BH Number Plate Application Process: ఒక రాష్ట్రంలో వాహనం కొనుగోలు చేసి రిజిస్ట్రేషన్ చేయించిన తర్వాత, జాబ్‌ కోసం మరో రాష్ట్రానికి ఆ బండిని తీసుకుని వెళ్లాల్సివస్తే కొన్ని ఇబ్బందులు ఎదురవుతాయి. ముఖ్యంగా, కొత్త రాష్ట్రంలో మీ వాహనాన్ని 12 నెలలకు మించి ఉంచితే అక్కడి రిజిస్ట్రేషన్ మార్క్ తీసుకోవాల్సి వస్తుంది. ఇందుకోసం అదనపు డాక్యుమెంట్లు సమర్పించాలి, కొత్త రాష్ట్రంలో మళ్లీ రోడ్ టాక్స్ కట్టాలి. పాత రాష్ట్రంలో కట్టిన టాక్స్‌ను తిరిగి పొందేందుకు కూడా అప్లై చేసుకోవాలి.
ఈ ఇబ్బందులకు చెక్‌ పెట్టేందుకు కేంద్ర రోడ్డు రవాణా, రహదారుల మంత్రిత్వ శాఖ (MoRTH) 2021లో భారత్ సిరీస్ (BH సిరీస్)ను ప్రవేశపెట్టింది. BH సిరీస్ కింద మీ బండిని రిజిస్ట్రేషన్ చేసుకుంటే, ఆ వాహనాన్ని మరో రాష్ట్రానికి తీసుకెళ్లినా, అక్కడే ఎన్నాళ్లు ఉపయోగించినా కొత్త రిజిస్ట్రేషన్ మార్క్ తీసుకోవాల్సిన అవసరం ఉండదు. అయితే, ఈ పథకం అందరికీ వర్తించదు. కొన్ని ఉద్యోగ వర్గాలు మాత్రమే దరఖాస్తు చేసుకోవడానికి అర్హులు.
BH సిరీస్ నంబర్ ప్లేట్‌కు ఎవరు అర్హులు?
పూర్తిగా తయారైన వ్యక్తిగత వాహనాలకు మాత్రమే BH సిరీస్ కింద రిజిస్ట్రేషన్ చేస్తారు. ఇందులోకి కార్లు, ద్విచక్ర వాహనాలు వస్తాయి.
ఈ కింది జాబ్‌ చేస్తున్నవాళ్లు BH సిరీస్ కోసం అప్లై చేసుకోవచ్చు.
- రక్షణ రంగ ఉద్యోగులు- కేంద్ర ప్రభుత్వ ఉద్యోగులు- రాష్ట్ర ప్రభుత్వ ఉద్యోగులు- కేంద్ర, రాష్ట్ర ప్రభుత్వ రంగ సంస్థల్లో (PSUs) పనిచేసేవారు- కనీసం నాలుగు రాష్ట్రాలు లేదా కేంద్రపాలిత ప్రాంతాల్లో కార్యాలయాలు కలిగిన ప్రైవేట్ సంస్థల ఉద్యోగులు- ప్రైవేట్ సంస్థల్లో పనిచేసే ఉద్యోగి.. ఆ నాలుగు ప్రాంతాల్లోని ఏ ఒక్క ప్రాంతంలో పని చేసినా దరఖాస్తుకు అర్హుడే. ఆ ఉద్యోగి అర్హతను నిరూపించేందుకు యజమాని నుంచి ఫారం 60లో వర్కింగ్ సర్టిఫికెట్ సమర్పించాలి.
ఇది కూడా చదవండి: ఒక రాష్ట్రం నుంచి మరో రాష్ట్రానికి వెళ్లినా కొత్త రిజిస్ట్రేషన్ అవసరం లేదు.. BH సిరీస్ నంబర్ ప్లేట్ పూర్తి వివరాలు ఇవే!
ఈ అర్హతలు ఉన్నంత మాత్రాన రిజిస్ట్రేషన్ ఖరారైనట్లు కాదు. సంబంధిత రిజిస్ట్రేషన్ అథారిటీ పత్రాలను పరిశీలించి అనుమతి ఇచ్చిన తర్వాతే BH సిరీస్ నంబర్ కేటాయిస్తారు.
