Breaking News Live Telugu Updates: ఏపీ మంత్రి రోజా ఇంటి ముందు ఉద్రిక్తత..

ఏపీ, తెలంగాణ సహా జాతీయ, అంతర్జాతీయ స్థాయిలో నేటి బ్రేకింగ్ న్యూస్ అప్‌డేట్స్ ఇక్కడ పొందొచ్చు. ఈ లైవ్ బ్లాగ్ అప్ డేట్ అవుతుంటుంది. తాజా సమాచారం కోసం రీఫ్రెష్ చేస్తుండండి.

Background

దక్షిణ బంగాళాఖాతంలో, శ్రీలంకకు దిగువన బలమైన మేఘాలు, తేమ గాలులు కేంద్రీక్రుతం అయ్యాయి. వీటివల్ల తెలుగు రాష్ట్రాలపై ఎలాంటి ప్రత్యేక ప్రభావం పడబోదని వాతావరణ నిపుణులు తెలిపారు. ఉత్తర భారతం నుంచి వస్తున్న పొడి గాలుల ప్రభావంతో తెలుగు రాష్ట్రాలు సహా దేశవ్యాప్తంగా వర్షాలు పడే అవకాశం లేదని తెలిపారు. ఉత్తర వాయువ్య దిశ నుంచి వస్తున్న పొడిగాలుల వల్ల పగటి ఉష్ణోగ్రతలు మరింత పెరుగుతాయని అంచనా వేశారు. వచ్చే మూడు రోజులు రాత్రి వేళ ఉష్ణోగ్రతలు తగ్గడంతో పాటు పగటిపూట వేడి పెరుగుతుందని అంచనా వేశారు. ఇక గత కొద్ది రోజులుగా తెలుగు రాష్ట్రాల్లో పొడి వాతావరణం ఉంటుండగా, అదే కొనసాగుతుందని రెండు రాష్ట్రాల వాతావరణ కేంద్రాల అధికారులు తెలిపారు. ఆంధ్రప్రదేశ్‌తో పోల్చుకుంటే తెలంగాణలో చలి తీవ్రత కాస్త ఎక్కువగా ఉండబోతుంది.కొన్ని ప్రాంతాల్లో కనిష్ఠ ఉష్ణోగ్రత 2 - 4 డిగ్రీలు: ఐఎండీతెలంగాణలో చలి నేడు రేపు 2 నుంచి 4 డిగ్రీల మధ్యలో కూడా కొన్ని ప్రాంతాల్లో నమోదవుతుందని హైదరాబాద్ వాతావరణ కేంద్రం తెలిపింది. తెలంగాణలో నేడు 9 జిల్లాలకు ఆరెంజ్ అలర్ట్, మరో 13 జిల్లాలకు ఎల్లో అలర్ట్ జారీ చేసింది. సాధారణంగా 5 నుంచి 10 డిగ్రీల మధ్య ఉష్ణోగ్రతలు నమోదయ్యే అవకాశం ఉందనిపిస్తే వాతావరణ విభాగం ఆరెంజ్‌ అలర్ట్‌ జారీ చేస్తుంది. 11 నుంచి 15 డిగ్రీల మధ్య ఉష్ణోగ్రత నమోదయ్యే అవకాశం ఉంటే ఎల్లో అలెర్ట్ జారీ చేస్తుంటారు. రాబోయే ఐదు రోజులకు సంబంధించి తెలంగాణ వాతావరణ విభాగం నమోదు కానున్న ఉష్ణోగ్రతల అంచనాలను వెదర్ బులెటిన్‌లో వివరించింది.ఇక మహబూబ్ నగర్‌లో గరిష్ణ ఉష్ణోగ్రత నమోదు అయింది. అక్కడ 37 డిగ్రీలు నమోదైనట్టు వాతావరణ విభాగం తెలిపింది. అత్యల్ప ఉష్ణోగ్రత ఆదిలాబాద్‌లో 10.2 డిగ్రీలు నమోదైంది. ఇవాళ అత్యధిక ఉష్ణోగ్రత 34 డిగ్రీల కన్నా ఎక్కువగా ఉంటుందని, అత్యల్పం 15 డిగ్రీలుగా ఉంటుందని అంచనా అధికారులు వేశారు.‘‘ఆకాశం పాక్షికంగా మేఘాలు పట్టి ఉంటుంది. నగరంలో పొగ మంచు ఉదయం సమయంలో ఏర్పడుతుంది. గరిష్ఠ, కనిష్ఠ ఉష్ణోగ్రతలు వరుసగా 33 డిగ్రీలు, 15 డిగ్రీలుగా ఉండే అవకాశం ఉంది. ఈశాన్య దిశ నుంచి గాలులు గాలి వేగం గంటకు 4 నుంచి 8 కిలో మీటర్ల వేగంతో వీచే అవకాశం ఉంది’’ అని వెదర్ బులెటిన్ లో పేర్కొ్న్నారు. నిన్న గరిష్ఠ ఉష్ణోగ్రత 32.8 డిగ్రీలు, కనిష్ఠ ఉష్ణోగ్రత 17 డిగ్రీలుగా నమోదైంది.ఏపీలో ఇలాఆంధ్రప్రదేశ్‌ వాతావరణ విభాగం తెలిపిన వివరాల మేరకు ఆంధ్రప్రదేశ్, యానాం ప్రాంతాల్లో దిగువ ట్రోపోస్ఫిరిక్ స్థాయిల్లో ఈశాన్య, తూర్పు దిశలలో గాలులు వీస్తున్నాయని వెదర్ బులెటిన్ లో పేర్కొన్నారు.ఈ వాతావరణ పరిస్థితుల వల్ల ఏపీలోని ఉత్తర కోస్తా ఆంధ్ర, యానాం ప్రాంతాల్లో వచ్చే మూడు రోజులు పొడి వాతావరణమే ఉంటుందని అమరావతి వాతావరణ కేంద్రం ప్రకటనలో తెలిపింది. దక్షిణ కోస్తా ఆంధ్రప్రదేశ్ లో కూడా పొడి వాతావరణమే ఉండనుంది. రాయలసీమలో వచ్చే మూడు రోజులు పొడి వాతావరణమే ఉండనుంది.ఇక క్రమంగా ఎండాకాలం‘‘తెలుగు రాష్ట్రాల వ్యాప్తంగా ఎండలు బాగా పెరగనున్నాయి. మరో మూడు రోజుల వ్యవధిలో ఉభయ గోదావరి జిల్లాలు, ఖమ్మం, భద్రాద్రి, కృష్ణా, గుంటూరు జిల్లాల్లో వేడి 38 డిగ్రీల వరకు ఉండనుంది. ఇందులో విజయవాడ​, ఏలూరు, రాజమండ్రి ఉండటం వలన నగర వాసులు తగినంత నీటిని తాగుతూ జాగ్రత్త పడగలరు. మరోవైపున రాయలసీమ​, నెల్లూరు, ప్రకాశం, బాపట్ల​, కొనసీమ​, విశాఖ, అనకాపల్లి, కాకినాడ​, శ్రీకాకుళం, విజయనగరం జిల్లాల్లో వేడితో పాటు ఉక్కపోత కూడ ఉండనుంది. కానీ రాత్రి, అర్ధరాత్రి, వేకువజామున మాత్రం చల్లగా ఉండనుంది. తెలంగాణ వ్యాప్తంగా చల్లగా, ముఖ్యంగా హైదరాబాదులో 11 నుంచి 15 డిగ్రీల మధ్యన రాత్రి సమయంలో ఉష్ణోగ్రతలు ఉండనున్నాయి’’ అని ఏపీ వెదర్ మ్యాన్ తెలిపారు.

14/02/2023 19:46:12

ఏపీ పర్యాటక శాఖ మంత్రి ఇంటి ముందు ఉద్రిక్తత..

తిరుపతి : ఏపీ పర్యాటక శాఖ మంత్రి ఇంటి ముందు ఉద్రిక్తత..

ఏపి మంత్రి ఆర్.కే.రోజా ఇంటి వద్ద ఉద్రిక్తత నెలకొంది.. టిడిపి జాతీయ ప్రధాన కార్యదర్శి నారా లోకేష్ ఆదేశాల మేరకు తెలుగు మహిళ రాష్ట్ర అధికార ప్రతినిధి ఆధ్వర్యంలో చీర, గాజులుతో రోజా ఇంటిలోని ముట్టడించేందుకు టిడిపి మహిళలు, టిడిపి నాయకులు, కార్యకర్తలు ప్రయత్నించారు.. అయితే విషయం తెలుసుకున్న నగిరి పోలీసులు మహిళలను, నాయకులను, కార్యకర్తలను మంత్రి రోజా ఇంటికి వెళ్ళకుండా బ్యారీ గేట్లు వేసి అడ్డుకున్నారు.. దీంతో ఒక్కసారిగా రోజా ఇంటి ముందు ఘర్షణ వాతావరణం నెలకొంది.. పోలీసుల తీరుపై ఆగ్రహించిన తెలుగు మహిళలు, పోలీసులతో వాగ్వాదంకు దిగ్గారు.. పోలీసులు అడ్డుకునేందుకు ప్రయత్నించినా తెలుగు మహిళలు రోజా ఇంటిలోకి ప్రవేశించేందుకు ప్రయత్నించడంతో తోపులాట చోటు చేసుకుంది.. అయితే తెలుగు మహిళలను, టిడిపి నాయకులను, కార్యకర్తలను పోలీసు స్టేషనుకు తరలించి కేసు నమోదు చేశారు.. నారా లోకేష్ యువగళం పాదయాత్రకు సంఘీభావం తెలిపేందుకు వచ్చిన నాయకులు, కార్యకర్తలు, అభిమానులతో పోలీసు స్టేషను నిండి పోయింది.. ఏపి మంత్రి రోజా కు వ్యతిరేకంగా నినాదాలు చేస్తూ రోడ్డు అడ్డంగా బైటాయించి తెలుగు తమ్ములు తమ నిరసనను వ్యక్తం చేశారు..

14/02/2023 19:41:51

టీచర్ల బదిలీలపై టీఎస్ హైకోర్టు స్టే

తెలంగాణలో టీచర్ల బదిలీలపై హైకోర్టు స్టే ఇచ్చింది. మార్చి 14 వరకు బదిలీల చేపట్టవద్దని ఆదేశించింది. కౌంటర్ దాఖలు చేయాలని ప్రభుత్వాన్ని ఆదేశించింది. నాన్ స్పౌజ్ టీచర్ల బదిలీలపై హైకోర్టులో పిటిషన్ దాఖలైంది.  

14/02/2023 15:21:49

3 రోజులపాటు కాకినాడ, తూర్పు గోదావరి జిల్లాల్లో చంద్రబాబు పర్యటన

రేపటి (బుధవారం) నుంచి మూడు రోజుల పాటు కాకినాడ జిల్లా, తూర్పు గోదావరి జిల్లా లలో టీడీపీ అధినేత నారా చంద్రబాబు నాయుడు  పర్యటించనున్నారు.

14/02/2023 13:28:09

PM Modi Telangana Tour: తెలంగాణలో మార్చి చివరి వారంలో ప్రధాని మోదీ పర్యటన

• రాష్ట్రంలో మార్చి చివరి వారంలో ప్రధాని మోదీ పర్యటన


• ఎమ్మెల్సీ ఎన్నికల కోడ్ ముగిసిన తర్వాత రాష్ట్రంలో మోదీ పర్యటన


• తెలంగాణలో ప్రధాని పర్యటనను ధ్రువీకరించిన బీజేపీ వర్గాలు


• పలు శంకుస్థాపనలు, ప్రారంభోత్సవాలు చేయనున్న ప్రధాని

14/02/2023 12:46:32

IT Raids on BBC: ఢిల్లీ బీబీసీ కార్యాలయంపై ఆదాయపు పన్ను శాఖ దాడులు

ఢిల్లీలోని బీబీసీ కార్యాలయంపై ఆదాయపు పన్ను శాఖ దాడులు చేస్తోంది. కార్యాలయంలో ఉన్న వ్యక్తుల ఫోన్లను అధికారులు స్వాధీనం చేసుకున్నారు.

14/02/2023 12:41:00

Vishnu Kumar Raju: ఇది దిక్కుమాలిన ప్రభుత్వం - మాజీ ఎమ్మెల్యే విష్ణుకుమార్ రాజు

వైసీపీ ప్రభుత్వంపై మాజీ ఎమ్మెల్యే విష్ణుకుమార్ రాజు  తీవ్రస్థాయిలో విరుచుకుపడ్డారు. మంగళవారం మీడియాతో మాట్లాడుతూ.. ఈ ప్రభుత్వం దిక్కుమాలిన ప్రభుత్వమన్నారు. నిరాహార దీక్ష సంవత్సరం చేసినా పట్టించుకునే ప్రభుత్వం కాదని మండిపడ్డారు. అమరావతి రైతులు ఎన్ని దీక్షలు చేసినా పట్టించుకోలేదన్నారు. ఈ రాష్ట్రానికి పట్టిన చీడ వైసీపీ ప్రభుత్వమని.. ఎన్నుకున్న ప్రజలకు బాగా బుద్ధి వచ్చిందని అన్నారు. 2024లో వైసీపీ బయటకు పోవడం ఖాయమని చెప్పారు. ఎస్సీ, ఎస్సీ నిధులను దారి మళ్లించారని ఆరోపించారు. ఆదాని మీద జగన్‌ కు ఎందుకంత ప్రేమో అర్థం కావడం లేదన్నారు. పీకల్లోతు అప్పుల్లో ఉన్న ఆదానికి మరో ఆరవై ఎకరాలు ఎందుకు ఇచ్చారని ప్రశ్నించారు. కృష్ణపట్నం, గంగవరం పోర్టును జగన్  దోచిపెట్టారని.. జగన్ భారీగా దోపిడి చేస్తున్నారని మండిపడ్డారు. ‘‘జగన్ గారు మీరు ప్రజల్లో చులకనైపోయారు’’ అంటూ విష్ణుకుమార్ రాజు వ్యాఖ్యలు చేశారు.

