Breaking News: మద్యం దుకాణాల్లో రిజర్వేషన్లు.. ఉత్తర్వులు జారీ చేసిన తెలంగాణ ప్రభుత్వం
తెలంగాణ, ఆంధ్రప్రదేశ్ సహా దేశ వ్యాప్తంగా సెప్టెంబరు 21న జరిగే తాజా వార్తలు ఎప్పటికప్పుడు ఇక్కడ చూడొచ్చు. ఈ లైవ్ బ్లాగ్ అప్ డేట్ అవుతూ ఉంటుంది. తాజా సమాచారం కోసం ఈ పేజీని రీఫ్రెష్ చేస్తూ ఉండండి.
Background
తెలంగాణ, ఆంధ్రప్రదేశ్ సహా దేశ వ్యాప్తంగా సెప్టెంబరు 21న జరిగే తాజా వార్తలు ఎప్పటికప్పుడు ఇక్కడ చూడొచ్చు. ఈ లైవ్ బ్లాగ్ అప్ డేట్ అవుతూ ఉంటుంది. తాజా సమాచారం కోసం ఈ పేజీని రీఫ్రెష్ చేస్తూ ఉండండి....More
ఏపీ ప్రభుత్వం పాఠశాలలకు దసరా సెలవులు ప్రకటించింది. వచ్చే నెల 11వ తేదీ నుంచి 16వ తేదీ వరకు మొత్తం 6 రోజులు సెలవులు ప్రకటించింది. అక్టోబర్ 9 రెండో శనివారం, 10 ఆదివారం, 17వ తేదీ ఆదివారం కావడంతో మొత్తం 9 రోజులు దసరా సెలవులు. తిరిగి పాఠశాలలను 18వ తేదీన తెరుస్తారు.
కార్వీ స్టాక్ బ్రోకింగ్ కేసులో హైదరాబాద్ సీసీఎస్ పోలీసుల దర్యాప్తు చేస్తున్నారు. కార్వీ స్టాక్ బ్రోకింగ్ లిమిటెడ్ వైస్ ప్రెసిడెంట్ శ్రీకృష్ణను పోలీసులు అరెస్ట్ చేశారు. నిబంధనలకు విరుద్ధంగా పెట్టుబడిదారుల షేర్లను 9 డొల్ల కంపెనీలకు మళ్లించినట్లు సీసీఎస్ పోలీసుల దర్యాప్తులో తేలింది. సెబీకి సమాచారం ఇవ్వకుండా షేర్లు బ్యాంకుల్లో తనఖా పెట్టి దాదాపు రూ.1,500 కోట్లు కార్వీ స్టాక్ బ్రోకింగ్ లిమిటెడ్ రుణంగా తీసుకుంది. బ్యాంకు నుంచి తీసుకున్న రుణాలను వైస్ ప్రెసిడెంట్ శ్రీకృష్ణ 9 డొల్ల కంపెనీలకు మళ్లించినట్లు సీసీఎస్ పోలీసులు గుర్తించారు. ఈ మేరకు శ్రీకృష్ణను అరెస్ట్ చేసి రిమాండ్కు తరలించారు. ఈ కేసులో ఇప్పటికే కార్వీ సంస్థ ఛైర్మన్ పార్థసారథి, సీఈవో కృష్ణహరి, సీవోవో రాజీవ్ సింగ్తో పాటు కంపెనీ సెక్రటరీ శైలజను అరెస్టు చేశారు.
తెలంగాణలోని మద్యం దుకాణాల్లో రిజర్వేషన్లు ప్రకటిస్తూ రాష్ట్ర ప్రభుత్వం ఉత్తర్వులు ఇచ్చింది. మద్యం దుకాణాల్లో గౌడ కులస్థులకు 15 శాతం, ఎస్సీలకు 10 శాతం, ఎస్టీలకు 5 శాతం దుకాణాలను ప్రభుత్వం కేటాయించింది. మంత్రివర్గ సమావేశంలో తీసుకున్న నిర్ణయం మేరకు రిజర్వేషన్లు ఖరారు చేస్తూ ప్రభుత్వం ఉత్తర్వులు ఇచ్చింది. 2021-23 సంవత్సరాలకు ఈ రిజర్వేషన్లు అమల్లో ఉండనున్నాయి.
