీ ఎస్‌యూవీ. కానీ దీని లుక్ కొంచెం డిఫరెంట్‌గా ఉండనుంది. ఈ కొత్త రేంజ్ రోవర్ స్పోర్ట్‌లో ఎయిర్ సస్పెన్షన్‌తో పాటు 48 వోల్ట్ ఎలక్ట్రానిక్ యాక్టివ్ రోల్ కంట్రోల్ సిస్టం అందించనున్నారు. ఆల్ వీల్ స్టీరింగ్ ద్వారా టర్నింగ్ సైకిల్ తగ్గనుంది. ఎయిట్ స్పీడ్ జెడ్ఎఫ్ ఆటోమేటిక్ ట్రాన్స్‌మిషన్, ఇంటెలిజెంట్ ఆల్ వీల్ డ్రైవ్ స్టాండర్డ్‌గా ఉన్నాయి.
ఈ కారులో సాఫ్ట్ క్లోజ్ డోర్స్‌ను అందించారు. 22 వే అడ్జస్టబుల్, హీటెడ్, వెంటిలేటెడ్ ఎలక్ట్రిక్ మెమరీ ఫ్రంట్ సీట్లు, క్యాబిన్ ఎయిర్ ప్యూరిఫికేషన్, 29 స్పీకర్లున్న మెరీడియన్ ఆడియో సిస్టం, ఫ్లోటింగ్ 13.1 ఇంచ్ కర్వ్‌డ్ టచ్ స్క్రీన్, 13.7 అంగుళాల డ్రైవర్ డిస్‌ప్లే, అలెక్సా ఫంక్షన్ ఉన్న పివి ప్రో ఇన్‌ఫోటెయిన్‌మెంట్ సిస్టం, కనెక్టెడ్ కార్ టెక్, 3డీ సరౌండ్ కెమెరా, ముందువైపు, వెనకవైపు పార్కింగ్ సెన్సార్లు కూడా ఇందులో ఉన్నాయి.
దీని వీల్ బేస్ కూడా పెరిగింది. కాబట్టి కారు వెనకవైపు స్పేస్ పెరగనుంది. ఈ కొత్త రేంజ్ రోవర్ స్పోర్ట్ మనదేశంలో 2023లో లాంచ్ అయ్యే అవకాశం ఉంది. ప్రస్తుతానికి ఈ కొత్త రేంజ్ రోవర్‌లో డీజిల్, పెట్రోల్ ఇంజిన్లు ఉండనున్నాయి.