Volkswagen Virtus Facelift: భారత మార్కెట్లో మంచి గుర్తింపు తెచ్చుకున్న వోక్స్‌వ్యాగన్‌ విర్టస్‌ సెడాన్ త్వరలోనే కొత్త రూపంలో (ఫేస్లిఫ్ట్) రానుంది. కంపెనీ, తొలిసారిగా Virtus Facelift టీజర్‌ను విడుదల చేసింది. ఇందులో కొత్త డిజైన్ మార్పులను చూపించింది. 2022 జూన్‌లో భారత్‌లోకి వచ్చిన తర్వాత ఈ మోడల్‌కు వస్తున్న తొలి సమగ్ర అప్‌డేట్ ఇదే.
కొత్త టీజర్‌లో.. హెడ్‌లైట్లు, టెయిల్ లైట్లు, ఫ్రంట్ గ్రిల్, బంపర్, అల్లాయ్ వీల్స్‌లో మార్పులు కనిపించాయి. Skoda Slavia Facelift తరహాలో కొత్త ఫీచర్లు కూడా వచ్చే అవకాశం ఉంది. అంతేకాకుండా, 1.0-లీటర్ టర్బో పెట్రోల్ ఇంజిన్‌తో ఉన్న 6-స్పీడ్ ఆటోమేటిక్ గేర్‌బాక్స్ స్థానంలో కొత్త 8-స్పీడ్ ఆటోమేటిక్ గేర్‌బాక్స్‌ను అందించవచ్చని సమాచారం.
ఫ్రంట్ డిజైన్‌లో మార్పులు
Virtus Facelift ముందు భాగంలో కొత్త ఫ్రంట్ బంపర్ కనిపిస్తోంది. ఇందులో గ్లోస్ ఫినిష్‌తో కూడిన చిన్న డిజైన్ ఎలిమెంట్లు ఉన్నాయి. ఫాగ్ ల్యాంప్ హౌసింగ్‌ను కూడా మార్చారు. ఇందులో చిన్న క్యూబ్ ఆకారపు లైట్లు కనిపిస్తున్నాయి.
ఫ్రంట్ గ్రిల్ డిజైన్‌లో స్వల్ప మార్పులు చేశారు. ఇందులో వెలిగే Volkswagen లోగో, రెడ్ GT బ్యాడ్జ్ ఉండే అవకాశం కనిపిస్తోంది. హెడ్‌లైట్ల డిజైన్ కూడా కొంత మారింది. ప్రధాన హెడ్‌లైట్ల కింద మాత్రమే LED DRLs ఉండేలా కనిపిస్తున్నాయి. అయితే రెండు హెడ్‌లైట్ల మధ్య ఉన్న క్రోమ్ స్ట్రిప్స్ పాత మోడల్‌లో మాదిరిగానే కొనసాగనున్నట్లు తెలుస్తోంది.
కొత్త బ్లాక్ అల్లాయ్ వీల్స్
టీజర్‌లో కొత్త బ్లాక్ ఫినిష్ అల్లాయ్ వీల్స్ కనిపించాయి. పాత Virtus GT వేరియంట్‌లోనూ బ్లాక్ అల్లాయ్ వీల్స్ ఉండేవి. ఇతర వేరియంట్లలో డ్యూయల్ టోన్ అల్లాయ్ వీల్స్ అందించే అవకాశం ఉంది.
వీల్ సైజు మాత్రం గతంలో మాదిరిగానే 16 అంగుళాలుగా ఉండవచ్చని అంచనా. ఔట్‌సైడ్‌ రియర్ వ్యూ మిర్రర్స్ (ORVMs)పై కొత్త కెమెరా పాడ్స్ కనిపించాయి. వీటి ఆధారంగా ఫేస్లిఫ్ట్ మోడల్‌లో 360 డిగ్రీ కెమెరా సెటప్ వచ్చే అవకాశం స్పష్టమవుతోంది. మిగతా సైడ్ ప్రొఫైల్‌లో పెద్దగా మార్పులు కనిపించడం లేదు.
ఇది కూడా చదవండి: కొత్త వాహనానికే కాదు.. పాత బండికి కూడా BH సిరీస్ నంబర్ ప్లేట్! ఎలా అప్లై చేయాలంటే?
టెయిల్ లైట్లలో కొత్త LED ఎలిమెంట్లు
కారు వెనుక భాగంలో టెయిల్ లైట్ల LED ఎలిమెంట్లను మార్చినట్లు టీజర్‌లో కనిపిస్తోంది. అయితే టెయిల్ ల్యాంప్ హౌసింగ్ మాత్రం పాత మోడల్ తరహాలోనే ఉంది.
వెనుక బంపర్‌లోని బ్లాక్ లోయర్ సెక్షన్, బూట్ లిప్ స్పాయిలర్ వంటి అంశాలు కూడా ప్రస్తుత Virtus మోడల్‌లో ఉన్నట్లుగానే కనిపిస్తున్నాయి.
ఇంటీరియర్, ఇంజిన్ వివరాలు
Virtus Facelift ఇంటీరియర్ డిజైన్‌లో పెద్ద మార్పులు ఉండకపోవచ్చని అంచనా. అయితే కొత్త ఫీచర్లు జోడించే అవకాశం ఉంది. ఇంజిన్ ఆప్షన్లు కూడా ప్రస్తుత మోడల్‌లో ఉన్నవే కొనసాగవచ్చని తెలుస్తోంది.
ప్రధానంగా 1.0-లీటర్ టర్బో పెట్రోల్ ఇంజిన్‌కు కొత్త 8-స్పీడ్ ఆటోమేటిక్ గేర్‌బాక్స్ అందించవచ్చని సమాచారం. ప్రస్తుతం ఉన్న 6-స్పీడ్ ఆటోమేటిక్ గేర్‌బాక్స్ స్థానంలో ఇది రానుంది. అయితే మిగతా స్పెసిఫికేషన్లపై కంపెనీ ఇంకా పూర్తి వివరాలు వెల్లడించలేదు.
ఇది కూడా చదవండి: ఒక రాష్ట్రం నుంచి మరో రాష్ట్రానికి వెళ్లినా కొత్త రిజిస్ట్రేషన్ అవసరం లేదు.. BH సిరీస్ నంబర్ ప్లేట్ పూర్తి వివరాలు ఇవే!
మొత్తంగా చూస్తే.. కొత్త Volkswagen Virtus Faceliftలో డిజైన్ మార్పులతో పాటు 360 డిగ్రీ కెమెరా వంటి కొత్త ఫీచర్లు ఆకర్షణగా నిలవనున్నాయి. అధికారికంగా విడుదలయ్యే సమయంలో మరిన్ని వివరాలు వెల్లడయ్యే అవకాశం ఉంది.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.