ప్రముఖ కళాకారులు గుస్సాడీ కనక రాజ్, దర్శనం మొగిలయ్య, భరత్ భూషణ్ లకు నెలకు పది వేల ఆర్థిక సహాయం అందించనున్నట్టు తెలంగాణ ప్రభుత్వం ప్రకటించింది. ఈ మేరకు 2021 జూన్ నుండి నగదు మొత్తాన్ని రాష్ట్ర సాంస్కృతిక శాఖ విడుదల చేసింది. ఈ ముగ్గురి కళాకారులకు ప్రత్యేకంగా జీవితాంతం నెలకు రూ.10 వేలు అందిస్తున్నట్టు ప్రభుత్వం ప్రకటించింది. ఈ మేరకు జూన్, జూలై, ఆగస్టు నెలలకు సంబంధించి నెలకు పది వేల రూపాయల చొప్పున ప్రత్యేక పింఛనులను విడుదల చేసినట్టు సాంస్కృతిక శాఖ సంచాలకులు మామిడి హరికృష్ణ తెలిపారు.
టీపీసీసీ అధ్యక్షుడు రేవంత్రెడ్డిపై మంత్రి కేటీఆర్ వేసిన పరువునష్టం దావాపై సిటీ సివిల్ కోర్టులో విచారణ ముగిసింది. పరువు నష్టం దావాలో ఇంజక్షన్ ఆర్డర్పై వాదనలు ముగిశాయి. కోర్టు మధ్యంతర ఉత్తర్వులు జారీచేసింది. డ్రగ్స్ కేసుతో ముడిపెట్టి రేవంత్రెడ్డి తప్పుడు ఆరోపణలు చేస్తున్నారని కేటీఆర్ పిటిషన్ లో పేర్కొన్నారు. తప్పుడు ఆరోపణలు చేయకుండా ఆదేశాలు ఇవ్వాలని కోరారు. ఈ కేసులో రేవంత్ రెడ్డికి నోటీసులు జారీచేసింది. డ్రగ్స్ కేసుకు సంబంధించి కేటీఆర్ పై వ్యాఖ్యలు చేయొద్దని తెలిపింది.
ములుగు ఎమ్మెల్యే సీతక్క అస్వస్థతకు గురయ్యారు. బీపీ పడిపోవడంతో ఆమె కళ్లు తిరిగి కిందపడిపోయారు. వెంటనే అక్కడే ఉన్న కాంగ్రెస్ కార్యకర్తలు సీతక్కను ఏటూరునాగారం ప్రభుత్వ ఆసుపత్రికి తరలించారు. అక్కడ ఆమెకు ప్రథమ చికిత్స అందించారు. వైద్యులు సీతక్కకు వైద్యం అందించిన తర్వాత ఆమె కాస్త కుదుటపడ్డారు.
టీపీసీసీ అధ్యక్షుడు రేవంత్రెడ్డి ఇంటి వద్ద టీఆర్ఎస్, కాంగ్రెస్ కార్యకర్తల బాహాబాహీకి దిగారు. రేవంత్రెడ్డి దిష్టిబొమ్మ దగ్ధం చేసేందుకు టీఆర్ఎస్ కార్యకర్తలు ప్రయత్నిస్తున్నారు. టీఆర్ఎస్ కార్యకర్తలపై కాంగ్రెస్ శ్రేణులు కర్రలు విసిరారు. కాంగ్రెస్, టీఆర్ఎస్ కార్యకర్తల మధ్య ఘర్షణ జరిగింది. రాళ్లు, కర్రలతో ఇరు పార్టీల కార్యకర్తలు దాడిచేసుకున్నారు.