BH సిరీస్ నంబర్ ప్లేట్ కోసం ఎలా దరఖాస్తు చేయాలి?
కొత్త వాహనానికి BH సిరీస్ రిజిస్ట్రేషన్ తీసుకోవడం, ఇప్పటికే సాధారణ రాష్ట్ర రిజిస్ట్రేషన్ ఉన్న వాహనాన్ని BH సిరీస్‌కు మార్చడం.. ఈ రెండింటికీ దరఖాస్తు విధానం వేర్వేరుగా ఉంటుంది. అయితే, రెండు సందర్భాల్లోనూ ముందుగా అర్హతను నిరూపించే పత్రాలు సమర్పించాలి.
దరఖాస్తుకు అవసరమైన పత్రాలు
BH సిరీస్ దరఖాస్తులో ఉద్యోగానికి సంబంధించిన ధ్రువీకరణ పత్రాలు కీలకం. ప్రైవేట్ సంస్థల ఉద్యోగులు తమ సంస్థకు కనీసం నాలుగు రాష్ట్రాలు లేదా కేంద్రపాలిత ప్రాంతాల్లో కార్యాలయాలు ఉన్నాయని నిర్ధారించే ఫారం 60 వర్కింగ్ సర్టిఫికెట్ ఇవ్వాలి. అర్హులైన ప్రభుత్వ ఉద్యోగులు నిర్దేశించిన అధికారిక గుర్తింపు కార్డు లేదా సర్వీస్ సర్టిఫికెట్ సమర్పించవచ్చు.
వాహన రిజిస్ట్రేషన్‌కు అవసరమైన ఇతర పత్రాలు కూడా ఇవ్వాలి. వీటిలో వాహనం ఇన్వాయిస్, గుర్తింపు రుజువు, చిరునామా రుజువు ఉంటాయి. ఇప్పటికే రిజిస్ట్రేషన్ అయిన వాహనాన్ని BH సిరీస్‌కు మార్చాలనుకుంటే ప్రస్తుత రిజిస్ట్రేషన్ సర్టిఫికెట్ (RC) కూడా అవసరం.
వాహనం కొనుగోలు కోసం రుణం తీసుకున్నా, లీజుకు తీసుకున్నా లేదా హైపోథికేషన్ ఒప్పందం ఉన్నా అదనపు పత్రాలు అవసరం కావచ్చు. వాహనం రిజిస్ట్రేషన్ స్థితి, దరఖాస్తు రకాన్ని బట్టి పత్రాల జాబితా మారే అవకాశం ఉంది. అందుకే ముందుగానే డీలర్ లేదా రిజిస్ట్రేషన్ అథారిటీని సంప్రదించి వివరాలు తెలుసుకోవడం మంచిది.
ఇది కూడా చదవండి: లాంగ్‌ ట్రిప్పుల్లోనూ చల్లగా, హాయిగా జర్నీ.. ఈ 10 కార్లలో వెంటిలేటెడ్ సీట్లు.. మీ బడ్జెట్‌లోనే!
కొత్త వాహనానికి BH సిరీస్ రిజిస్ట్రేషన్
కొత్త కారు లేదా ద్విచక్ర వాహనం కొనుగోలు చేస్తున్నప్పుడు BH సిరీస్‌కు అర్హత ఉంటే డీలర్ వద్దే ఈ రిజిస్ట్రేషన్ కావాలని తెలియజేయాలి. డీలర్ అవసరమైన పత్రాలతో VAHAN పోర్టల్ ద్వారా దరఖాస్తు సమర్పిస్తారు. ఆ తర్వాత రిజిస్ట్రేషన్ అథారిటీ వాటిని పరిశీలిస్తుంది.
అర్హత నిర్ధారణ అయిన తర్వాత వర్తించే మోటార్ వాహన పన్ను, రిజిస్ట్రేషన్ ఛార్జీలు చెల్లించాలి. దరఖాస్తుకు అనుమతి లభించిన తర్వాత నిర్దేశిత విధానంలో BH సిరీస్ రిజిస్ట్రేషన్ నంబర్ కేటాయిస్తారు.
