Perni Nani: గుడివాడ ఎమ్మెల్యే కొడాలి నానిపై మాజీ మంత్రి పేర్ని నాని ఆసక్తికర వ్యాఖ్యలు చేశారు. కొడాలి నాని గడ్డం, మెడలో రుద్రాక్ష మాలలు వేసుకుని రౌడీలా కనిపిస్తారని, కానీ ఆయన మనసు వెన్న వంటిదని పేర్ని నాని అన్నారు. గుడివాడ బస్ డిపో ప్రారంభోత్సవంలో కొడాలి నానితో కలిసి పేర్ని నాని మాట్లాడారు. కొడాలి నాని ఎప్పుడూ ఏడో తరగతి, పదో తరగతి వరకు చదువుకున్నానని డ్రామా మాటలు మాట్లాడతారని, ఆయన బుర్ర పాదరసం కంటే వేగంగా ఆలోచిస్తుందని మెచ్చుకున్నారు. రాజకీయాల్లో కొడాలి నాని వంటి తెలివైన రాజకీయ నేతను తాను ఇప్పటి వరకు చూడలేదని చెప్పుకొచ్చారు పేర్ని నాని.
గుడివాడలో కొడాలి నానికి తిరుగులేదు
కొడాలి నాని మనసు వెన్న లాంటిదని, అందుకే ఆయనను ప్రజలు నాలుగు సార్లు ఎమ్మెల్యేగా ఎన్నుకున్నారంటేనే విషయం అర్థం చేసుకోవచ్చని పేర్ని నాని అన్నారు. ఐదోసారి కూడా ఎమ్మెల్యేగా గెలిచేందుకు నాని స్కెచ్ సిద్ధం చేసుకున్నారని, వ్యూహాలు రచించి పెట్టుకున్నారని తెలిపారు. గుడివాడలో కొడాలి నానికి తిరుగులేదని చెప్పుకొచ్చారు. రాష్ట్రంలో జనాల గుండెల్లో జగన్ ఎలా పాతుకుపోయారో.. కొడాలి నాని కూడా గుడివాడ జనాల గుండెల్లో పాతుకు పోయారని పేర్ని నాని అన్నారు. కొడాలి నాని వంటి డైనమిక్ లీడర్ స్నేహితుడిగా దొరకడం తన అదృష్టంగా భావిస్తున్నట్లు వ్యాఖ్యానించారు.
ఆ ఇద్దరూ డ్రామాలు ఆడుతున్నారని పేర్ని ఫైర్
చంద్రబాబు, పవన్ కల్యాణ్ భేటీపై పేర్ని నాని తీవ్ర విమర్శలు చేశారు. ఆ ఇద్దరూ డ్రామాలు ఆడుతున్నారని పేర్ని ఫైర్ అయ్యారు. పవన్ రాజకీయాల్లోకి వచ్చిందే బాబు కోసమని విమర్శించారు. తాము నాలుగేళ్ల నుండి ఇదే మాట చెబుతున్నామని తెలిపారు. 2019లో వ్యతిరేక ఓటును చీల్చేందుకే విడిపోయారని, ఇప్పుడు ఓటు చీలకూడదని ఒక్కటి అవుతున్నారని పేర్ని నాని వ్యాఖ్యానించారు. పవన్, బాబు ఇద్దరూ ఒకే తాను ముక్కలని, వన్ బైటు అని విమర్శలు చేశారు. బాబు దగ్గర పవన్ కళ్యాణ్ తీసుకుంటున్న ప్యాకేజీ గురించి రాష్ట్ర ప్రజలకు తెలుసని అన్నారు.
"151 ఎమ్మెల్యేల్లో కొడాలి నాని పెద్దగా చదువుకోని వ్యక్తిలా కనిపిస్తాడు. ఏదో తరగతి, పదో తరగతి వరకు మాత్రమే చదువుకున్నానని కొడాలి నాని అంటాడు. అవన్నీ డ్రామా మాటలు. ఏం చదివామన్నది ముఖ్యం కాదు. పైకి గడ్డం, మెడలో రుద్రాక్ష మాలలతో రౌడీ గెటప్ లా కనిపిస్తుంది. కానీ కొడాలి నాని బుర్ర పాదరసం కంటే కూడా వేగంగా ఆలోచిస్తాడు. రాజకీయాల్లో అత్యంత తెలివైన నాయకుల్లో, నేను చూసిన వారిలో, నాకు తెలిసిన వారిలో కొడాలి నాని కంటే తెలివైన వారు లేరు. కొడాలి నానితో నేను పోటీ పడతానంటే నేనంటూ కొత్తగా ఇద్దరు కొట్టుకుంటున్నారు. వారు కొడాలి నాని గురించి తక్కువ అంచనా వేస్తున్నారు. ఇప్పటి వరకు నాలుగు సార్లు ఎమ్మెల్యేగా గెలిచాడంటేనే అర్థం చేసుకోవచ్చు. వాళ్లెవరినీ వదిలి పెట్టడు. వాళ్లందరికీ స్కెచ్ గీసి పెట్టాడు. ఐదో సారి కూడా గుడివాడ ఎమ్మెల్యేగా, అత్యధిక మెజార్టీతో గెలవడానికి సిద్ధంగా ఉన్నారు. అన్ని వ్యూహాలు రచించి పెట్టుకున్నారు. " - మాజీ మంత్రి పేర్ని నాని