వైఎస్సార్ తెలంగాణ పార్టీ అధ్యక్షురాలు వైఎస్ షర్మిల తెలంగాణ బోడుప్పల్లోని ఎగ్జిబిషన్ మైదానంలో నిరుద్యోగ దీక్ష చేపట్టారు. వైఎస్ షర్మిలను పోలీసులు అదుపులోకి తీసుకున్నారు. ఆమెను మేడిపల్లి పోలీసుస్టేషన్కు తరలించారు. షర్మిల దీక్షకు అనుమతి లేదని పోలీసులు తెలిపారు. షర్మిల అరెస్టును నిరసిస్తూ కార్యకర్తలు అడ్డుపడటంతో కాసేపు ఉద్రిక్త వాతావరణం చోటుచేసుకుంది.
అనంతపురం జిల్లా తాడిపత్రి సబ్ రిజిస్టర్ ఆఫీస్ లో మున్సిపల్ ఛైర్మన్ జేసీ ప్రభాకర్ రెడ్డి... అధికారులతో వాగ్వాదానికి దిగారు. చాలా మంది పేద రైతులు వ్యవసాయం చేయలేక భూములు అమ్ముతున్నారని దానిని కూడా అడ్డుకుంటే ఎలా అంటూ అధికారులను ప్రశ్నించారు. పేద రైతుల కోసం ఎంతవరకైనా పోరాడుతానని జెసీ స్పష్టం చేశారు. తాడిపత్రి మండలం తెరన్నపల్లి భూములు రిజిస్టర్ కావాలంటే ఈవోఆర్ డీ కి ఎకరాకు మూడు లక్షల డబ్బు ఇవ్వాల్సిందే అని చెప్పారని, డబ్బులు ఇవ్వకుంటే రిజిస్ట్రేషన్ జరుగకుండా చేస్తానని ఈవో ఆర్ డి భూమి యజమానులను బెదిరించారని అన్నారు. భూములు రిజిస్టర్ కాకుండా కలెక్టర్ ఏమైనా జీవో ఇచ్చారా అని జేసీ ప్రశ్నించారు.
మేడ్చల్ జిల్లా పీర్జాదిగూడలో షర్మిల నిరుద్యోగ దీక్ష ఇవాళ జరగనున్న సంగతి తెలిసిందే. ఆ ప్రదేశంలో కొంత మంది కూలీలు ఆందోళనకు దిగారు. షర్మిల చేపట్టనున్న దీక్షకు తమను తీసుకొచ్చి డబ్బు ఇవ్వట్లేదని వారు ఆరోపించారు. దీక్షలో కూర్చుంటే రూ.400 ఇస్తామని చెప్పి తమను పిలుచుకొని వచ్చారని, ఇప్పుడు ఆ డబ్బు ఇవ్వడం లేదని నిరసన చేశారు. ఇవాళ పీర్జాదిగూడలో షర్మిల చేపట్టబోయే నిరసన దీక్షకు పోలీసులు అనుమతి ఇవ్వని సంగతి తెలిసిందే.
