Breaking News: పలాస రైల్వేస్టేషన్ లో 108 ను ఢీకొట్టిన ఇంటర్ సిటీ ఎక్స్ ప్రెస్

ఏపీ, తెలంగాణ రాష్ట్రాలతో పాటు దేశ వ్యాప్తంగా, అంతర్జాతీయంగా నేడు జరిగే వార్తల అప్‌డేట్స్, వివరాలు మీకోసం

Background

తిరుమల శ్రీ వేంకటేశ్వర స్వామి దర్శనం కోసం డిసెంబర్ నెలకు సంబంధించిన సమయనిర్దేశిత(స్లాటెడ్) సర్వదర్శనం టోకెన్లు నవంబరు 27వ తేదీ ఉదయం 9 గంటలకు ఆన్ లైన్ లో విడుదల చేస్తారు. తిరుమలలో వసతికి సంబంధించి డిసెంబర్ నెల కోటాను నవంబరు 28వ తేదీ ఉదయం 9 గంటలకు ఆన్ లైన్ లో విడుదల చేయనున్నట్టు టీటీడీ తెలిపింది. భక్తులు ఈ విషయాన్ని గుర్తించి స్వామివారి దర్శనం టోకెన్లు, తిరుమలలో వసతి బుక్ చేసుకోవాలని కోరుతోంది.భారత మార్కెట్లో బంగారం ధర నేడు స్వల్పంగా పెరిగింది. నిన్న నిలకడగా ఉన్న పసిడి ధర నేడు పుంజుకుంది. వెండి ధర కిలోకు రూ.200 తగ్గింది. తాజాగా 22 క్యారెట్లపై రూ.150 మేర తగ్గడంతో 10 గ్రాముల (తులం) బంగారం ధర ఇవాళ హైదరాబాద్‌ మార్కెట్‌లో రూ.44,850 గా ఉంది. 24 క్యారెట్ల స్వచ్ఛమైన బంగారం (99.99 స్వచ్ఛత)పై రూ. 170 మేర పెరగడంతో ధర ప్రస్తుతం రూ.48,930 అయింది. ఇక వెండి ధర హైదరాబాద్ మార్కెట్‌లో వరుసగా రెండోరోజు పెరిగింది. రూ.100 మేర పెరగడంతో తాజాగా కిలో రూ.67,900గా ఉంది. తెలంగాణ వ్యాప్తంగా మిగతా నగరాల్లోనూ ఇవే ధరలు అమల్లో ఉంటున్నాయి. నైరుతి బంగాళాఖాతం, దాని పరిసర ప్రాంతాల్లో ఏర్పడిన ఉపరితల ఆవర్తనం దక్షిణ శ్రీలంక తీరం దగ్గర్లో సముద్ర మట్టానికి 3.1 కిలోమీటర్ల ఎత్తు వరకు విస్తరించి ఉందని భారత వాతావరణ కేంద్రం అధికారులు తెలిపారు. ఈ ఉపరితల ఆవర్తనానికి అనుబంధంగా ఉపరితల ద్రోణి, నైరుతి బంగాళాఖాతం నుండి శ్రీలంక వరకు సముద్ర మట్టానికి 1.5 కిలోమీటర్ల మేర విస్తరించి ఉంది. దీని ప్రభావంతో మరో మూడు రోజులపాటు ఏపీలో భారీ వర్షాలు కురవనున్నాయని అమరావతి వాతావరణ కేంద్రం వెల్లడించింది.ఇదివరకే ఈ నెలలో రెండు వరుస అల్పపీడనాలు, వాయుగుండం కారణంగా ఏపీలోని చిత్తూరు, అనంతపురం, కడప, నెల్లూరు జిల్లాలు అతలాకుతలం అయ్యాయి. నవంబర్ 29 తేదీలోగా దక్షిణ అండమాన్ సముద్రంలో మరో అల్పపీడనం ఏర్పడే అవకాశం ఉన్నందున ఈ జిల్లా వాసులు అప్రమత్తంగా ఉండాలని వాతావరణ కేంద్రం హెచ్చరిస్తోంది. నేటి నుంచి మూడు రోజులపాటు ఉరుములు, మెరుపులతో ఓ మోస్తరు నుంచి భారీ వర్షాలు కురిసే అవకాశం ఉందని అంచనా వేశారు. దేశ రాజధాని ఢిల్లీలో నేడు పెట్రోల్ ధర రూ. 103.97 వద్ద స్థిరంగా ఉంది. డీజిల్ లీటర్ ధర సైతం గత కొన్ని రోజులుగా రూ.86.67 వద్ద నిలకడగా ఉంది. హైదరాబాద్‌లో నేడు పెట్రోల్ ధర లీటరుకు రూ.108.20 వద్ద స్థిరంగా ఉంది. గత రెండు వారాలుగా భాగ్యనగరంలో పెట్రోల్ ధర నిలకడగా కొనసాగుతుంది. డీజిల్ ధర సైతం లీటరుకు రూ.94.62 గా నిలకడగానే ఉంది. గత కొన్ని రోజుల నుంచి హైదరాబాద్‌లో నిలకడగానే ధరలు ఉంటున్నాయి.ఇక వరంగల్‌లో పెట్రోల్ ధర రూ.0.19 పైసలు పెరిగి రూ.107.88 వద్ద విక్రయాలు జరుగుతున్నాయి.  డీజిల్ ధర కూడా రూ.0.17 పైసలు పెరిగి రూ.94.31 అయింది. వరంగల్ రూరల్ జిల్లాలో పెట్రోల్ ధర రూ. 107.69 కాగా, డీజిల్ ధర రూ.94.14గా ఉంది. ఆంధ్రప్రదేశ్‌లో ఇంధన ధరలు ఇలా..ఇక విజయవాడ మార్కెట్‌లో పెట్రోల్ ధర నేడు కాస్త ఎక్కువగానే పెరిగింది. లీటరుకు రూ.0.46 పైసలు పెరిగి ప్రస్తుతం రూ.111.13 అయింది. డీజిల్ ధర కూడా రూ.0.40 పైసలు పెరిగి రూ.97.14గా ఉంది. గుంటూరులో పెట్రోల్ ధర రూ.111.13 కాగా, డీజిల్ ధర రూ.97.14 అయింది.ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి

