Kadapa Police:కడప లో ఆత్మహత్యాయత్నానికి పాల్పడుతున్న యువకున్ని సేవ్ చేసిన పోలీస్

కడప జిల్లా,ప్రొద్దుటూరు రూరల్ పరిధిలోని చౌటపల్లి గ్రామంలో బోనమల్లు చెన్నమ్మ (50), కుమారుడు సుబ్బారాయుడు (22) నివసిస్తున్నారు. తల్లి చెన్నమ్మ తో సుబ్బారాయుడు తీవ్రస్థాయిలో గొడవపడ్డాడు. క్షణికావేశంలో తాను ఆత్మహత్య చేసుకుంటానంటూ తల్లిని బెదిరించి ఇంట్లోకి వెళ్ళిపోయి తలుపేసుకోవడంతో తల్లి చెన్నమ్మ ఆందోళన చెంది దిక్కుతోచని స్థితిలో ఆ ప్రాంతంలో గస్తీ నిర్వహించే బ్లూ కోల్ట్ - 7 సిబ్బంది వినియోగించే మొబైల్ నెంబర్ కు ఫోన్ చేసి ఫిర్యాదు చేసి తన కుమారుడిని కాపాడాలని వేడుకుంది. తక్షణమే స్పందించిన బ్లూ కోల్ట్ సిబ్బంది బి.రామాంజనేయులు( పి.సి 3048 ), వై నరసింహనాయుడు (పి.సి 2770) హుటాహుటిన ఘటనా స్థలానికి చేరుకున్నారు. స్థానికుల సాయంతో గడియ పెట్టిన తలుపులను గొడ్డలి సాయంతో పగులగొట్టి ఫ్యాన్ కు వేలాడుతున్న యువకుడిని క్రిందకు లాగి వెంటనే చికిత్స నిమిత్తం ప్రొద్దుటూరు జిల్లా ఆస్పత్రికి తరలించారు.