గుంటూరు జిల్లా పెదనందిపాడు మండలం కొప్పర్రులో టీడీపీ నేత, జడ్పీటీసీ మాజీ సభ్యురాలు బత్తిని శారద ఇంటిపై వైసీపీ కార్యకర్తలు అర్ధరాత్రి రాళ్లతో దాడిచేశారు. ఇంట్లోకి ప్రవేశించి సామగ్రిని ధ్వంసం చేసి, ఇంట్లోని వస్తువులతోపాటు ఆరు బైకులపై పెట్రోలు పోసి నిప్పంటించినట్టు చెబుతున్నారు. వినాయక నిమజ్జనం సందర్భంగా గత అర్ధరాత్రి వైసీపీ, టీడీపీ వర్గాల మధ్య ఘర్షణ జరిగింది. ఆ తర్వాత రెచ్చిపోయిన వైసీపీ కార్యకర్తలు శారద ఇంటిపైకి దాడి దిగినట్టు తెలుస్తోంది. దాడి జరిగిన సమయంలో పోలీసులు అక్కడే ఉన్నా పట్టించుకోలేదని బాధితులు ఆరోపించారు. ఎలాంటి కారణం లేకుండానే తమ ఇంటిపై దాడికి దిగారని శారద ఆవేదన వ్యక్తం చేశారు. ఘటనా స్థలానికి చేరుకున్న పోలీసులు భారీగా మోహరించి పరిస్థితిని అదుపులోకి తీసుకొచ్చారు. ఈ మేరకు కేసు నమోదు చేసి దర్యాప్తు చేస్తున్నారు.
అనంతపురం జిల్లా పెనుకొండ అమ్మవారిపల్లి కియా కార్ల కంపెనీ వద్ద ఉద్యోగుల మధ్య ఘర్షణ తలెత్తిన విషయం ఆలస్యంగా వెలుగు చూసింది. ఉద్యోగులు రాడ్లతో కొట్టుకుంటున్న వీడియో సోషల్ మీడియాలో వైరల్ అయింది. కియా ప్రధాన ప్లాంటు దగ్గరలో హుండాయ్, ట్రాన్సిస్ కంపెనీ ఉద్యోగుల సీనియర్, జూనియర్ల మధ్య వివాదం తలెత్తడంతో ఒకరినొకరు రాడ్లతో కొట్టుకున్నారు. కియా ప్రధాన ప్లాంట్ పరిసరాల్లో జరిగిన ఘర్షణ ఎలాంటి వివాదానికి దారితీస్తుందోనని ఉద్యోగులు భయ బ్రాంతులకు గురవుతున్నారు.
ప్రముఖ పబ్లిసిటీ డిజైనర్ ఈశ్వర్ కన్నుమూశారు. చెన్నైలోని తన నివాసంలో మంగళవారం తెల్లవారుజామున తుదిశ్వాస విడిచారు. పబ్లిసిటీ డిజైనర్గా కెరీర్ ప్రారంభించిన ఆయన పలు చిత్రాలకు పోస్టర్లు తయారు చేసి.. అందరి మన్ననలు అందుకున్నారు.
ఎగుమతుల విషయంలో రాష్ట్రాన్ని అగ్రస్థానంలో నిలపడమే లక్ష్యంగా ‘వాణిజ్య ఉత్సవ్-2021’ పేరిట విజయవాడలో మంగళ, బుధ వారాల్లో సదస్సును ప్రభుత్వం నిర్వహిస్తోంది. చౌకగా ఎగుమతుల నిర్వహణకు రాష్ట్రంలో ఉన్న అవకాశాలను అంతర్జాతీయ ఎగుమతిదారులకు వివరించడమే వాణిజ్య ఉత్సవ్ లక్ష్యమని ప్రభుత్వం తెలిపింది. ఈ సమావేశాన్ని మంగళవారం ఉదయం విజయవాడలో సీఎం జగన్ ప్రారంభిస్తారు. దేశ, విదేశాలకు చెందిన రాయబారులు, పారిశ్రామికవేత్తలు, ఎగుమతిదారులు, విధాన రూపకర్తలు హాజరవుతారు. రాష్ట్ర ప్రభుత్వం, ప్లాస్టిక్ ఎక్స్పోర్ట్ ప్రమోషన్ కౌన్సిల్ ఆధ్వర్యంలో ఈ సదస్సు జరుగుతుంది.
