నటుడు ప్రదీప్ రావత్ మరణం ఇండస్ట్రీని తీవ్ర దిగ్భ్రాంతికి గురి చేసింది. విలన్ రోల్స్‌లో భయపెట్టి... సహాయ పాత్రల్లో మెప్పించి కామెడీ పరంగానూ తనదైన ముద్ర వేశారు.

ప్రదీప్ హిందీ సినిమాలతో ఇండస్ట్రీలోకి ఎంట్రీ ఇచ్చినా రాజమౌళి నిర్మించిన సై సినిమాతోనే టాలీవుడ్ ఎంట్రీ ఇచ్చారు. విలన్ రోల్‌లో భిక్షు యాదవ్‌గా ఆయన లుక్ భయపెట్టక మానదు.

హిందీ, తెలుగుతో పాటు తమిళం, కన్నడ, మలయాళం, ఒరియా, ఆంగ్లం, మరాఠీ, భోజ్‌పురి తదితర భాషల్లో దాదాపు 4 దశాబ్దాలకు పైగా సినిమాల్లో నటించారు.

ఆర్థిక శాస్త్రంలో మాస్టర్స్ చేసిన ప్రదీప్ రావత్... తొలుత బ్యాంక్ జాబ్ చేశారు. ఆ తర్వాత తోటి ఉద్యోగుల ప్రోత్సాహంతో నటనలోకి ఎంట్రీ ఇచ్చారు. అలా మహాభారత్ టీవీ సీరియల్‌లో అశ్వత్థామ పాత్రతో పరిచయమయ్యారు.

అమితాబ్ అగ్నిపథ్ మూవీతో ప్రదీప్ కెరీర్ మలుపు తిరగ్గా... లగాన్‌లో ఫాస్ట్ బౌలర్‌గా గుర్తుండిపోయే పాత్ర చేశారు. రాజమౌళి సైతో భిక్షుయాదవ్‌గా తెలుగు తెరకు పరిచయమయ్యారు.

ఆ తర్వాత భద్ర, స్టాలిన్, దేశముదురు, యోగి, జగడం, మస్కా, గజిని ఓయ్, రెబల్, నాయక్, బాద్ షా, నేనే రాజు నేనే మంత్రి, సరైనోడు మూవీస్‌లో తనదైన విలనిజం నటనతో మెప్పించారు.

పూలరంగడు సినిమాలో విలన్ పాత్రే అయినా తన కామెడీతో నవ్వించారు. నేను శైలజలో హీరోగా ఫ్రెండ్‌గా వినోదాన్ని పంచారు. ఇప్పటికీ ఈ రీల్ ట్రెండ్ అవుతుంది.

ప్రదీప్ రావత్ తెలుగింటి అల్లుడే. స్టాలిన్ షూటింగ్ టైంలో కాకినాడకు చెందిన కల్యాణితో ప్రేమలో పడిన ఆయన ఆమెను వివాహం చేసుకున్నారు. వీరికి విక్రమ్, సింగ్ అనే ఇద్దరు కొడుకులు ఉన్నారు.

తన కెరీర్‌లో దాదాపు 150కి పైగా సినిమాలు చేశారు ప్రదీప్ రావత్. సినిమాల్లో విలన్ రోల్స్ చేసినా రియల్ లైఫ్‌లో ఆయన చాలా సైలెంట్‌గా ఉంటారని పేరుంది.

ప్రదీప్ రావత్ చివరిసారిగా నటించిన మూవీ తరుణ్ భాస్కర్ హీరోగా నటించిన గాయపడ్డ సింహం. ఆయన హఠాన్మరణం అందరినీ విషాదంలోకి నెట్టింది.