Affordable Off-road SUVs 2026: వరద నీటిని చీల్చుకుంటూ ప్రయాణించాలన్నా, బురద రోడ్లపై బర్రున దూసుకెళ్లాలన్నా, రాళ్లు నిండిన కొండ దారుల్లో ఆగకుండా సాగాలన్నా.. సాధారణ కార్లతో ఇదేదీ సాధ్యం కాదు. అలాంటి పరిస్థితుల కోసం మంచి ఆఫ్‌రోడ్ సామర్థ్యం ఉన్న ఎస్‌యూవీలు అవసరం. అయితే, ఆఫ్రోడింగ్ కోసం భారీగా ఖర్చు పెట్టాల్సిన అవసరం లేదు. మన మార్కెట్‌లో, అందుబాటు ధరల్లో మంచి ఆఫ్‌రోడ్ సామర్థ్యం ఉన్న కొన్ని ఎస్‌యూవీలు ఉన్నాయి. మహీంద్రా, మారుతి సుజుకి, ఫోర్స్ సంస్థలు అందిస్తున్న ఈ కార్లలో 4WD వ్యవస్థ, బలమైన నిర్మాణం, ప్రత్యేక గేరింగ్ వంటి సదుపాయాలు ఉన్నాయి. రోజువారీ ప్రయాణాలకు కూడా వీటిని ఉపయోగించుకోవచ్చు.
1. Maruti Suzuki Jimny
ధర: రూ.12.59 లక్షల నుంచి రూ.14.52 లక్షలు
భారత్‌లో ప్రస్తుతం కొనుగోలు చేయగల అత్యంత చవకైన ఆఫ్‌రోడ్ ఎస్‌యూవీ మారుతి సుజుకి జిమ్నీ. ఈ జాబితాలో మొదటి స్థానంలో నిలిచిన ఈ కారు చిన్న పరిమాణంలో ఉన్నప్పటికీ, ఆఫ్‌రోడింగ్‌లో మంచి సామర్థ్యం చూపిస్తుంది. దీని 4WD వ్యవస్థ, బలమైన సస్పెన్షన్, తక్కువ బరువు, ఇరుకైన చక్రాల అమరిక కఠినమైన రోడ్లపై ప్రయాణాన్ని సులభతరం చేస్తాయి.
ఈ ఎస్‌యూవీలో 210 మి.మీ. గ్రౌండ్ క్లియరెన్స్ ఉంటుంది. సుమారు 310 మి.మీ. లోతు వరకు నీటిలో ప్రయాణించగలదని అంచనా. ఇందులో 1.5-లీటర్ పెట్రోల్ ఇంజిన్ ఉంటుంది. ఇది 105hp పవర్, 134Nm టార్క్ ఉత్పత్తి చేస్తుంది. 5-స్పీడ్ మాన్యువల్, 4-స్పీడ్ ఆటోమేటిక్ గేర్‌బాక్స్ ఎంపికలు ఉన్నాయి.
2. Mahindra Thar OG
ధర: రూ.15.59 లక్షల నుంచి రూ.18.99 లక్షలు
మహీంద్రా థార్ ఓజీని కొత్త జనరేషన్ 4 ఛాసిస్‌ ఆధారంగా రూపొందించారు. ఎంజీ-గ్లైడ్ పేరుతో పిలిచే ఈ ఛాసిస్‌ను థార్ రాక్స్‌లో కూడా ఉపయోగించారు. పటిష్టమైన ఈ నిర్మాణానికి వెనుక భాగంలో వాట్స్ లింకేజీతో కూడిన కొత్త పెంటాలింక్ సస్పెన్షన్‌ను జత చేశారు. దీనివల్ల ప్రయాణంలో స్థిరత్వం పెరుగుతుంది.
ఈ కారు 650 మి.మీ. లోతు వరకు నీటిలో ప్రయాణించగలదు. ఇందులో డావిన్సీ డ్యాంపర్లు, ఫ్రీక్వెన్సీ ఆధారిత డ్యాంపర్లు ఉన్నాయి. భూభాగానికి అనుగుణంగా డ్రైవింగ్ మోడ్‌లను మార్చుకునే స్విచ్‌లు, ఎలక్ట్రానిక్ లాకింగ్ డిఫరెన్షియల్ కూడా అందించారు.
LXT, ZXT వేరియంట్లలో 4WD వ్యవస్థ లభిస్తుంది. 2-లీటర్ టర్బో పెట్రోల్ ఇంజిన్ 152hp పవర్, 330Nm టార్క్ ఇస్తుంది. 2.2-లీటర్ డీజిల్ ఇంజిన్ 162hp పవర్, 330Nm టార్క్ ఉత్పత్తి చేస్తుంది. రెండు ఇంజిన్లకు 6-స్పీడ్ మాన్యువల్, ఆటోమేటిక్ గేర్‌బాక్స్ ఎంపికలు ఉన్నాయి.
ఇది కూడా చదవండి: పెట్రోల్ పవర్‌తో CNG మైలేజీ! Mahindra XUV 3XO CNGలో ఇన్ని ప్రత్యేకతలా? బుక్ చేసే ముందు ఈ విషయాలు తెలుసుకోండి!
3. Force Gurkha 3 Door
ధర: రూ.16.52 లక్షలు
ఫోర్స్ గుర్ఖా 3 డోర్ ఒక కాంపాక్ట్ ఎస్‌యూవీ. దీని పొడవు 4 మీటర్లలోపే ఉంటుంది. పెద్ద 5 డోర్ మోడల్‌లో ఉన్న ఆఫ్‌రోడ్ సదుపాయాలే ఇందులోనూ ఉన్నాయి. అయితే, చిన్న వీల్‌బేస్, తక్కువ పొడవు కారణంగా అప్రోచ్, డిపార్చర్ కోణాల్లో తేడాలు ఉంటాయి.