14/02/2023 12:02:55

ఆర్టికల్ 370 రద్దుతో టెర్రరిజం తగ్గింది - యాంటీ టెర్రరిజం ఫ్రంట్ చైర్మన్ మణిందర్‌జీత్ సింగ్ బిట్టా

ఆర్టికల్ 370 రద్దు చేయడంతో టెర్రరిజం తగ్గిందని యాంటీ టెర్రరిజం ఫ్రంట్ చైర్మన్ మణిందర్‌జీత్ సింగ్ బిట్టా స్పష్టం చేశారు. ఇవాళ వేకువజాము సుప్రభాతం సేవలో పాల్గొన్న బిట్టా అనంతరం పద్మావతి అతిధిగృహంలో అతిథి గృహంలో మీడియా సమావేశం ఏర్పాటు చేసారు.  కేంద్రంలో మోడీ సర్కారు వచ్చాక టెర్రరిజం నియంత్రణలో ఉందని తెలిపారు. నేను రాజకీయంగా మాట్లాడలేదని ఆంధ్ర,తెలంగాణ విడిపోయాక బాగా అభవృద్ధి చెందాయన్నారు. సిఎం జగన్ చేస్తున్న సంక్షేమ అభివృద్ధిని చూసి దేశంలో మిగతా సిఎంలు నేర్చుకోవాలని కోరారు. ఆంధ్రకు విశాఖ రాజధాని అవ్వడం వల్ల మరింత అభివృద్ధి చెంది ఉపాధి అవకాశాలొస్తాయని అభిప్రాయపడ్డారు. రెండు తెలుగు రాష్ట్రాలు కలిసుంటే బలమైన అభివృద్ది చెంది ఉంటుందన్నారు. రాజీవ్ గాంధీ,ఇందిరా గాంధీ లు ఉగ్రవాదుల చేతిలో చనిపోయారని చెప్పిన ఆయన, ఓట్ల కోసం ప్రభుత్వాలు టెర్రరిస్ట్ కార్యకలాపాలకు తగ్గద్దని హెచ్చరించారు. తమిళనాడు ప్రభుత్వం దేశంతో కలిసి నడుస్తుందా లేదా ఎల్టిఈ  వంతపాడుతుంద అనే అంశం స్పష్టం చేయాలనీ డిమాండ్ చేసారు. ఓట్లు రాకపోయినా టెర్రరిస్టులను వదిలేది లేదని స్పష్టం చేసారు. సముద్ర తీర ప్రాంతాల్లో నిఘాను పటిష్టం చేయాలని, టర్కీ,నేపాల్ దేశాల్లో సంభవించిన భూకంపాలకు భారతదేశం సహాయం చేసిందన్నారు. రష్యా జరుపుతున్న ఉక్రెయిన్ యుద్ధంలో పాకిస్తాన్ యువకుడు రక్షణ కోసం భారత త్రివర్ణ పతాకం పెట్టుకోవడం చాలా ఆనందదాయకమన్నారు. పంజాబ్,పాకిస్తాన్ సరిహద్దుల్లో పట్టుబడే డ్రగ్స్ లింకులు ఎపి,తెలంగాణ లకు ఉన్నాయని సంచలన వ్యాఖ్యలు చేసారు.

