TRS MLAs Buying Case: టీఆర్ఎస్ ఎమ్మెల్యేల (TRS MLA) కొనుగోలు కేసులో కీలక పరిణామం చోటు చేసుకుంది. అరెస్టు అయిన ముగ్గురు నిందితులను కోర్టులో ప్రవేశపెట్టగా, ఏసీబీ న్యాయమూర్తి రిమాండ్ రిజక్ట్ చేశారు. అందుకు సరైన ఆధారాలు లేవని న్యాయమూర్తి అన్నారు. ప్రివెన్షన్ ఆఫ్ కరెప్షన్ PC యాక్ట్ అనేది ఈ కేసులో వర్తించదని అన్నారు. బ్రైబ్ ఇవ్వబోయిన నగదు లేక పోవటంతో ఏసీబీ న్యాయమూర్తి రిమాండ్ తోసిపుచ్చారు. 41 సీఆర్పీసీ నోటీస్ ఇచ్చి విచారణ చేయాలని న్యాయమూర్తి చెప్పారు.


ఈ వ్యవహారంలో పట్టుబడ్డ నిందితులు రామచంద్ర భారతి, సింహయాజి, నంద కుమార్‌లను పోలీసులు గురువారం (అక్టోబరు 27) రాత్రి సరూర్‌నగర్‌లోని న్యాయమూర్తి జి.రాజ గోపాల్‌ ఇంటికి తీసుకెళ్లి ఆయన ఎదుట హాజరుపరిచారు. లంచం సొమ్ము దొరకనందున ఈ కేసుకు అవినీతి నిరోధక చట్టం వర్తించదని న్యాయమూర్తి చెప్పారు. న్యాయమూర్తి ఆదేశాలతో నిందితులను వదిలి పెట్టామని శంషాబాద్‌ డీసీపీ జగదీశ్వర్‌ రెడ్డి చెప్పారు.


పూజల కోసమే వెళ్లాం - నందకుమార్


పూజకోసమే వెళ్లామని పైలట్‌ రోహిత్‌ రెడ్డి (Pilot Rohit Reddy) ఆరోపణలతో సంబంధం లేదని నిందితుడు నంద కుమార్‌ తెలిపారు. ఎమ్మెల్యేలను ప్రలోభపెట్టడానికి ప్రయత్నించిన కేసులో ముగ్గురు నిందితులకు ఏసీబీ కోర్టు రిమాండ్‌ తిరస్కరించడంతో పోలీసుల తర్వాతి చర్యలు ఏం చేపడతారు అనేది ఆసక్తిగా మారింది. 41 సీఆర్​పీసీ కింద నోటీసులు జారీ చేసి వారిని విచారించే అంశంపై పోలీసు అధికారులు దృష్టి సారిస్తున్నట్లు తెలుస్తోంది.


టీఆర్ఎస్ ఎమ్మెల్యేలకు డబ్బులు చెల్లించి కొనేందుకు ప్రయత్నించారనే ఆరోపణలతో ముగ్గురు నిందితులపై సైబరాబాద్‌ పోలీసులు కేసు కూడా నమోదు చేసిన సంగతి తెలిసిందే. దీంతో ముగ్గురు నిందితులపై 120-బీ, 171-బీ రెడ్‌ విత్‌ 171-ఈ, 506 రెడ్‌ విత్‌ 34 ఐపీసీ, సెక్షన్‌ 8 ఆఫ్‌ ప్రివెన్షన్‌ కరప్షన్‌ యాక్ట్- 1988 సెక్షన్ల కింద కేసు నమోదు చేశారు. నిందితుల వద్ద రూ. కోట్ల డబ్బు ఉందని ప్రచారం జరిగినా కానీ, పక్కా ఆధారాలను పోలీసులు సమర్పించలేదు. కానీ జాతీయ స్థాయిలో ఒక కీలక నాయకుడి సెక్రటరీ మాట్లాడిన ఆడియో టేపులు లభించాయని పోలీసు వర్గాల్లో ప్రచారం జరుగుతోంది. 


టీఆర్ఎస్ (TRS) ను వీడి బీజేపీలో చేరితే ఎమ్మెల్యే పైలెట్‌ రోహిత్‌ రెడ్డికి రూ.100 కోట్లు, మరో ముగ్గురు ఎమ్మెల్యేలు గువ్వల బాలరాజు, రేగా కాంతారావు, హర్షవర్ధన్‌ రెడ్డికి ఒక్కొక్కరికి రూ.50 కోట్లు ఇస్తామంటూ ప్రలోభ పెట్టారని స్వయంగా రోహిత్‌ రెడ్డే ఫిర్యాదు ఇచ్చారు. దాని ఆధారంగా పోలీసులు కేసు నమోదు చేశారు. ఆ మేరకు రామచంద్ర భారతి, సింహయాజి, నంద కుమార్‌లను అరెస్టు చేసి విచారణ చేశారు.


రోహిత్‌ రెడ్డి ఫాంహౌస్‌ ప్రాంతాన్ని సైబరాబాద్‌ పోలీసులు (Cyberabad Police) తమ అధీనంలోకి తీసుకుని విస్తృతంగా తనిఖీలు చేశారు. డబ్బు ఎక్కడైనా దాచారా అనే అనుమానంతో క్షుణ్ణంగా పరిశీలించారు. నిందితులు వినియోగించిన కారు డ్రైవర్‌ తిరుపతిని అదుపులోకి తీసుకుని ప్రశ్నించారు.