Breaking News Live: ఓటీఎస్ పై ఎమ్మెల్యే రోజాకు నిలదీసిన స్థానికులు
ఏపీ, తెలంగాణ సహా జాతీయ, అంతర్జాతీయ స్థాయిలో నేటి బ్రేకింగ్ న్యూస్ అప్‌డేట్స్ ఇక్కడ పొందొచ్చు. ఈ పేజీ అప్ డేట్ అవుతుంటుంది. తాజా సమాచారం కోసం రీఫ్రెష్ చేస్తుండండి.
చిత్తూరు జిల్లా నగిరి నియోజకవర్గంలో ఎమ్మెల్యే రోజాకు చేదు అనుభవం ఎదురైంది. నిండ్ర మండలం అగరం పేటలో మీతో మీ ఎమ్మెల్యే కార్యక్రమంలో ఎమ్మెల్యే రోజాను ఓటీఎస్ పై స్థానిక లబ్ధిదారులు నిలదీశారు. మేము గతంలో ఎప్పుడో నిర్మించుకున్న ఇంటికి ఎందుకు పది వేలు చెల్లించాలని ఎమ్మెల్యే రోజాను లబ్ధిదారురాలు అడుగగా మీరు పది వేలు చెల్లిస్తే ఇల్లు మీ సొంతం అవుతుందని తెలిపారు. మీరు ఎవరికైనా అమ్ముకోవచ్చు, బ్యాంకులో మీరు అర్హులవుతారు ఆ ఇంటి పై సర్వ హక్కులు మీకు లభిస్తాయి అంటూ తమిళంలో నగిరి ఎమ్మెల్యే రోజా లబ్ధిదారులకు సమాధానమిచ్చారు.
ఏపీ హైకోర్టులో ఉద్యోగాల పేరిట నకిలీ కాల్ లెటర్స్ పై తుళ్లూరు పోలీస్ స్టేషన్ లో హైకోర్టు డిప్యూటీ ఎస్ఓ ప్రసాద్ రావు ఫిర్యాదు చేశారు. ఈ ఫిర్యాదుతో పోలీసులు కేసు నమోదు చేసి దర్యాప్తు చేస్తున్నారు.
నిజామాబాద్ జిల్లా వర్ని మండలం సిద్దాపూర్ రిజర్వాయర్ శంకుస్థాపనకు వచ్చిన మంత్రి కేటీఆర్ ను అడ్డుకొనేందుకు స్థానిక బీజేపీ నేతలు ప్రయత్నించారు. దీంతో బీజేపీ నాయకులను పోలీసులు నిలువరించారు. బీజేపీ నేతలు కేటీఆర్ కాన్వాయ్ వైపు వెళ్ళేందుకు ప్రయత్నించారు. వెంటనే అప్రమత్తమైన పోలీసులు ఆందోళనకారులను అడ్డుకున్నారు. కాసేపు అక్కడ ఉద్రిక్త వాతావరణం నెలకొంది.
నిజామాబాద్ జిల్లా పర్యటనలో ఉన్న మంత్రి కేటీఆర్ సంచలన వ్యాఖ్యలు చేశారు. మోదీకి మరోసారి అవకాశం కల్పిస్తే మళ్లీ ఏపీలో తెలంగాణను కలిపేస్తారని వ్యాఖ్యనించారు. తెలంగాణ పుట్టుకను మోదీ ప్రశ్నిస్తున్నారని అన్నారు. తెలంగాణను మళ్లీ ఏపీలో కలిసే ప్రయత్నం జరుగుతోందని అనుమానం వ్యక్తం చేశారు. సిద్దాపూర్‌లో ఏర్పాటు చేసిన బహిరంగ సభలో కేటీఆర్ ఈ మేరకు వ్యాఖ్యలు చేశారు.
అస్సాం ముఖ్యమంత్రి హిమంత బిస్వ శర్మపై వెంటనే క్రిమినల్ కేసు నమోదు చేయాలని డిమాండ్ చేస్తూ హైదరాబాద్ పోలీసు కమిషనరేట్ ముట్టడికి తెలంగాణ NSUI యత్నించింది. కాంగ్రెస్ పార్టీ అగ్రనేత, ఏఐసిసి మాజీ అధ్యక్షులు రాహుల్ గాంధీపై అనుచిత వ్యాఖ్యలు చేసిన హిమంత బిస్వ శర్మ పై తెలంగాణ లోని అన్ని పోలీసు స్టేషన్స్ లో ఫిర్యాదు చేయగా పోలిసులు చర్యలు తీసుకోకపోవడాన్ని నిరసిస్తూ టీపీసీసీ అధ్యక్షులు రేవంత్ రెడ్డి ఆదేశాల మేరకు NSUI రాష్ట్ర అధ్యక్షులు వెంకట్ బల్మూర్ అధ్వర్యంలో హైదరాబాద్ బషీర్ బాగ్ లోని సిటీ పోలీస్ కమిషనరేట్ ముట్టడికి యత్నించారు. ముట్టడికి యత్నించిన NSUI నాయకులను పోలీసులు అదుపులోకి తీసుకొని నారాయణగూడ పోలీస్ స్టేషన్ కి తరలించారు. రాహుల్ గాంధీపైన అనుచిత వ్యాఖ్యలు చేసిన అస్సాం సీఎంపై వెంటనే క్రిమినల్ కేసు నమోదు చెయ్యాలని, లేని పక్షంలో NSUI ఆధ్వర్యంలో ఉద్యమాన్ని ఉదృతం చేస్తామని తెలిపారు.
