Srinivas Goud Firing : తెలంగాణ మంత్రి శ్రీనివాస్ గౌడ్ గాల్లోకి కాల్పులు జరిపారు. మహబూబ్ నగర్ లో నిర్వహించిన ఫ్రీడం ర్యాలీలో ఆయన పాల్గొన్నారు. పెద్ద ఎత్తున విద్యార్థులు.. యువకులు పాల్గొన్న ర్యాలీ కొనసాగుతున్న సమయంలో హఠాత్తుగా పోలీసుల వద్ద నుంచి ఎస్ఎల్ఆర్ తుపాకీని తీసుకున్నారు. గాల్లోకి గురి పెట్టి కాల్పులు జరిపారు. ఒక్క సారిగా తూటాల శబ్దం వచ్చే సరికి ఆ చుట్టుపక్కల ఉన్న చాలా మందికి ఏం జరిగిందో అర్థం కాలేదు. తర్వాత మంత్రిగారే గాల్లోకి కాల్పులు జరిపారని తేలింది. మంత్రి గాల్లోకి కాల్పులు జరుపుతున్న దృశ్యాలు వైరల్‌గా మారాయి.
ఫ్రీడం ర్యాలీలో తుపాకీ కాల్పులు
మంత్రి అయినంత మాత్రాన ఆయనకు గాల్లోకి కాల్పులు జరిపే అధికారం ఉండదు. అలా కాల్పులు జరపడం చట్టపరంగా నేరం. అదే సమయంలో అది పోలీసులు అధికారికంగా వినియోగించాల్సిన తుపాకీ. ఏ పోలీసు ఉద్యోగికి అయితే దాన్ని కేటాయించారో..పూర్తిగా ఆ తుపాకీ, బుల్లెట్ల బాధ్యత ఆయనదే. ఇప్పుడు ఏ పోలీసు అధికారి దగ్గర శ్రీనివాస్ గౌడ్ తుపాకీ తీసుకున్నారో ఆయనది కూడా తప్పయ్యే అవకాశం ఉంది.
పోలీస్ వద్ద ఎస్ఎస్ఆర్ తీసుకుని గాల్లోకి కాల్పులు జరిపిన మంత్రి శ్రీనివాస్ గౌడ్
ఫ్రీడం ర్యాలీలు దేశవ్యాప్తంగా నిర్వహిస్తున్నారు. అయితే తుపాకులతో కవాతులు నిర్వహించాలని ఎక్కడా లేదు. మహబూబ్ నగర్‌లోనూ ఇలా పోలీసులు తుపాకులతో కవాతులు నిర్వహించలేదు. కానీ మంత్రి గారు పాల్గొంటున్నారన్న ఉద్దేశంతో సెక్యూరిటీ ఏర్పాటు చేశారు. ఆయన వ్యక్తిగత భద్రతా సిబ్బందితో పాటు కార్యక్రమం కోసం పోలీసులు బందోబస్తు ఏర్పాటు చేశారు. ఇలా ఏర్పాటు చేసిన వారిలో తన పక్కన ఉన్న పోలీసు అధికారి నుంచి ఎస్ఎల్ఆర్ వెపన్‌ను తీసుకున్న శ్రీనివాస్ గౌడ్ ఊహించని విధంగా కాల్పులు జరిపేశారు.
మంత్రి తీరుపై తీవ్ర విమర్శలు
పోలీసులు వెపన్‌ను మంత్రికి అయినా సరే ఇవ్వకూడదు. ఇంకా ముఖ్యంగా వెపన్‌ను లాక్ చేసుకుని ఉంటారు. కానీ మంత్రి అడగగానే పోలీసు అధికారి తన ఎస్ఎల్ఆర్ వెపన్‌ను ఇచ్చేయడమే కుండా.. ఫైరింగ్‌కు అనుకూలంగా ఉండేలా మార్చి ఇచ్చినట్లుగా అనుమానిస్తున్నారు. తప్పు గన్ ఇచ్చిన పోలీసు అధికారిదే ఎక్కువ ఉందన్న అభిప్రాయం వినిపిస్తోంది.
తీవ్ర విమర్శలు చేస్తున్న నెటిజన్లు
శ్రీనివాస్ గౌడ్ కాల్పులు జరుపుతున్న వీడియో సోషల్ మీడియాలో వైరల్ అయింది. సంచలనంగా మారింది. ఎంత మంత్రి అయితే మాత్రం ఇలా గాల్లోకి కాల్పులు జరుపుతారా అని ప్రశ్నిస్తున్నారు. తక్షణం మంత్రిపై చర్యలు తీసుకోవాలని... గన్ ఇచ్చిన పోలీసుల అధికారిపైనా చర్యలు తీసుకోవాలన్న డిమాండ్ సోషల్ మీడియాలో వినిపిస్తోంది. సాధారణంగా పెళ్లి బారాత్‌లలో కొంత మంది ఇలా గాల్లోకి లైసెన్స్‌డ్ తుపాకులతో కాల్పులు జరిపినా తీవ్రమైన కేసులు పెడతారు. ఇప్పుడు మంత్రిపై ఎలాంటి చర్యలు తీసుకుంటారని నెటిజన్లు ప్రశ్నిస్తున్నారు.
రబ్బర్ బుల్లెట్లు కాల్చానన్న మంత్రి శ్రీనివాస్ గౌడ్
తనకు ఎస్పీనే తుపాకీ ఇచ్చారని మంత్రి శ్రీనివాస్ గౌడ్ తెలిపారు. తాను రైఫిల్ అసోసియేషన్ సభ్యుడినన్నారు. తాను గాల్లోకి కాల్చింది రబ్బర్ బుల్లెట్లేనని ఇందులో వివాదమేదీ లేదని శ్రీనివాస్ గౌడ్ చెబుతున్నారు.