Zodiac Signs: ఈ రాశులవారికి వానాకాలం అంటే చాలా ఇష్టం - చిరుజల్లుల సవ్వడి వింటూ ఊహా ప్రపంచంలోకి వెళ్లిపోతారు!

Astrology: చిరు జల్లులు, మట్టివాసన, ప్రశాంతంగా కనిపించే ప్రకృతి, ఎటుచూసినా పచ్చదనం.. ఇవన్నీ సంతోషాన్ని రెట్టింపుచేస్తాయి..ఈ ఆనందాన్ని అందరూ ఆస్వాదించలేరు...అది కూడా మీ రాశిపై ఆధారపడి ఉంటుందట..

Zodiac Signs:  నల్లటి మబ్బులు..చల్లటి గాలులు..చినుకుల సవ్వడిని చూసి తమని తాము మర్చిపోతుంటారు కొందరు. ఈ ప్రపంచానికి దూరంగా ఊహాలోకంలో విహరిస్తుంటారు. ఈ భావోద్వేగాలన్నీ మీ జన్మరాశిపై ఆధారపడి ఉంటాయంటారు జ్యోతిష్యశాస్త్ర పండితులు. ఈ రాశుల్లో మీరున్నారా ఇక్కడ చెక్ చేసుకోండి..
 
వృషభ రాశి (Taurus) (కృత్తిక 2,3,4 పాదాలు, రోహిణి, మృగశిర 1,2 పాదాలు)

పంచభూతాల్లో వృషభ రాశి భూమికి సంకేతంగా చెబుతారు. చినుకుతడికి పులకరించే భూమిలా...మబ్బులు, చినుకులు చూడగానే వృషభ రాశివారిలో ఉత్సాహం ఉరకలెత్తుతుంది. ఈ రాశివారికి పర్యావరణంతో లోతైన సంబంధం ఉంటుంది. అందుకే వానని చూసి చికాకు పడరు.. జల్లుల్లో తడుస్తూ ప్రకృతి అందాలను చూస్తూ మట్టి సువాసనను ఆస్వాదిస్తారు.   

కర్కాటక రాశి (Cancer) కర్కాటకం (పునర్వసు 4 పాదం, పుష్యమి, ఆశ్లేష)

కర్కాటక రాశి పంచభూతాల్లో నీటికి సంకేతం. వీరిలో భావోద్వేగాలు అధికంగా ఉంటాయి. వాతావరణంలో వచ్చే మార్పులు ఈ రాశివారి  ఆలోచనలపై ప్రభావం చూపిస్తాయి. మిగిలిన కాలాల్లో కన్నా వానాకాలంలో కర్కాటక రాశివారు ఓదార్పుని పొందుతారు. వర్షపు చినుకుల సవ్వడి వింటూ  ఒంటరిగా కూర్చుని ప్రకృతిని ఆస్వాదిస్తూ పుస్తకం చదవడం అంటే వీళ్లకి మహా సరదా. 

వృశ్చిక రాశి (Scorpio) (విశాఖ 4వ పాదం,అనూరాధ, జ్యేష్ఠ)

వృశ్చిక రాశి కూడా పంచభూతాల్లో జలసంబంధమైనదే. ఈ రాశివారి ఆలోచనలు వానాకాలంలో చాలా సానుకూలంగా ఉంటాయి. ముఖ్యంగా  వ్యక్తిగత సంబంధాల వృద్ధిపై ఎక్కువ దృష్టి పెడతారు. బంధాల మధ్య ఉన్న ప్రతికూలత తొలగించి ప్రశాంతత తెచ్చేందుకు ఈ సీజన్ సరైనది అనుకుంటారు.  ఈ రాశివారు వర్షాన్ని తమలో పరివర్తనకు సూచనగా ... తమలో ఉండే ప్రతికూలతను దూరంచేసి నూతన ప్రారంభానికి మార్గం సుగమం చేసేదిగా భావిస్తారు. 
 
కుంభ రాశి   (Aquarius) (ధనిష్ఠ 3,4, శతభిషం, పూర్వాభాద్ర 1,2,3 పాదాలు)

వానాకాలాన్ని ఆస్వాదించే వారిలో కుంభ రాశివారూ ఉన్నారు. విశ్లేషణాత్మకంగా ఉండే వీరి ఆలోచనలకు వానాకాలం ప్రేరణ ఇస్తుందట. వర్షపు చినుకుల్లో లయబద్ధమైన సంగీతం వింటూ తమ జీవితంలో ఉండే ఆనంద క్షణాలను గుర్తుచేసుకుంటారు. అదే సమయంలో భవిష్యత్ జీవితం ఆనందమయం కావాలంటే ఎలాంటి మార్పులను స్వాగతించాలో కూడా తమలో తాము ఆలోచించి నిర్ణయాలు తీసుకుంటారట.   

మీన రాశి  (పూర్వాభాద్ర 4 పాదం, ఉత్తరాభాద్ర, రేవతి)

మీన రాశి కూడా పంచభూతాల్లో నీటికి సంకేతం. కలలు కనడం వీరి సహజనైజం. ఈ రాశివారికి వర్షాకాలంతో ఓ మంచి అనుబంధం ఉన్నట్టు భావిస్తారు. తొలకరి జల్లులుకురిసేవేళ వీరిలో సృజనాత్మకత మేల్కొంటుంది..కొత్త కొత్త ఆలోచనలు, ఊహల్లో మునిగితేలుతారు. వర్షాన్ని ఆస్వాదిస్తూ తమ భావాలను పేపర్ పై పెట్టడాన్ని ఈ రాశివారు ఎంజాయ్ చేస్తారు.  

గమనిక: ఓ రాశిలో ఫలితాలన్నీ ఒక్కరికే చెందుతాయని భావించరాదు. మీ జాతకం, గ్రహస్థితి ఆధారంగా కూడా మారుతాయి. వ్యక్తిగత వివరాల కోసం అనుభవజ్ఞులైన జ్యోతిష్య పండితులను సంప్రదించగలరు.