MLC Kavitha To Vist Tirumala: కలియుగ దైవం తిరుమల శ్రీ వెంకటేశ్వర స్వామి వారిని ఎమ్మెల్సీ కవిత దర్శించుకోనున్నారు. తెలంగాణ ముఖ్యమంత్రి కేసీఆర్ జన్మదినం పురస్కరించుకొని మధ్యాహ్నం కాలినడకన కవిత తిరుమలకు వెళ్లనున్నారు. రేపు మధ్యాహ్నం మెట్ల మార్గంలో కొబ్బరికాయ కొట్టి నడక ప్రారంభించి, సాయంత్రానికి కొండ మీదకు చేరుకుంటారని సమాచారం.
బీజేపీలో యువ తెలంగాణ పార్టీ విలీనం అయింది. బుధవారం ఉదయం ఆ పార్టీ అధ్యక్షులు జిట్టా బాలకృష్ణా రెడ్డి, రాణి రుద్రమ యువ తెలంగాణను బీజేపీలో విలీనం చేశారు. ఢిల్లీ కాన్‌స్టిట్యూషన్ క్లబ్‌లో బీజేపీ జాతీయ ప్రధాన కార్యదర్శి వినోద్ తవ్డే, రాష్ట్ర అధ్యక్షుడు బండి సంజయ్ సమక్షంలో యువ తెలంగాణ పార్టీ విలీనం జరిగింది. ఈ సందర్భంగా జిట్టా బాలకృష్ణా రెడ్డి, రాణి రుద్రమ సహా పలువురు నేతలు బీజేపీ కండువా కప్పుకున్నారు.
కర్నూలు జిల్లా: ఎమ్మిగనూరు సోమప్ప కూడలిలో ఉద్రిక్తత చోటుచేసుకుంది.
* కర్నూలు లో రేపు జరుగు PFI ఆవిర్భావ సభకు అనుమతి ఇవ్వాలంటూ ధర్నా, రాస్తారోకో
* PFI నాయకులకు, పోలిసులకు మధ్య వాగ్వాదం..
* PFI నాయకులను అరెస్ట్ చేసి పీఎస్ కు తరలించిన పోలీసులు
ముఖ్యమంత్రి కేసీఆర్ ముంబయి పర్యటన తేదీ ఖరారైంది. ఈ నెల 20న ఆయన ముంబయికి వెళ్లనున్నారు. మహారాష్ట్ర ముఖ్యమంత్రి ఉద్ధవ్ ఠాక్రేతో కేసీఆర్ సమావేశం కానున్నారు. ఇటీవల ప్రెస్ మీట్‌లో త్వరలో తాను ముంబయి వెళ్లి ఆ రాష్ట్ర ముఖ్యమంత్రిని కలుస్తానని చెప్పిన సంగతి తెలిసిందే. బీజేపీకి ప్రత్యామ్నాయంగా దేశంలోని ఇతర పార్టీలతో కూటమిని ఏర్పాటు చేయడంలో తాను కీలక పాత్ర పోషిస్తానని కేసీఆర్ ఆ సందర్భంగా తెలిపారు.
కాంగ్రెస్ యువనేత రాహుల్ గాంధీపై అసోం ముఖ్యమంత్రి హిమంత బిశ్వశర్మ చేసిన అనుచిత వ్యాఖ్యలపై కేసు నమోదు చేయడంలో జాప్యం చేస్తున్నారంటూ రాష్ట్ర వ్యాప్తంగా కాంగ్రెస్ పార్టీ ఇచ్చిన జిల్లాల పోలీసు ప్రధాన కార్యాలయాల ముట్టడి కొరకు బయలుదేరడానికి సిద్ధమవుతున్న సీనియర్ నేత, ఎమ్మెల్సీ జీవన్ రెడ్డిని పోలీసులు హౌస్ అరెస్ట్ చేశారు. ఈ సందర్భంగా ఆయన మాట్లాడుతూ కేసీఆర్ ఈ విషయంలో చాలా తెలివిగా వ్యవహరిస్తున్నారని.. దేశ వ్యాప్తంగా ప్రజల్లో అసోం ముఖ్యమంత్రిపై నెలకొన్న ఆగ్రహన్ని తనకు అనుకూలంగా మల్చుకునేందుకు టాపిక్ ని తమ వైపు మలచి కాంగ్రెస్ కి, తమ నేత రాహుల్ గాంధీకి మద్దతు ఇస్తున్నట్లుగా నటిస్తున్నారని అన్నారు.
