Vangaveeti :గన్‌మెన్లను తిరస్కరించిన వంగవీటి.. రెక్కీ ఎవరు నిర్వహించారన్నదానిపై పోలీసుల అంతర్గత విచారణ !

ప్రభుత్వం కల్పించిన గన్‌మెన్లను వంగవీటి రాధాకృష్ణ తిరస్కరించారు. అభిమానులే తనకు రక్షణగా ఉంటారని స్పష్టం చేశారు.

విజయవాడ రాజకీయాల్లో సంచలనం సృష్టించిన వంగవీటి రాధాకృష్ణపై రెక్కీ నిర్వహించిన ఆరోపణలు రోజు రోజుకు కొత్త మలుపులు తిరుగుతోంది. ఈ రెక్కీ విషయాన్ని మంత్రి కొడాలి నాని ముఖ్యమంత్రి దృష్టికి తీసుకెళ్లారు. వెంటనే ముఖ్యమంత్రి వంగవీటి రాధకు టూ ప్లస్ టూ గన్‌మెన్లు ఇవ్వాలని ఆదేశాలు  జారీ  చేశారు. ఈ మేరకు పోలీసు ఉన్నతాధికారులు నలుగురిని ఆయన భద్రత కోసం పంపించారు. కానీ వంగవీటి రాధాకృష్ణ మాత్రం తనకు గన్‌మెన్లు అవసరం లేదని తిప్పి పంపేశారు. తనను అభిమానులే కాపాడుకుంటారని. వారే తనకు రక్షణ అని స్పష్టం చేశారు. అయితే ప్రభుత్వ ఆదేశాల మీద తాము వచ్చామని ఆ గన్‌మెన్లు నచ్చ  చెప్పే ప్రయత్నం చేశారు.  కానీ వినిపించుకోకపోవడంతో పై అధికారులకు తెలిపినట్లుగా తెలుస్తోంది. 

మరో వైపు వంగవీటి రాధాకృష్ణపై దాడి కోసం కొంత మంది రెక్కీ నిర్వహించారన్న ఆరోపణలను విజయవాడ పోలీసులు సీరియస్‌గా తీసుకున్నట్లుగా కనపిస్తోంది. స్వయంగా మంత్రి కొడాలి నాని, ఎమ్మెల్యే వంశీ సమక్షంలోనే రాధాకృష్ణ ఆ ఆరోపణలు చేశారు... ఆ తర్వాత కొడాలి నాని సీఎం దృష్టికి వాటిని తీసుకెళ్లారు. దాంతో   పోలీసులు కూడా ఇలా రెక్కీ నిర్వహించి ఎవరా అన్నదానిపై లోతైన దర్యాప్తు  చేస్తున్నట్లుగా తెలుస్తోంది. ఇప్పటి వరకూ ఎలాంటి కేసులు నమోదు చేయకపోయినా కొంత మంది అనుమానితుల్ని ప్రశ్నిస్తున్నట్లుగా ప్రచారం జరుగుతోంది.

వంగవీటి రాధాకృష్ణ చేసిన ఆరోపణలపై డీజీపీ గౌతం సవాంగ్ కూడా స్పందించారు. ఆయన  చేసిన వ్యాఖ్యలను పరిశీలిస్తున్నామన్నారు. అయితే వంగవీటి రాధాకృష్ణ వ్యక్తిగతంగాఆ వ్యాఖ్యలు చేసినందున అంత సీరియస్‌గా తీసుకోవాల్సిన అవసరం లేదని కూడా వ్యాఖ్యానించారు. అయితే ఇంటలిజెన్స్ పోలీసులు ఈ అంశంపై అంతర్గతంగా ఆరా తీస్తున్నారు. నివేదిక రెడీ చేస్తున్నట్లుగా తెలుస్తోంది. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి