BRS Meetings: అసెంబ్లీ ఎన్నికల్లో(Telangana Assembly Elections) ఓటమి చవిచూసిన గులాబీ పార్టీ... పార్లమెంట్‌ ఎన్నికల్లో విజయం సాధించాలని ప్రయత్నిస్తోంది. అత్యధిక ఎంపీ స్థానాలను కైవశం చేసుకునే పనిలో నిమగ్నమై ఉంది. ఇందులో భాగంగా... వరుస సమావేశాలు నిర్వహిస్తూ... పార్టీ శ్రేణులకు దిశానిర్దేశం చేయనుంది. లోక్‌సభ నియోజకవర్గాల వారీగా... నేటి  నుంచి సన్నాహక సమావేశాలు నిర్వహిస్తోంది బీఆర్‌ఎస్‌ (BRS) పార్టీ. ఈ సమావేశాలు ఈనెల 21వ తేదీ వరకు జరగనున్నాయి. ఇవాళ ఆదిలాబాద్‌ లోక్‌సభ నియోజకవర్గం (Adilabad Lok Sabha Constituency) పరిధిలోని పార్టీ నేతలతో సమావేశం ఏర్పా టు చేశారు.


ఇవాళ ఆదిలాబాద్‌ లోక్‌సభ నియోజక వర్గం పరిధిలోని పార్టీ నేతలతో సమావేశం జరగనుంది. తెలంగాణ భవన్‌(Telangana Bhavan)లో ఉదయం 10:30 గంటలకు కేటీఆర్‌ (KTR) అధ్యక్షతన ఈ సమావేశం ప్రారంభమవుతుంది. ఆదిలాబాద్‌ మాజీ ఎంపీ గోడెం నగేశ్‌తో పాటు ఎమ్మెల్యేలు అనిల్‌ జాధవ్, కోవా లక్ష్మి, ఆయా అసెంబ్లీ సెగ్మెంట్లకు చెందిన మాజీ ఎమ్మెల్యేలు, జెడ్పీ చైర్మన్లు, మాజీ చైర్మన్లు, మున్సిపల్‌ చైర్మన్లు, వివిధ ప్రభుత్వ కార్పొరేషన్ల మాజీ చైర్మన్లు, నియోజక వర్గాల ఇన్‌చార్జిలు, జిల్లా పార్టీ అధ్యక్షులు, పార్టీ ప్రజాప్రతినిధులతోపాటు సుమారు 500 మంది ముఖ్యనేతలు పాల్గొంటారు. పార్లమెంట్‌ ఎన్నికల్లో అనుసరించాల్సిన వ్యూహంపై ఈ సమావేశాల్లో చర్చించనున్నారు. 


లోక్‌సభ ఎన్నికల సన్నాహక సమావేశాల బాధ్యతను సీనియర్‌ నేతలకు అప్పగించారు బీఆర్ఎస్‌ అధ్యక్షుడు కేసీఆర్‌. కేసీఆర్‌ ఆదేశాల మేరకు తెలంగాణ భవన్‌లో పార్టీ వర్కింగ్‌ ప్రెసిడెంట్‌ కె.తారకరామారావు (కేటీఆర్‌), పార్టీ సెక్రటరీ జనరల్‌ కె.కేశవరావుతోపాటు హరీశ్‌రావు (Harish Rao), కడియం శ్రీహరి (Kadiam Srihari), జగదీశ్‌రెడ్డి (Jagdish Reddy), వేముల ప్రశాంత్‌రెడ్డి, సింగిరెడ్డి నిరంజన్‌రెడ్డి, మధుసూధనాచారి, పోచారం శ్రీనివాస్‌రెడ్డి తదితర ముఖ్యనేతలు ఈ సమావేశాలను నిర్వహించనున్నారు. రెండు విడతల్లో ఈ సమావేశాలు జరగనున్నాయి. మొదటి విడతలో జనవరి 3 నుంచి 12 వరకు నిర్వహిస్తారు. సంక్రాంతి పండుగ కావడంతో... మూడు రోజులు బ్రేక్‌ ఇచ్చి... జనవరి 16 నుంచి మిగిలిన నియోజకవర్గాల్లో సన్నాహక సమావేశాలు కొనసాగిస్తారు. 


బీఆర్‌ఎస్‌ సమావేశం తేదీలు..
ఇవాళ (జనవరి 3వ తేదీ) ఆదిలాబాద్‌ పార్లమెంట్‌ నియోజకవర్గ సమావేశం జరగనుండగా... రేపు (జనవరి 4వ తేదీ) కరీంనగర్‌, 5వ తేదీన చేవెళ్ల, 6వ తేదీన పెద్దపల్లి, 7వ  తేదీన నిజామాబాద్‌, 8వ తేదీన జహీరాబాద్‌, 9వ తేదీన ఖమ్మం, 10వ తేదీన వరంగల్‌, 11వ తేదీన మహబూబాబాద్‌, 12వ తేదీన భువనగిరి, 16న నల్లగొండ, 17న  నాగర్‌కర్నూల్‌, 18న మహబూబ్‌నగర్‌, 19న మెదక్‌, 20న మలాజిగిరి, 21న సికింద్రాబాద్‌, హైదరాబాద్‌లో సమావేశాలు జరగనున్నాయి. 


ప్రతిరోజూ ఒక లోక్‌సభ నియోజకవర్గంలో సమావేశం నిర్వహిస్తారు బీఆర్‌ఎస్‌ ముఖ్య నేతలు. ఆ నియోజకవర్గ పరిధిలోని నాయకులతో సమావేశమవుతారు. పార్లమెంట్‌  ఎన్నికల్లో అనుసరించాల్సిన వ్యూహంపై చర్చిస్తారు. సమావేశానికి హాజరయ్యే ముఖ్యనేతల అభిప్రాయాలు తీసుకుని... తదుపరి కార్యాచరణను రూపొందిస్తారు. ముఖ్యంగా...  అసెంబ్లీ ఎన్నికల్లో స్వల్ప ఓట్ల తేడాతో ఓడిపోయిన నియోజకవర్గాలపై ప్రత్యేక దృష్టి సారించనుంది బీఆర్‌ఎస్‌.


ఇక... ఈ సమావేశాలకు లోక్‌సభ నియోజకవర్గ పరిధిలోని ముఖ్య నేతలందరినీ ఆహ్వానించింది బీఆర్‌ఎస్‌. ఎంపీలు, నియోజకవర్గం పరిధిలోని ఎమ్మెల్యేలు, ఎమ్మెల్సీలు,  మాజీ ఎమ్మెల్యేలు, మాజీ ఎంపీలు, జెడ్పీ చైర్మన్లు, మాజీ చైర్మన్లు, మేయర్లు, మాజీ మేయర్లు, మున్సిపల్‌ చైర్మన్లు, మాజీ చైర్మన్లు, వివిధ కార్పొరేషన్ల మాజీ చైర్మన్లు,  నియోజకవర్గాల ఇన్‌చార్జీలు, జిల్లా పార్టీ అధ్యక్షులు, పార్టీ ప్రజాప్రతినిధులు, ముఖ్యనేతలు సమావేశాలకు హాజరుకానున్నారు.