ఈ కారులో స్నార్కెల్ అందించారు. దీంతో 700 మి.మీ. లోతు వరకు నీటిలో ప్రయాణించగలదు. 233 మి.మీ. గ్రౌండ్ క్లియరెన్స్ ఉంటుంది. 35 డిగ్రీల వాలుతో ఉన్న కొండ మార్గాలను కూడా ఎక్కగలదు. ఇందులో 140hp పవర్ అందించే డీజిల్ ఇంజిన్ ఉంటుంది. కఠినమైన రోడ్లపై ప్రయాణించాలనుకునేవారికి ఇది మంచి ఎంపిక.
4. Force Gurkha 5 Door
ధర: రూ.17.83 లక్షలు
ఫోర్స్ గుర్ఖా 5 డోర్ ఈ జాబితాలో మరో ప్రత్యేకమైన ఆఫ్‌రోడ్ వాహనం. మహీంద్రా, మారుతి ఎస్‌యూవీలతో పోలిస్తే ఇది కొంత పాతకాలపు నిర్మాణ శైలిని కలిగి ఉంటుంది. ఇందులో ఆధునిక హంగుల కంటే ఆఫ్రోడింగ్ సామర్థ్యానికే ఎక్కువ ప్రాధాన్యం ఇచ్చారు.
దీని ప్రత్యేకత రెండు యాక్సిళ్లకు లాకింగ్ డిఫరెన్షియల్స్ ఉండటం. బురద, ఇసుక, రాళ్లతో కూడిన మార్గాల్లో చక్రాలకు మెరుగైన పట్టును అందించేందుకు ఇవి ఉపయోగపడతాయి. ఇందులో మెర్సిడెస్ నుంచి తీసుకున్న 2.6-లీటర్ డీజిల్ ఇంజిన్ ఉంటుంది. ఇది 140hp పవర్, 320Nm టార్క్ ఉత్పత్తి చేస్తుంది. 5-స్పీడ్ మాన్యువల్ గేర్‌బాక్స్ మాత్రమే అందుబాటులో ఉంది. ఆటోమేటిక్ ఎంపిక లేదు.
ఇది కూడా చదవండి: Volkswagen Virtus Facelift టీజర్ లాంచ్‌.. LED లైట్లు, బ్లాక్ అల్లాయ్ వీల్స్‌తో అదిరిపోయే డిజైన్!
5. Mahindra Scorpio N
ధర: రూ.18.02 లక్షల నుంచి రూ.25.49 లక్షలు
ఈ జాబితాలో అత్యధిక ధర కలిగిన మోడల్ మహీంద్రా స్కార్పియో ఎన్. ఇందులో Z4 వేరియంట్ నుంచి 4WD వ్యవస్థ అందుబాటులో ఉంటుంది. అయితే, ఈ సదుపాయం 2.2-లీటర్ డీజిల్ ఇంజిన్‌తో మాత్రమే లభిస్తుంది.
ఈ ఇంజిన్ 6-స్పీడ్ మాన్యువల్ గేర్‌బాక్స్‌తో కలిపి 175hp పవర్, 370Nm టార్క్ ఇస్తుంది. 6-స్పీడ్ ఆటోమేటిక్ గేర్‌బాక్స్‌తో అయితే 400Nm టార్క్ అందిస్తుంది. భూభాగాన్ని బట్టి డ్రైవింగ్‌ను మార్చుకునేందుకు ప్రత్యేక టెర్రైన్ మోడ్‌లు కూడా ఉన్నాయి.
ఈ ఎస్‌యూవీలో 187 మి.మీ. గ్రౌండ్ క్లియరెన్స్ ఉంటుంది. 500 మి.మీ. లోతు వరకు నీటిలో ప్రయాణించగలదని కంపెనీ పేర్కొంది. గతంలో ఈ మోడల్‌ను నడిపిన అనుభవం ప్రకారం, ఆఫ్‌రోడింగ్‌లో మంచి పనితీరు చూపిస్తుంది.
థార్ రాక్స్ కూడా మరో మంచి ఎంపిక. ఇందులో MX5, AX5L, AX7L వేరియంట్లలో 4WD వ్యవస్థ ఉంది. వీటి ధరలు రూ.19.56 లక్షల నుంచి రూ.23.52 లక్షల వరకు ఉన్నాయి. ఎలక్ట్రానిక్ రియర్ డిఫరెన్షియల్ లాక్, బ్రేక్ లిమిటెడ్ స్లిప్ డిఫరెన్షియల్, పలు టెర్రైన్ మోడ్‌లు ఇందులో ఉన్నాయి.
మొత్తంగా చూస్తే... తక్కువ ధరలో ఆఫ్రోడింగ్ అనుభవం కావాలనుకునేవారికి మారుతి జిమ్నీ మంచి ఎంపిక. ఎక్కువ లోతు నీటిని దాటగల సామర్థ్యం కావాలంటే ఫోర్స్ గుర్ఖా ఆకట్టుకుంటుంది. పవర్, సౌకర్యం, ఆఫ్‌రోడ్ సామర్థ్యం కలగలిపి కావాలనుకునేవాళ్లు మహీంద్రా థార్ లేదా స్కార్పియో ఎన్‌ను పరిశీలించవచ్చు.
గమనిక: ఇక్కడ పేర్కొన్న ధరలన్నీ ఎక్స్-షోరూమ్ ధరలు.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.