వాహనం రిజిస్ట్రేషన్ ప్రక్రియ ప్రారంభంలోనే డీలర్‌కు BH సిరీస్ కావాలని చెప్పడం మంచిది. దీనివల్ల ఉద్యోగ ధ్రువీకరణ పత్రం, ఇతర అవసరమైన పత్రాలను ముందుగానే సిద్ధం చేసుకునే అవకాశం ఉంటుంది.
ఇప్పటికే ఉన్న వాహనాన్ని BH సిరీస్‌కు మార్చుకోవచ్చా?
కొత్త వాహనం కొనుగోలు చేసినప్పుడే BH సిరీస్ తీసుకోవాలనే నిబంధన లేదు. ఇప్పటికే సాధారణ రాష్ట్ర రిజిస్ట్రేషన్ ఉన్న కారు లేదా ద్విచక్ర వాహనాన్ని కూడా అర్హత పొందిన తర్వాత BH సిరీస్‌కు మార్చుకునేందుకు దరఖాస్తు చేసుకోవచ్చు.
దీనికోసం ఫారం 27Aతో పాటు ప్రస్తుత RC, ఉద్యోగ అర్హతను నిరూపించే పత్రాలను సంబంధిత రిజిస్ట్రేషన్ అథారిటీకి సమర్పించాలి. అధికారులు దరఖాస్తును పరిశీలించి, చెల్లించాల్సిన పన్నును నిర్ణయిస్తారు. అనుమతి లభించిన తర్వాత కొత్త BH సిరీస్ రిజిస్ట్రేషన్ మార్క్ కేటాయిస్తారు.
వాహనంపై రుణం, లీజు లేదా హైపోథికేషన్ ఒప్పందం ఉంటే వాటికి సంబంధించిన నిబంధనలను కూడా పూర్తి చేయాలి. పాత రిజిస్ట్రేషన్ నుంచి BH సిరీస్‌కు మారడం సంబంధిత అధికారుల అనుమతిపై ఆధారపడి ఉంటుంది.
BH సిరీస్‌లో VIP లేదా ఫ్యాన్సీ నంబర్ ఎంచుకోవచ్చా?
0001, 0007, 9999 వంటి ప్రత్యేక నంబర్లు కావాలనుకునేవారికి BH సిరీస్ సరైన ఎంపిక కాకపోవచ్చు. సాధారణ రాష్ట్ర రిజిస్ట్రేషన్‌లో ఫ్యాన్సీ నంబర్లను నిర్దేశిత విధానంలో ఎంపిక చేసుకునే అవకాశం ఉంటుంది. కానీ BH సిరీస్‌లో రిజిస్ట్రేషన్ నంబర్‌ను వాహన యజమాని తనకు నచ్చినట్లుగా ఎంచుకోలేరు. నిర్దేశించిన వ్యవస్థ ద్వారానే నంబర్ కేటాయిస్తారు.
BH సిరీస్ రిజిస్ట్రేషన్ నంబర్ సాధారణంగా ఈ రూపంలో ఉంటుంది: YY BH XXXX AA.
ఇందులో మొదటి రెండు అంకెలు (YY) వాహనం తొలిసారి రిజిస్ట్రేషన్ అయిన సంవత్సరాన్ని సూచిస్తాయి. తర్వాత వచ్చే BH అక్షరాలు భారత్ సిరీస్‌ను సూచిస్తాయి. ఆ తర్వాత నాలుగు అంకెలు (XXXX) నంబర్ క్రమాన్ని తెలియజేస్తాయి. చివర్లో ఉండే రెండు అక్షరాలు (XX) రిజిస్ట్రేషన్ మార్క్‌లో భాగంగా ఉంటాయి.
మీకు ప్రత్యేకమైన లేదా అదృష్ట సంఖ్య కావాలంటే రిజిస్ట్రేషన్ సిరీస్‌ను ఎంచుకునే ముందే ఫ్యాన్సీ నంబర్లకు సంబంధించిన నిబంధనలను తెలుసుకోవాలి. సాధారణ రాష్ట్ర రిజిస్ట్రేషన్‌లో అందుబాటులో ఉన్న నంబర్ BH సిరీస్‌లోనూ దొరుకుతుందని హామీ లేదు.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.