కానిస్టేబుల్‌గా విధులు నిర్వహిస్తున్న ఓ మహిళ ఈ మధ్యే హెడ్‌కానిస్టేబుల్‌గా ప్రమోషన్ వచ్చింది. ఇందులో భాగంగా అమె ట్రైనింగ్ తీసుకున్నారు. 45 రోజుల ట్రైనింగ్ పూర్తి చేసుకొని ఇంటికి వచ్చిన ఆమెకు భర్త సర్ప్రైజ్ ప్లాన్ చేశారు. అది చూసిన ఆమె నోట మాట రాలేదు.
కంపా దీనాకు హెడ్ కానిస్టేబుల్‌గా పదోన్నతి వచ్చింది. ఈ సందర్భంగా ఆమె భర్త చేసిన హడావుడి నెట్టింట వైరల్‌గా మారుతోంది. హైదరాబాద్‌లోని ఎర్రగడ్డలో నివాసం ఉంటోందీ జంట. ప్రేమ్‌నగర్‌లో జులై 1 ఆమెకు ఘనస్వాగతం పలికాడు భర్త. ఈ సందర్భంగా తీసిన వీడియో ఇప్పుడు నెట్టింట చక్కర్లు కొడుతోంది.
దీనా చేసిన డ్యాన్స్ భర్త చేసిన హడావుడి అంతా రికార్డు చేశారు. ఇది సోషల్ మీడియాలో పెట్టిన తర్వాత వైరల్‌గా మారింది. చాలా మంది నెటిజన్లు కంగ్రాట్స్ చెబుతూ మెసేజ్‌లు చేస్తున్నారు. ఇంతకు మించిన ఆనందం ఏమి ఉంటుందని అంటున్నారు. సోషల్ మీడియాలో దీన్ని లక్షల మంది చూశారు.
కానిస్టేబుల్‌గా సిన్సియర్‌గా పని చేస్తున్న దీనాకు ఇటీవలే ప్రమోషన్ వచ్చింది. ఆమె కరీంనగర్‌లో శిక్షణా కేంద్రంలో 45 రోజుల పాటు ట్రైనింగ్ తీసుకున్నారు. ఆ తర్వాత ఇంటికి వచ్చారు. ఆమెకు పాలు తాగే వయసు ఉన్న పాప ఉంది. 18 నెలల వయసు ఉన్న చిన్నారిని భర్త వద్దే విడిచిపెట్టి శిక్షణకు వెళ్లారు దీనా.
దీనా ప్రస్తుతం సంజీవ రెడ్డి నగర్ పోలీస్ స్టేషన్‌లో డ్యూటీ చేస్తున్నారు. ఆమె భర్త రోనాల్ బాసిల్, సివిల్ ఇంజనీర్‌గా పని చేస్తున్నారు. శాంతి భద్రతలు కాపాడే విభాగంలో తన భార్య పని చేయడం చాలా ఆనందంగా ఉందంటున్నారు భర్త. ఆమె ఎదుగుదలకు మరింతగా సహకారం అందిస్తానంటున్నారు.
దీనా మరిన్ని విజయాలు అందుకోవాలని ఆశిస్తూ ఆమెను ప్రోత్సహించేందుకే ఇలా సర్ప్రైజ్ సెలబ్రేషన్స్‌ ప్లాన్ చేశానంటున్నారు బాసిల్. తన బిడ్డ ఎలా ఉందో అన్న ఆతృతతో వస్తున్న దీనా తన ఇంటి వద్ద మోగుతున్న బాజాలను చూసి షాక్ అయ్యారు. కాసేపటికి తేరుకొని తనకు జరుగుతున్న స్వాగత కార్యక్రమం అని తెలుసుకున్నారు. అలా అశ్చర్యపోతూనే నోట మాట లేకుండా ఇంట్లోకి వచ్చారు.
ఇంతలో బాణసంచా పేలుళ్లు మొదలయ్యాయి. తెలిసిన వాళ్లంతా వచ్చి దీనాను సత్కరించారు. సెలబ్రేషన్ తర్వాత కేక్ కట్ చేయించారు. వారితో దీనా డ్యాన్‌ చేశారు. అనంతరం తన బిడ్డను ఎత్తుకొని ముద్దాడారు. బిడ్డతో కలిసి డ్యాన్స్ కూడా చేశారు. ఈ వీడియో ఇప్పుడు సోషల్ మీడియాను షేక్ చేస్తోంది.