వరంగల్: ఒక వాహనంపై ఒక్క చలానా ఉంటేనే కంగారు పడుతుంటాం. అయ్యో చలానా పెండింగ్ ఉంది అని టెన్షన్ పడేవాళ్లూ ఉంటారు. కానీ ఓ వాహనంపై ఒకటి రెండు కాదు ఏకంగా రెండు వందలకు పైగా ట్రాఫిక్ చలాన్లు పెండింగ్లో ఉన్నాయి. అయినా హాయిగా బైక్ మీద చక్కర్లు కొడుతూనే ఉన్నాడు. కానీ శనివారం నాడు సీన్ రివర్స్ అయింది. వరంగల్ పోలీస్ కమిషనర్ ఆదేశాల మేరకు వాహన తనిఖీలు చేస్తుండగా ఓ బైకర్ ట్రాఫిక్ చలాన్ల చరిత్ర బయటపడింది.
కాజీపేట ట్రాఫిక్ ఇన్స్ స్పెక్టర్ వెంకన్న తన సిబ్బందితో కలసి కాజీపేట చౌరస్తాలో వాహన తనిఖీలో చేసే సమయంలో ఓ స్కూటీ ఆపారు. హన్మకొండ ప్రాంతానికి చెందిన అస్లం అనే వ్యక్తి వాహనానికి సంబందించి పెండింగ్ చలాన్లు తనిఖీ చేయగా ఏకంగా 233 ట్రాఫిక్ చలాన్లను పెండింగ్ లో ఉన్నాయి. ఈ ట్రాఫిక్ చలాన్లు మొత్తం 45 వేల 350 కావడంతో జరిమానా మొత్తం చెల్లించే వరకు వాహనాన్ని స్వాధీనం చేసుకున్నట్లు సిఐ తెలిపారు.