* అస్సాం సీఎంపై కాంగ్రెస్ నేతల ఫిర్యాదు మేరకు పోలీసులు, ప్రభుత్వం స్పందించనందుకు నిరసనగా ముట్టడికి పిలుపునిచ్చిన తెలంగాణ కాంగ్రెస్
* హైదరాబాద్ కమిషనరేట్ ముందు రేవంత్ రెడ్డి ధర్నా నేడు
* రాచకొండ కమిషనరేట్ ముందు కోమటిరెడ్డి వెంకటరెడ్డి ధర్నా
* తెలంగాణ రాష్ట్ర వ్యాప్తంగా అన్ని జిల్లాల ఎస్పీ ఆఫీసుల ముందు కాంగ్రెస్ నేతల నిరసన
* ధర్నా నేపథ్యంలో కోమటిరెడ్డి, రేవంత్ రెడ్డి ఇంటి ముందు మోహరించిన పోలీసులు
కాంగ్రెస్ యువనేత రాహుల్ గాంధీపై అస్సాం ముఖ్యమంత్రి హిమంత బిశ్వశర్మ చేసిన అనుచిత వ్యాఖ్యలపై కేసు నమోదు చేయడంలో జాప్యం చేస్తున్నారంటూ రాష్ట్ర వ్యాప్తంగా కాంగ్రెస్ పార్టీ ఇచ్చిన జిల్లాల పోలీసు ప్రధాన కార్యాలయాల ముట్టడి కొరకు బయలుదేరడానికి సిద్ధమవుతున్న సీనియర్ నేత, ఎమ్మెల్సీ జీవన్ రెడ్డిని పోలీసులు అరెస్ట్ చేశారు. ఉదయాన్నే భారీ బందోబస్తు నడుమ జీవన్ రెడ్డి నివాసానికి చేరుకున్న పోలీసులు తనతో మాట్లాడి బయటకు వెళ్లకుండా దిగ్బంధం చేశారు. మరోవైపు, జిల్లా నాయకులు, కార్యకర్తలను కూడా ఎక్కడికక్కడ అరెస్టులు చేసి పట్టణ పోలీస్ స్టేషన్ కి తరలించారు.
ప్రముఖ సంగీత దర్శకుడు బప్పిలహరి కన్నుమూశారు. బుధవారం ఉదయం అనారోగ్యంతో ఆయన చనిపోయారు. తెలుగులో సింహాసనం, గ్యాంగ్ లీడర్, స్టేట్ రౌడీ తెలుగు సినిమాలకు బప్పిలహరి సంగీతం అందించారు. ప్రస్తుతం బప్పిలహరి వయసు 69 ఏళ్లు. ఈయన గత ఏడాది ఏప్రిల్‌లో కరోనా బారిన పడ్డారు. అప్పటి నుంచి మంచానికే పరిమితమైన బప్పిలహరి జుహూలోని తన స్వగృహంలో వీల్ ఛైర్‌‌కే పరిమితం అయ్యారు. బప్పిలహరి గత కొన్నాళ్లుగా తీవ్ర అనారోగ్యంతో బాధపడుతూ చికిత్స పొందుతూ బుధవారం కన్నుమూశారు. ఆయన మృతి పట్ల బాలీవుడ్ ప్రముఖ నటీనటులు సంతాపం తెలిపారు.
Background
భూమి ఉపరితల ఉష్ణోగ్రతలు క్రమంగా పెరుగుతున్న కారణంగా గత 30 సంవత్సరాలుగా సముద్రపు వేడిగాలులు అధికమయ్యాయి. ముఖ్యంగా కోస్తా ఆంధ్ర ప్రాంతాల్లో దీని ప్రభావం ఉంటుంది. నేడు తెలంగాణ, ఆంధ్రప్రదేశ్ రాష్ట్రాలకు ఎలాంటి వర్ష సూచన లేదు. దాంతో వాతావరణంలో స్వల్ప మార్పులు చోటుచేసుకుంటున్నాయి. మరోవైపు ఈశాన్య, తూర్పు దిశల నుంచి గాలులు ఏపీలో తక్కువ ఎత్తులో వేగంగా వీస్తున్నాయి. దీని ఫలితంగా ఏపీ మరో రెండు రోజులపాటు వాతావరణం పొడిగా ఉంటుంది.
