తెలంగాణలో భజరంగ్‌దళ్‌ను నిషేధించేందుకు కేసీఆర్ కుట్ర చేస్తున్నారని బీజేపీ రాష్ట్ర అధ్యక్షుడు బండి సంజయ్ సంచలన వ్యాఖ్యలు చేశారు. భజరంగ్‌ దళ్‌ను నిషేధించడంలో కాంగ్రెస్‌తో కేసీఆర్ పోటీ పడుతున్నారని మాట్లాడారు. కేసీఆర్ కుట్రను తిప్పికొట్టటానికి హిందువులంతా ఒక్కటి కావాలని పిలుపు ఇచ్చారు. గురువారం బీజేపీ ఓబీసీ సమ్మేళనం జరిగింది. ఈ సభలో మాట్లాడిన ఆయన ఈ వ్యాఖ్యలు చేశారు. రూ.1600 కోట్లతో కొత్త సచివాలయం కట్టిన సీఎం కేసీఆర్, బీసీల ఆత్మగౌరవ భవనం ఎందుకు నిర్మించటడం లేదని ప్రశ్నించారు.
కర్ణాటక ఎన్నికల ఫలితాల ప్రభావం తెలంగాణ రాష్ట్రంలో అంతగా ఉండబోదని స్పష్టం చేశారు. దళిత బంధులో 30 శాతం కమీషన్‌ను మంత్రులు, ఎమ్మెల్యేలు తీసుకుంటున్నారని విమర్శించారు. 30 శాతం కమీషన్‌పై చర్యలు ఎందుకు తీసుకోవడం లేదో కేసీఆర్ చెప్పాలని డిమాండ్ చేశారు. బీఆర్ఎస్, కాంగ్రెస్‌ పార్టీలు బీసీలను ఓటు బ్యాంకుగా మాత్రమే చూశాయని అన్నారు. వెనకబడిన వర్గాలకు చెందిన తనకు రాష్ట్ర అధ్యక్షుడిగా బీజేపీ అవకాశం ఇచ్చిందని చెప్పారు. పాతబస్తీ ప్రజలకు రోడ్లు, ఉద్యోగాలు ఎందుకు ఇవ్వటం లేదని బండి సంజయ్ ప్రశ్నించారు.
బీసీలకు గొర్రెలు, బర్రెలు ఇవ్వటం వెనుక కుట్ర దాగుందని ఆరోపించారు. బీసీ బంధు ప్రకటించటానికి కేసీఆర్‌కు ఇబ్బంది ఏంటో కేసీఆర్ చెప్పాలని డిమాండ్ చేశారు. త్వరలో హైదరాబాద్ వేదికగా లక్షల మందితో బీసీ శంఖారావ సభ నిర్వహిస్తామని చెప్పారు. రామ రాజ్యం కోసం ఐదు నెలల సమయం ఇవ్వాలని క్యాడర్‌కు బండి సంజయ్ పిలుపు ఇచ్చారు. కేసీఆర్ క్యాబినెట్‌లో ముగ్గురు మాత్రమే బీసీ మంత్రులు ఉన్నారని, కేసీఆర్ కుటుంబానికి మాత్రం నాలుగు మంత్రి పదవులు ఎందుకు అని ప్రశ్నించారు. కేసీఆర్ ప్రభుత్వం రిజర్వేషన్లు తగ్గించి బీసీల పొట్ట కొట్టిందని విమర్శలు చేశారు.