Singareni: పర్యావరణహిత చర్యల్లో భాగంగా సింగరేణి కీలక నిర్ణయం తీసుకుంది. దేశంలోనే తొలిసారిగా సౌరవిద్యుత్ తో హైడ్రోజన్ ను ఉత్పత్తి చేసేందుకు ఏర్పాట్లు చేస్తోంది. మంచిర్యాల జిల్లా జైపూర్ లో సింగరేణి సంస్థకు ఉన్న 1200 మెగావాట్ల థర్మల్ విద్యుత్ ఉత్పత్తి కేంద్రంలో ఉన్న హైడ్రోజన్ ఉత్పత్తి కేంద్రాన్ని గ్రీన్ హైడ్రోజన్ కేంద్రంగా మార్చాలని సింగరేణి నిర్ణయించింది. రామగుండం ప్రాంతంలో కూడా మరో గ్రీన్ హైడ్రోజన్ ప్లాంట్ ను కొత్తగా నిర్మించాలని సింగరేణి సంస్థ బుధవారం నిర్ణయం తీసుకుంది.
థర్మల్ విద్యుత్ కేంద్రాల్లోని జనరేటర్లలో వేడిని తగ్గించడానికి శీతలీకరణ ధాతువుగా హైడ్రోజన్ ను వాడుతుంటారు. ఈ మేరకు జైపూర్ లోని థర్మల్ విద్యుత్ కేంద్రం ఆవరణలోనే ఒక హైడ్రోజన్ ప్లాంట్ ను గతంలో నిర్మించింది సింగరేణి. ఈ కేంద్రంలో సంవత్సరానికి 10 వేల క్యూబిక్ మీటర్ల హైడ్రోజన్ ఉత్పత్తి అవుతుంది. ఇందుకోసం 100 కిలోవాట్ల విద్యుత్తును వినియోగిస్తున్నారు. పర్యావరణహిత చర్యగా ఈ ప్లాంటు నిర్వహణకు ఇకపై సౌర విద్యుత్ ను వాడుకోనున్నారు. ఇలా సౌర విద్యుత్ ను వాడుకుని ఉత్పత్తి చేసే హైడ్రోజన్ ను గ్రీన్ హైడ్రోజన్ గా పిలుస్తారు. కొత్త ప్లాంటులో ఉత్పత్తి అయ్యే గ్రీన్ హైడ్రోజన్ ను సమీపంలోని ఇతర కర్మాగారాలకు కూడా విక్రయిస్తామని సంస్థ డైరెక్టర్ డి. సత్యనారాయణ రావు తెలిపారు.
ఇందులో భాగంగా సింగరేణి థర్మల్ విద్యుత్ కేంద్ర ఆవరణలోనే ప్రస్తుతం 10 మెగావాట్ల సోలార్ విద్యుత్ కేంద్రం, 5 మెగావాట్ల ఫ్లోటింగ్ సోలార్ ప్లాంట్ నుంచి ఉత్పత్తి అయ్యే కరెంట్ ను ప్రస్తుత హైడ్రోజన్ ప్లాంట్ కు వినియోగించుకునేందుకు చర్యలు తీసుకోవాలని బుధవారం ఎలక్ట్రిసిటీ డిపార్ట్‌మెంట్ అధికారులను సీఎండీ శ్రీధర్ ఆదేశించారు.
ఎస్టీపీపీలోని హైడ్రోజన్ ప్లాంట్ ను గ్రీన్ హైడ్రోజన్ ప్లాంట్ గా మార్చడంతో పాటు సొంతంగా రామగుండం రీజియన్ లో మరో గ్రీన్ హైడ్రోజన్ ప్లాంట్ ఏర్పాటుకు అవకాశాలు పరిశీలించి నివేదిక ఇవ్వాలని ఎలక్ట్రిసిటీ డిపార్ట్‌మెంట్ అధికారులను సీఎండీ ఆదేశించారు. గ్రీన్ హైడ్రోజన్ ప్లాంట్ నుంచి ఉత్పత్తి అయ్యే హైడ్రోజన్ వాయువును సింగరేణి, దాని సమీపంలోని ఎరువుల ఫ్యాక్టరీలతో పాటు ఇతర కర్మాగారాలకు విక్రయించే అవకాశం ఉంది. లాభాల కన్నా ఒక మంచి పర్యావరణహిత చర్యగా ఈ ప్రాజెక్టు చేపట్టాలని సింగరేణి భావిస్తోంది.
సింగరేణి వ్యాప్తంగా ప్రస్తుతం 224 మెగావాట్ల సోలార్ ప్లాంట్లను నడుపుతోంది. ఈ ప్లాంట్ల ద్వారా ఈ ఆర్థిక సంవత్సరం తొలి ఆరు నెలల్లో 170 మిలియన్ యూనిట్ల విద్యుత్ ను ఉత్పత్తి చేసినట్లు సీఎండీ ఎన్. శ్రీధర్ తెలిపారు. సోలార్ పవర్ ఉత్పత్తితో సింగరేణి సంస్థ తెలంగాణ ట్రాన్స్‌కోకు చెల్లించే విద్యుత్ బిల్లులో రూ. 108 కోట్లు ఆదా చేసుకోగలిగిందని పేర్కొన్నారు. నిర్మాణంలో ఉన్న 76 మెగావాట్ల సోలార్ ప్లాంట్లను డిసెంబర్ నాటికల్లా పూర్తి చేయాలని ఆదేశించారు. రివ్యూ మీటింగ్ లో సింగరేణి డైరెక్టర్ డి. సత్యనారాయణ, జైపూర్ సింగరేణి థర్మల్ పవర్ ప్లాంట్ సీటీసీ సంజయ్ కుమార్ సూర్, చీఫ్ ఓ అండ్ ఎం జేఎన్ సింగ్, ఎస్టీపీపీ జీఎం చినబసివి రెడ్డి, సోలార్ మేనేజర్ జానకీరాం, చీఫ్ ఆఫ్ పవర్ ఎన్వీకే రాజు, జీఎం సూర్య నారాయణ, ఏజీఎం ప్రసాద్, ఏజీఎం (ఎఫ్ అండ్ ఏ) సుధాకర్ సహా ఇతరులు పాల్గొన్నారు.