ఏపీలోని కోస్తాంధ్రలో వాతావరణం కాస్త వేడెక్కుతుందని అమరావతి వాతావరణ కేంద్రం తెలిపింది. ఉత్తర కోస్తాంధ్ర, యానాంలో నేడు వాతావరణం పొడిగా ఉంటుంది. కళింగపట్నంలో కనిష్ట ఉష్ణోగ్రత క్రమంగా పెరుగుతోంది. నందిగామ, తుని, బాపట్ల, అమరావతి, విశాఖపట్నం ప్రాంతాల్లో చలి తీవ్రత కాస్త తగ్గుముఖం పడుతుందని వాతావరణ కేంద్రం అధికారులు అంచనా వేశారు. రాయలసీమ, తెలంగాణ ప్రాంతాల్లో చలి ప్రభావం ఒకట్రెండు రోజుల్లో తగ్గనుంది. మత్స్యకారులు వేటకు వెళ్లడానికి ఏ ఆంక్షలు లేవని వాతావరణ కేంద్రం పేర్కొంది. శ్రీకాకుళం, విజయనగరం, విశాఖపట్నం జిల్లాల్లో వేడి గాలు వీచే అవకాశం ఉంది.
దక్షిణ కోస్తాంధ్ర, రాయలసీమలో వాతావరణం పొడిగా ఉండనుంది. కనిష్ట ఉష్ణోగ్రతలు పెరుగుతాయని అమరావతి వాతావరణ కేంత్రం తెలిపింది. కొన్ని రోజుల కిందటి వరకు విశాఖ ఏజెన్సీ ఏరియాల కన్నా తక్కువ రాత్రిపూట ఉష్ణోగ్రతలు సీమలో నమోదయ్యాయి. ఆరోగ్యవరంలో, అనంతపురం, నంద్యాల, కర్నూలు, తిరుపతి ప్రాంతాల్లో వాతావరణంలో స్వల్ప మార్పులు చోటు చేసుకోనున్నాయి.
తెలంగాణలో తగ్గుతున్న చలి
తెలంగాణలో ఆకాశం పాక్షింగా మేఘాలతో కనిపిస్తుందని హైదరాబాద్ వాతావరణ కేంద్రం తెలిపింది. రాష్ట్రంలో కనిష్ట ఉష్ణోగ్రతలు పెరుగుతున్నాయి. రెండు రోజుల కిందటి వరకు కనిష్ట ఉష్ణోగ్రత 16 డిగ్రీల వరకు నమోదయ్యేవి. నిన్న కనిష్ట ఉష్ణోగ్రత 19 డిగ్రీలుగా నమోదైనట్లు వాతావరణ కేంద్రం పేర్కొంది. దక్షిణ, ఆగ్నేయ దిశల నుంచి గాలులు గంటలకు 6 నుంచి 8 కిలోమీటర్ల వేగంతో వీస్తున్నాయి. గరిష్ట ఉష్ణోగ్రత 31.6 డిగ్రీల మేర నమోదైంది.
బంగారం, వెండి ధరలు
తెలుగు రాష్ట్రాల్లో బంగారం ధర వరుసగా నేడు పెరిగింది. గ్రాముకు రూ.10 చొప్పున పెరిగింది. వెండి ధర మాత్రం నేడు తగ్గింది. తాజాగా 22 క్యారెట్ల 10 గ్రాముల (తులం) బంగారం ధర, ఇవాళ హైదరాబాద్ మార్కెట్‌లో రూ.46,400 గా ఉంది. 24 క్యారెట్ల ప్యూర్ బంగారం ధర ప్రస్తుతం రూ.50,620 గా ఉంది. ఇక స్వచ్ఛమైన వెండి ధర హైదరాబాద్ మార్కెట్‌లో కిలోకు రూ.68,200గా నిలకడగా ఉంది. తెలంగాణ వ్యాప్తంగా మిగతా నగరాల్లోనూ ఇవే ధరలు అమల్లో ఉంటున్నాయి.
ఇక విశాఖపట్నం మార్కెట్‌లోనూ 22 క్యారెట్ల బంగారం ధర రూ.46,400 గా ఉండగా.. 24 క్యారెట్ల బంగారం ధర రూ.50,620గా ఉంది. ఇక్కడ వెండి ధర హైదరాబాద్ తరహాలోనే కిలో రూ.68,200 గా ఉంది. విజయవాడలోనూ పసిడి ధర పెరిగింది. 22 క్యారెట్ల ఆర్నమెంటు బంగారం ధర నేడు రూ.46,400 గా ఉంది. 24 క్యారెట్ల బిస్కెట్ బంగారం ధర రూ.50,620గా ఉంది. ఇక్కడ కిలో వెండి ధర రూ.68,200గా ఉంది.
- - - - - - - - - Advertisement - - - - - - - - -