27/11/2021 20:50:25

పలాస రైల్వేస్టేషన్ లో 108 ను ఢీకొట్టిన ఇంటర్ సిటీ ఎక్స్ ప్రెస్

శ్రీకాకుళం జిల్లా పలాసలో 108 వాహనాన్ని ఇంటర్ సిటీ ఎక్స్ ప్రెస్ ఢీకొట్టింది. స్టేషన్ లో ఉన్న పేషెంట్ ను తీసుకెళ్లేందుకు 108 వచ్చిన క్రమంలో ప్రమాదం జరిగింది. ప్లాట్ ఫామ్ పైకి వెళ్తోన్న క్రమంలో ఇంటర్ సిటీ ఎక్స్ ప్రెస్ 108 ను ఢీకొట్టింది. దీంతో 108 సిబ్బంది బయటకు దూకేశారు. దీంతో ఆనంద్ అనే 108 సిబ్బందికి భుజానికి గాయం అయ్యింది. 108 వాహనాన్ని ట్రైన్ 200 మీటర్ల వరకూ ఈడ్చుకువెళ్లింది. 

 

27/11/2021 17:21:06

కడప జిల్లా వరద ప్రభావిత ప్రాంతాల్లో కేంద్ర బృందం పర్యటన

కడప జిల్లా  రాజంపేటలో వర్షాల వల్ల నష్టపోయిన ప్రాంతాల్లో కేంద్ర బృందం పర్యటించింది. క్షేత్రస్థాయిలో ప్రభావిత ప్రాంతాలను పరిశీలించి, నష్టాన్ని అంచనా వేస్తుంది. పులపుత్తూరు, మందపల్లి , అన్నమయ్య ప్రాజెక్టును పరిశీలించేందుకు నలుగురు సభ్యుల కేంద్ర బృందం రానుంది. 

 

27/11/2021 17:21:05

కడప జిల్లా వరద ప్రభావిత ప్రాంతాల్లో కేంద్ర బృందం పర్యటన

కడప జిల్లా  రాజంపేటలో వర్షాల వల్ల నష్టపోయిన ప్రాంతాల్లో కేంద్ర బృందం పర్యటించింది. క్షేత్రస్థాయిలో ప్రభావిత ప్రాంతాలను పరిశీలించి, నష్టాన్ని అంచనా వేస్తుంది. పులపుత్తూరు, మందపల్లి , అన్నమయ్య ప్రాజెక్టును పరిశీలించేందుకు నలుగురు సభ్యుల కేంద్ర బృందం రానుంది. 

