Nature Index Rank: హైదరాబాద్ కేంద్రీయ విశ్వవిద్యాలయం నేషనల్ ఇండెక్స్ ర్యాంకు (Nature Index Rank)ల్లో జాతీయ స్థాయిలో ప్రథమ స్థానాన్ని దక్కించుకొని సత్తా చాటింది. దేశంలో యూనివర్సిటీల కేటగిరీలో University of Hyderabad తొలి స్థానాన్ని సంపాదించుకుంది. మొత్తం మీద 16వ స్థానం సాధించింది. 72 పరిశోధన పత్రాల సంఖ్య, 19.46 షేర్ తో ఆ స్థానం దక్కించుకున్నట్లు వర్సిటీ ఉపకులపతి ప్రొఫెసర్ బీజే రావు తెలిపారు. ఏప్రిల్ 1వ తేదీ 2021 సంవత్సరం నుండి 31వ తేదీ మార్చి 2022 వరకు తీసుకున్న సమాచారం ఆధారంగా ఈ ర్యాంకులు కేటాయించారు. కెమిస్ట్రీ, లైఫ్ సైన్సెస్, ఎర్త్ & ఎన్విరాన్మెంట్ సైన్సెస్ అలాగే ఫిజికల్ సైన్సెస్ లో ప్రచురితమైన పరిశోధన ఆర్టికల్స్ ఆధారంగా నేచర్ ఇండెక్స్ ర్యాంక్ సర్వే జరిగింది. 


తెలుగు రాష్ట్రాల నుంచి పలు విద్యా సంస్థలు.. 
ఈ ర్యాంకుల్లో బెంగళూరులోని ఇండియన్ ఇన్ స్టిట్యూట్ ఆఫ్ సైన్స్ తొలి స్థానంలో నిలిచింది. ఈ సంస్థ ఆచార్యులకు చెందిన 194 పరిశోధన పత్రాలు నేచర్ జర్నల్ లో ప్రచురితం అయ్యాయి. తెలుగు రాష్ట్రాల నుంచి పలు విద్యా సంస్థలు కూడా నేషనల్ ఇండెక్స్ ర్యాంకులో చోటు దక్కించుకున్నాయి. ఐఐటీ హైదరాబాద్ కు 23వ ర్యాంకు, ఐసెర్ తిరుపతికి 26వ ర్యాంకు, అమిటీ యూనివర్సిటీకి 54వ ర్యాంకు, నైపర్ హైదరాబాద్ కు 76వ ర్యాంకు, ట్రిపుల్ ఐటీ హైదరాబాద్ కు 82వ ర్యాంకు, ఆంధ్రా యూనివర్సిటీకి 92వ ర్యాంకు, జేఎన్టీయూ కాకినాడకు 108వ ర్యాంకు, ఐఐటీ తిరుపతికి 122వ ర్యాంకు వచ్చింది. 


ఉన్నత విద్య, పరిశోధనలకు.. 
హైదరాబాద్ విశ్వవిద్యాలయాన్ని భారత పార్లమెంట్ చట్టం ద్వారా కేంద్ర విశ్వ విద్యాలయంగా మార్చారు. ఆ తర్వాత హైదరాబాద్ విశ్వ విద్యాలయంగా నామకరణం చేశారు. అయితే ఉన్నత విద్యకు, పరిశోధనలకు ఈ విశ్వ విద్యాలయం దేశంలోనే అత్యున్నత విద్యా సంస్థగా ఎదిగింది. వేలాది మంది ఇక్కడ చదువుకొని ఉన్నత స్థానాల్లో కొలువులు చేస్తున్నారు. ఉన్నత విద్య, పరిశోధనలకు హెచ్ సీయూ పెట్టింది పేరు. 2012వ సంవత్సరంలో ఇండియన్ ఇన్ స్టిట్యూట్ అండ్ టెక్నాలజీలో దేశంలోనే ఏడవ ర్యాంకు సాధించింది. 


ప్రశంసా పత్రంతో పాటు లక్ష రూపాయల నగదు.. 
అంతే కాదండోయ్ ఉన్నత విద్యలో అత్యుత్తమ ఫలితాలను సాధించేలా కేంద్రీయ విశ్వవిద్యాలయాలను ప్రోత్సహించేందుకు అప్పటి రాష్ట్రపతి ప్రణబ్ ముఖర్జీ.. విజిటర్స్ అవార్డులను నెలకొల్పారు. దేశంలోని ఉత్తమ వర్సిటీలతో పాటు నూతన ఆవిష్కరణలకు సంబంధించి ఈ విజిటర్స్ అవార్డులను ప్రదానం చేసేవారు. ఉత్తమ వర్సిటీకి ప్రశంసా పత్రంతో పాటు పరిశోధనలకు లక్ష రూపాయల చొప్పున నగదును అందజేస్తారు. హెచ్‌సీయూలో రతన్ టాటా ఆధ్వర్యంలో రంగస్థల కళల శాఖకు సంబంధించి థియేటర్ ఔట్ రీచ్ యూనిట్ ను నెలకొల్పారు. అలాగే ఇక్కడ ఇందిరా గాంధీ స్మారక గ్రంథాలయాన్ని 1988 అక్టోబర్ 21 నుంచి ప్రారంభించారు. ఈ రెండూ అక్కడ చదువుకునే విద్యార్థులకు ఎంతగానో ఉపయోగపడుతున్నాయి. ఇక్కడ చదివిన విద్యార్థులు పలు రంగాలలో కీలక పదవులలో కొనసాగుతున్నారు.