ఆసిఫాబాద్ జిల్లా కాగజ్నగర్ మండల పరిధిలో కడంబ వద్ద బైక్పై వెళ్తున్న దంపతులపై గుర్తు తెలియని దుండగులు దాడి చేశారు. ఈ దాడిలో దంపతులకు తీవ్ర గాయాలయ్యాయి. భయపడ్డ దంపతులు బైక్ను అక్కడికక్కడే వదిలేసి అటవీ ప్రాంతంలోకి పారిపోయారు. ఈ విషయం గమనించిన వాహనదారులు.. పోలీసులకు సమాచారం అందించారు. ఘటనాస్థలానికి చేరుకున్న పోలీసులు బైక్ను స్వాధీనం చేసుకున్నారు. బైక్కు కొంచెం దూరంలో ఉన్న దంపతులను పోలీసులు గుర్తించారు. అనంతరం బాధిత దంపతులను చికిత్స నిమిత్తం ఆస్పత్రికి తరలించారు. దీనిపై విచారణ చేస్తున్నారు.
తూర్పు గోదావరి జిల్లా కాకినాడ రంగరాయ మెడికల్ కళాశాలలో మొదటి సంవత్సరం డిప్లమో అనస్తీషియా చదువుతున్న గుంపుల సుధారాణి అనే వైద్య విద్యార్థిని నిన్న రాత్రి హత్యకు గురైంది. పశ్చిమ గోదావరి జిల్లా తాడేపల్లిగూడెం రూరల్ చెందిన సుధారాణి, పెదపాడుకు చెందిన రాజు అనే వ్యక్తి ప్రేమించి పెళ్లి చేసుకున్నారు. వీరిద్దరూ కలిసి కాకినాడ ద్వారకా లాడ్జిలో దిగారు. నిన్న రాత్రి గొడవపడిన భర్త రాజు సుధారాణి కత్తితో పొడిచాడు. దీంతో ఆమె అక్కడికక్కడే మృతి చెందింది. ఆ తర్వాత రాజు ఏలూరు పోలీస్ స్టేషన్లో లొంగిపోయాడు. కాకినాడ టూ టౌన్ పోలీసులు కేసు నమోదు చేసి దర్యాప్తు చేస్తున్నారు.
అమెరికా అధ్యక్షుడు జో బైడెన్తో ప్రధాని మోదీ భేటీ ఖరారు అయింది. సెప్టెంబర్ 24 ఇరు దేశాధినేతలు వైట్ హౌస్లో భేటీ అవ్వనున్నారు. దీనికి సంబంధించి వైట్ హౌస్ సోమవారం ఒక ప్రకటన విడుదల చేసింది. మోదీ అమెరికా పర్యటన బుధవారం నుంచి ప్రారంభం కానుంది. బైడెన్తో సమావేశంలో ద్వైపాక్షిక అంశాలతో పాటు.. అఫ్గాన్ పరిస్థితులు, కొవిడ్-19 వ్యాక్సిన్ తదితర అంశాలు చర్చకు వచ్చే అవకాశం ఉంది. అమెరికా అధ్యక్షుడయ్యాక జో బైడెన్తో మోదీ తొలిసారి సమావేశం అవుతున్నారు.
గుంటూరు జిల్లా కొప్పర్రులో వినాయక నిమజ్జన కార్యక్రమంలో ఉద్రిక్తత చోటు చేసుకుంది. టీడీపీ మాజీ జడ్పీటీసీ ఇంటిపై పలువురు దాడికి పాల్పడి ఇంట్లో సామగ్రి, బైక్కు నిప్పు పెట్టారు. వినాయక విగ్రహాన్ని ఊరేగింపుగా తీసుకొస్తుండగా టీడీపీ-వైసీపీ కార్యకర్తల మధ్య ఘర్షణ చెలరేగింది. దీంతో వైసీపీ వర్గీయులు నిప్పు పెట్టినట్లు తెలుస్తోంది. ఉద్రిక్తత మధ్య పోలీసులు కొప్పర్రుకు పోలీసు బందోబస్తు పెంచారు.