Telangana BJP : తెలంగాణ ఎన్నికల కమిటీలను బీజేపీ హైకమాండ్ ప్రకటించింది. మొత్తం 14 కమిటీలను నియమించారు. మేనిఫెస్టో, పబ్లిసిటీ కమిటీ చైర్మన్‌గా వివేక్ వెంకటస్వామి, కన్వీనర్‌గా మహేశ్వర్ రెడ్డి, జాయింట్ కన్వీనర్‌గా కొండా విశ్వేశ్వర్ రెడ్డి.. స్క్రీనింగ్ కమిటీ చైర్మన్‌గా కోమటిరెడ్డి రాజగోపాల్ రెడ్డి, పబ్లిక్ మీటింగ్స్ ఇంఛార్జిగా బండి సంజయ్, ఛార్జ్ షీట్ కమిటీ చైర్మన్‌గా మురళీధర్ రావు, యాజిటేషన్ కమిటీ చైర్మన్‌గా విజయ శాంతిని నియమించినట్లుగా ప్రకటించారు. నేతలందరినీ కమిటీల్లో సర్దుబాటు చేసింది. దాదాపుగా అందరికీ తలా ఓ పదవి వచ్చేలా ఈ కమిటీలను సిద్ధం చేశారు. ఒకరకంగా అసంతృప్తులను కూల్ చేసేందుకు ఈ కమిటీల్లో వారికి కీలక పదవులిచ్చారు.
ఇటీవల పార్టీతో అంటీ ముట్టనట్టుగా ఉంటున్న కోమటిరెడ్డి రాజగోపాల్ రెడ్డికి ఏకంగా స్క్రీనింగ్ కమిటీ చైర్మన్ పదవి కట్టబెట్టారు. అభ్యర్థుల ఎంపికలో స్క్రీనింగ్ కమిటీది కీలక పాత్ర పోషిస్తుంది. ఇప్పటికే అభ్యర్థుల నుంచి దరఖాస్తులు స్వీకరించారు. ఈ దరఖాస్తులను వడపోసి అభ్యర్థులను ఖరారు చేయనున్నారు. రాజగోపాల్ రెడ్డి కొంత కాలంగా అసంతృృప్తిగా ఉన్నారు. ప్రధాని మోదీ రెండు బహిరంగసభలకూ హాజరు కాలేదు. ఆయన సోదరుడు వెంకటరెడ్డి ద్వారా కాంగ్రెస్ లో చేరి మళ్లీ మునుగోడు నుంచి పోటీ చేయాలనుకుంటున్నారన్న ప్రచారం జరుగుతోంది. ఈ క్రమంలో ఆయనకు అభ్యర్థులను ఖరారు చేసే స్క్రీనింగ్ కమిటీ పదవి ఇవ్వడం ఆసక్తికరంగా మారింది.
నిరసనలు, ఆందోళన నిర్వహణ బాధ్యతలకు సంబంధించి అజిటేషన్ కమిటీకి చైర్మన్ గా విజయశాంతిని నియమించారు. విజయశాంతి ఇటీవలి కాలంలో బీజేపీ అనే పేరు కూడా ప్రస్తావించకుండా సోషల్ మీడియాలో ప్రకటనలు చేస్తున్నారు. ఆమె కూడా అసంతృప్తిగానే ఉన్నారు. ఇక మేనిఫెస్టో, పబ్లిసిటీ కమిటీలకు చైర్మన్ గా గడ్డం వివేక్ వెంకటస్వామిని నియమించారు. వివేక్ కూడా అసంతృప్తిగా ఉన్నారని పార్టీ మారుతారన్న ప్రచారం జరుగుతోంది.
సీనియర్ నేతలకు కీలక బాధ్యతలు ఇచ్చారు. పబ్లిక్ మీటింగ్‌ కమిటీ ఇన్ ఛార్జ్ గా బండి సంజయ్.. ఛార్జ్ షీట్ కమిటీ చైర్మన్ గా మురళీధర్ రావుని నియమించారు. ప్రభావిత వ్యక్తులను కలిసే కమిటీ చైర్మన్ గా బీజేపీ జాతీయ ఉపాధ్యక్షురాలి పదవిలో ఉన్న డీకే అరుణను నియమించారు. ఎన్నికల కమిటీ చైర్మన్ గా మర్రి శశిధర్ రెడ్డి, సోషల్ మీడియా కమిటీ చైర్మన్ గా ధర్మపురి అర్వింద్‌ లకు అధిష్టానం బాధ్యతలు కేటాయించింది. మొత్తం 14కమిటీలను ఈరోజు బీజేపీ ప్రకటించింది. తెలంగాణను ఆరు జోన్లుగా విభజించి, ఎన్నికల వ్యూహాలు అమలు చేయాలని బీజేపీ భావిస్తోంది. సునీల్‌ బన్సల్‌ అధ్యక్షతన ఈరోజు, రేపు సంస్థాగత కార్యక్రమాలు జరగబోతున్నాయి. జిల్లా పార్టీ అధ్యక్షులు, జిల్లా ఇన్ ఛార్జిలు, రాష్ట్ర పదాధికారులందరూ ఈ కార్యక్రమాల్లో పాల్గొంటారు. లోక్ సభ, అసెంబ్లీ నియోజకవర్గాల వారీగా బహిరంగ సభలకు తెలంగాణ బీజేపీ కసరత్తులు చేస్తోంది.