14/02/2023 11:40:16

Nellore News: నెల్లూరులో పెళ్లిళ్ల బాబాకు వ్యతిరేకంగా రోడ్డెక్కిన మహిళలు

నెల్లూరు జిల్లా ఏఎస్ పేట దర్గాకు చెందిన హఫీజ్ పాషా అలియాస్ పెళ్లిళ్ల బాబా గుట్టు రట్టయింది. ఇప్పటికే ఏడు పెళ్లిళ్లు చేసుకుని, ఎనిమిదో పెళ్లికి రెడీ అవుతుండగా హైదరాబాద్ పోలీసులు అతడిని అరెస్ట్ చేశారు. ఈ నేపథ్యంలో అతడిపై కఠిన చర్యలు తీసుకోవాలంటూ ఏఎస్ పేట మహిళా నాయకులు దర్గా వద్ద ఆందోళన చేపట్టారు. ఐద్వా ఆధ్వర్యంలో మహిళలు నిరసన ప్రదర్శన చేపట్టారు. ఆదర్శవంతంగా ఉండాల్సిన పదవిలో ఉన్న హఫీజ్ పాషా.. దర్గా పవిత్రతను అపవిత్రం చేశాడని, వెంటనే అతడిని దర్గా పీఠాధిపతి పదవినుంచి తొలగించాలన్నారు. అతడిపై జిల్లా ఎస్పీకి, వక్ఫ్ బోర్డ్ అధికారులకు కూడా ఫిర్యాదు చేస్తామన్నారు మహిళలు.

14/02/2023 11:26:11

AP CID Ex DG Sunil Kumar: ఏపీ ప్రభుత్వానికి కేంద్ర హోంశాఖ లేఖ, ఆయనపై చర్యలకు ఆదేశాలు

ఏపీ ప్రభుత్వానికి కేంద్ర హోంశాఖ లేఖ రాసింది. ఏపీ సీఐడీ మాజీ డీజీ పీవీ సునీల్ కుమార్‌ పై చర్యలు తీసుకోవాలంటూ ప్రభుత్వ ప్రధాన కార్యదర్శికి కేంద్ర హోం శాఖ లేఖ రాసింది. సునీల్ కుమార్ ఆధ్వర్యంలో సీఐడీ అధికారులు అక్రమ అరెస్టులు, కస్టోడియల్ టార్చర్‌కు పాల్పడుతున్నారని గతేడాది కేంద్ర హోంశాఖకు హైకోర్టు న్యాయవాది గూడపాటి లక్ష్మీనారాయణ లేఖ రాశారు. సీఐడీ విభాగంలో కొంతమంది అధికారులు వ్యవహరిస్తున్న తీరు ప్రాథమిక హక్కులకు భంగం కలిగించే విధంగా ఉందని ఆరోపించారు. ప్రతిపక్ష పార్టీలకు చెందిన కార్యకర్తలపై అక్రమ కేసులు పెడుతున్నారని, అధికార పార్టీ నేతల ఆదేశాల మేరకే ఇలా చేస్తున్నారని హోంశాఖకు ఫిర్యాదు చేశారు. గతేడాది అక్టోబర్‌లో రాసిన లేఖపై కేంద్ర హోంశాఖ కార్యదర్శి తాజాగా స్పందించారు.

14/02/2023 09:32:51

Asifabad: ఆసిఫాబాద్ జిల్లా వేంపల్లి అటవి ప్రాంతంలో కనిపించిన పులి

కుమ్రం భీం ఆసిఫాబాద్‌ జిల్లా కాగజ్‌నగర్‌ అటవీ డివిజన్ పరిధిలోని వేంపల్లి అటవి ప్రాంతంలోకి తాజాగా మహారాష్ట్ర నుంచి మరో పెద్దపులి ప్రవేశించింది. కాగజ్‌నగర్‌, సిర్పూర్(టి) ప్రధాన రహదారి మీదుగా కారులో వెళ్తున్న ప్రయాణికులకు రోడ్డు పక్కనే పెద్దపులి కనిపించడంతో వారు సెల్ ఫోన్ లో ఆ దృశ్యాలను బంధించారు. సోషల్ మీడియాలో వారు పోస్టు చేయడంతో విషయం అటవీ శాఖ అధికారుల దృష్టికి వెళ్లింది. వారు కూడా పులి సంచారాన్ని నిర్ధారించారు. కాగజ్‌నగర్‌ ఫారెస్ట్ రేంజి పరిదిలో ఇప్పటికే ఏడు పెద్దపులులు ఉన్నట్లు అధికారులు తెలిపారు. రేంజి పరిధిలోని వేంపల్లి, దరిగాం, చారిగాం, అంకుసాపూర్, గోంది, రేగులగూడ, ఊట్ పల్లి తదితర ప్రాంతాల్లో పులులు సంచరిస్తున్నట్టు పేర్కొన్నారు. కొత్తగా వచ్చిన పులితో కాగజ్‌నగర్‌ రేంజి పరిధిలో పులుల సంఖ్య 8కి చేరుకుంది. రోజురోజుకు పులుల సంఖ్య పెరుగుతున్నందున తదనుగుణంగా రక్షణ చర్యలు చేపట్టాలని పరిసర గ్రామాల ప్రజలు కోరుతున్నారు.