పెర్త్ టెస్ట్‌లో లబుషేన్ తో కామెడీ చేసిన యశస్వి జైస్వాల్

 సూపర్ సెంచరీతో పెర్త్ టెస్టులో ఆసీస్ కు ఎర్త్ పెట్టిన యువ సంచలనం యశస్వి జైశ్వాల్..బాడీ లాంగ్వేజ్ తోనూ క్రికెట్ ఫ్యాన్స్ లో చర్చకు దారితీశాడు. అదే ఆస్ట్రేలియా పిచ్ లపై ఆసీస్ ఆటగాళ్లతోనే కవ్వింపులకు దిగటం. ఆసీస్ కు స్లెడ్జింగ్ ఏం కొత్త కాదు. ఆటగాడిని బంతితో భయపెట్టలేనప్పుడు స్లెడ్జింగ్ కి దిగి ప్లేయర్ల మానసిక స్థితిని దెబ్బతీయటం కంగారూలకు పరిపాటే. అలాంటిది వాళ్లకు ఏ మాత్రం బెదరట్లేదు యశస్వి జైశ్వాల్. 161 పరుగులు బాది టీమిండియాను పెర్త్ టెస్ట్ లో ఎక్కడికో తీసుకెళ్లి పెట్టిన జైశ్వాల్..ఆసీస్ ప్లేయర్లను గ్రౌండ్ లో ఓ ఆటాడుకున్నాడు...మాటాడుకున్నాడు. ఫాస్ట్ బౌలింగ్ తో భయపెడతానంటూ హర్షిత్ రానా ను కవ్వించిన పేస్ లెజెండ్ మిచెల్ స్టార్క్ ను స్లో బాల్స్ వేస్తున్నావ్ ఏంటి బాబాయ్ అంటూ ఉడికించిన జైశ్వాల్....బ్యాట్ తో పాటు నోటికి పనిచెప్పే మార్నస్ లబుషేన్ నూ కవ్వించాడు. క్రీజు బయటకు వచ్చి రన్ కు యత్నించిన జైశ్వాల్ ను రనౌట్ చేస్తానన్నట్లు లబుషేన్ బాల్ తో భయపెడుతుంటే కొట్టు చూస్తూ అన్నట్లు కవ్వించాడు మన యశస్వి. బ్యాట్ పెడతా కాలు పెడతా అంటూ లబుషేన్ యాక్షన్ కి రియాక్షన్ ఇచ్చాడే కానీ ఎక్కడా తగ్గలేదు. ఇదంతా ఫన్నీ బ్యాంటరే అయినా యశస్వి జైశ్వాల్ జనరేషన్ బ్యాట్ తోనే కాదు బాడీ లాంగ్వేజ్ తో సమాధానం చెప్పే రకం అని ఆసీస్ ఆటగాళ్లకు తెలిసేలా చేశాడు.