Young Man Died Due To Selfie Video With Cobra In Kamareddy: కొందరు పాములతో విన్యాసాలు చేయడం మనం చూశాం. పాములను పట్టుకోవడంలో ఆరి తేరిన వారు సైతం కొన్నిసార్లు పాముకాటుకు గురై ప్రాణాలు కోల్పోతుంటారు. కానీ, ఓ యువకుడు నాగుపామును ఏకంగా నోట్లోనే పెట్టుకుని సెల్ఫీ వీడియో తీశాడు. అనంతరం పాముకాటుకు గురై ప్రాణాలు కోల్పోయాడు. ఈ షాకింగ్ ఘటన కామారెడ్డి జిల్లా (Kamareddy District) బాన్సువాడ మండలంలో గురువారం జరిగింది. పామును నోట్లో పెట్టుకుని వీడియో తీసి దాన్ని సోషల్ మీడియాలో షేర్ చేయగా వైరల్‌గా మారింది.
స్థానికులు తెలిపిన వివరాల ప్రకారం.. మండలంలోని దేశాయిపేట గ్రామంలో మోచి శివరాజ్ (20), తండ్రి గంగారాం పాములు పడుతూ జీవనం సాగిస్తుంటారు. గంగారాం ఓ పామును పట్టుకుని కుమారుడికి ఇచ్చాడు. నోట్లో పెట్టుకుని వీడియో తీయాలని చెప్పగా.. శివరాజ్ అలానే చేశాడు. నాగుపాముతో ఆటలాడుతూ దాన్ని నోట్లో పెట్టుకుని సెల్ఫీ వీడియో తీశాడు. అనంతరం పాముకాటు వేయగా గుర్తించిన స్థానికులు వెంటనే అతన్ని బాన్సువాడ ప్రభుత్వాస్పత్రికి తరలించారు. అప్పటికే శరీరం మొత్తం విషం పాకడంతో పరిస్థితి విషమించి చికిత్స పొందుతూ ప్రాణాలు కోల్పోయాడు. ఈ ఘటన స్థానికంగా ఆందోళన కలిగించింది.
Also Read: Basara IIIT: బాసర ట్రిపుల్ ఐటీలో ఉద్రిక్తత- ఏబీవీపీ నేతల్ని అడ్డుకోవడంతో చినిగిన చొక్కాలు