పర్యాటక, క్రీడల మంత్రిగా బాధ్యతలు చేపట్టాక మంత్రి ఆర్కే రోజా తొలిసారి విశాఖపట్నం వచ్చారు. విశాఖ శారదా పీఠాన్ని దర్శించుకున్నారు. మంత్రి పదవి వచ్చాక తిరుమల దర్శనం చేసుకుని తొలిసారి వైజాగ్ వచ్చానని ఈ సందర్భంగా రోజా అన్నారు. గతంలో పార్టీ పెట్టిన కొత్తలో వైజాగ్ ఇంచార్జ్ గా పని చేశానని గుర్తు చేసుకున్నారు. ఈ సందర్భంగా రోజా మాట్లాడుతూ.. ‘‘శారదా పీఠంలో స్వరూపానంద స్వామి దర్శనం చేసుకున్నా. సింహాచలం దర్శనం కూడా చేసుకుంటా. తెలుగు అమ్మాయిగా తెలుగు సంస్కృతిని ఎల్లప్పుడూ ప్రమోట్ చేయడానికి ముందుంటా’’నని అన్నారు.
‘‘వైజాగ్ అనగానే దేవుడే కాదు.. బీచ్ లూ.. పర్యాటక ప్రాంతాలు చాలా ఉంటాయి. వాటిని, శారదా పీఠాన్ని పర్యాటకంగా డెవలప్ చేసి ఇంకా ఎక్కువ మంది వచ్చేలా పని చేస్తా. హీరోయిన్ గా అరకు లాంటి పర్యాటక ప్రాంతాలన్నీ తిరిగా. ఇప్పడు మంత్రిగా వాటిని మరింత అభివృద్ధి చేస్తా. నా మొదటి సినిమా చామంతి షూటింగ్ అరకు లోనే జరిగింది. అలాగే క్రీడల మంత్రిగా రాష్ట్రంలోని వెనుకబడిన క్రీడాకారులను వెలుగులోకి తీసుకొచ్చి వారు పతకాలు సాధించేలా ప్రోత్సహిస్తా. వైజాగ్ నుంచి ఏ మంత్రి ప్రాతినిథ్యం వహించకున్నా ఉమ్మడి జిల్లాల కింద పరిగణిస్తే రెండు మంత్రి పదవులు ఇచ్చారు.’’
షార్ట్ ఫిల్ములు తీయిస్తాం
‘‘రాష్ట్రంలోని 13 ఉమ్మడి జిల్లాలలోని పర్యాటక ప్రాంతాలపై షార్ట్ ఫిల్మ్స్ తీయించి.. పర్యాటకులకు వాటి గురించి తెలిసేలా వివరాలు అందిస్తాం. పర్యాటక ప్రాంతాల్లో కాటేజీలు నిర్మిస్తాం. టెంపుల్ టూర్స్, సర్క్యూట్ టూర్లు ఏర్పాటు చేస్తాం. కేంద్రంలో ఉన్న పర్యాటక మంత్రి కిషన్ రెడ్డితో సమన్వయం చేసుకుని రాష్ట్రాన్ని టూరిజం పరంగా అభివృద్ధి చేస్తాం.
విజయవాడ గ్యాంగ్ రేప్ ఘటనపై స్పందన
‘‘విజయవాడ ఘటన దురదృష్ట కరం. కేంద్రం దిశ చట్టాన్ని ఆమోదించి ఉంటే అత్యాచారం చేసిన వాళ్ళకి వెంటనే ఉరేసే అవకాశం ఉండేది. అమ్మాయిలు మాయమాటలు విని ట్రాప్ లో పడొద్దు. ఇలాంటి ఘటనలను రాజకీయ పార్టీలు రాజకీయం చెయ్యాలని చూడడం సరికాదు. చంద్రబాబు దగ్గర కార్పొరేటర్ వేధింపుల వల్ల విజయవాడలో ఒక అమ్మాయి ఆత్మహత్యకు పాల్పడితే కనీసం ఆ అమ్మాయి కుటుంబాన్ని పరామర్శించని చంద్రబాబు అసలు ఉన్మాది. కాల్ మనీ వ్యవహారంలో సీడీల ప్రూఫ్‌లను బయట పెడితే తనను అన్యాయంగా ఏడాది పాటు సస్పెండ్ చేసింది చంద్రబాబు ప్రభుత్వం కాదా? ఎమ్మెల్యే చింతమనేని వనజాక్షిని కొట్టినప్పుడు చంద్రబాబు ఏమయ్యాడు? ఆడ పిల్లల పుట్టుకపై కామెంట్స్ చేసిన వ్యక్తి చంద్రబాబు. కరోనా టైంలో కూడా రాజకీయాలు చేసిన వ్యక్తి చంద్రబాబే. ఆడపిల్లలు బయటికి వెళ్లినప్పుడు ఏ ప్రమాదం ఎదురైనా వెంటనే దిశ యాప్ వాడండి. ఎవ్వరినీ గుడ్డిగా ప్రేమించి మోసపోకండి. తల్లి తండ్రులతో ఏ విషయం గురించైనా ఓపెన్ గా మాట్లాడండి.