 

27/11/2021 16:27:34

అంగన్వాడీ పాలు, గుడ్లు తిని పది మంది చిన్నారులకు అస్వస్థత

శ్రీకాకుళం జిల్లాలో అంగన్వాడీ కేంద్రంలో  పాలు, గుడ్లుతిని పిల్లలు అస్వస్థతకు గురయ్యారు. శ్రీకాకుళం జిల్లా లావేరు మండలం నేతేరు అంగన్వాడీ కేంద్రంలో పాలు, గుడ్లు తిన్న పది మంది చిన్నారులకు వాంతులు అయ్యాయి. ఇది గమనించిన అంగన్వాడీ సిబ్బంది, స్థానికులు చిన్నారులను శ్రీకాకుళంలోని రిమ్స్ ఆసుపత్రికి తరలించారు. ముగ్గరు పరిస్థితి విషమంగా ఉందని వైద్యులు చెబుతున్నారు. పాలుతోపాటు పాడైన కోడి గుడ్లు తినడం వల్లనే  విద్యార్థులు అస్వస్థతకు గురి అయ్యినట్లు వైద్యులు చెబుతున్నారు. 

 

27/11/2021 16:02:39

అంగన్వాడీ కేంద్రంలో కలుషిత ఆహారం తిని పిల్లలకు అస్వస్థత

అంగన్వాడీ కేంద్రంలో  పాలు ,గుడ్లు తిని పిల్లలు అస్వస్థతకు గురయ్యారు. శ్రీకాకుళం జిల్లా లావేరు మండలం నేతేరు అంగన్వాడీ కేంద్రంలో
పాలు గుడ్లు తిన్న చిన్నారులకు వాంతులు అయ్యాయి. దీన్ని గమనించిన అంగన్వాడీ వర్కర్ ,స్థానికులు శ్రీకాకుళంలోని రిమ్స్ ఆసుపత్రికి పది మంది చిన్నారులను తరలించారు . ముగ్గరు పరిస్థితి విషమంగా ఉండడంతో వైద్యసేవలందిస్తున్నారు. పాలుతోపాటు పాడైన కోడి గుడ్లు తినడం వల్లనే  విద్యార్దులు అస్వస్థతకు గురైనట్లు అనుమానిస్తున్నారు.

27/11/2021 12:15:55

తెలంగాణ సీఎం కేసీఆర్‌పై వైఎస్ షర్మిల ఘాటు విమర్శలు

కవిత ఒక్కసారి ఓడిపోతేనే కేసీఆర్ గుండె తల్లడిల్లింది.. మరి నిరుద్యోగుల ఆత్మహత్యలు కనిపిస్తలేవా అని తెలంగాణ ముఖ్య‌మంత్రి కేసీఆర్‌పై వైఎస్సార్‌ తెలంగాణ పార్టీ అధ్య‌క్షురాలు వైఎస్ ష‌ర్మిల తీవ్ర విమ‌ర్శ‌లు గుప్పించారు. కూతురు క‌ల్వ‌కుంట్ల క‌విత‌కు మ‌రోసారి ఎమ్మెల్సీ ప‌ద‌వి ఇవ్వడంపై సీఎం కేసీఆర్‌ను లక్ష్యంగా చేసుకుని వ్యాఖ్యలు చేశారు. 

‘బిడ్డ ఒక్కసారి ఎన్నికల్లో ఓడిపోతేనే కేసీఆర్ గుండె తల్లడిల్లింది.
బిడ్డకు రెండుసార్లు MLC, ఇప్పుడు మంత్రి పదవి కట్టబెట్టేందుకు రెడీగా ఉన్నాడు. 
నోటిఫికేషన్స్ లేక, ఉద్యోగాలు రాక
పురుగులమందు తాగుడు, ఉరి వేసుకొనుడే ఉద్యోగంగా
రోజుకొక్క నిరుద్యోగి చస్తుంటే మాత్రం దొరకు కనపడుతలేదు’ 

‘ఒక్క నెలలోనే ఆరుగురు నిరుద్యోగులు ఆత్మహత్య చేసుకున్నా నోటిఫికేషన్స్ ఇవ్వాలనే సోయి లేదు దొరకు. నిరుద్యోగులను బలితీసుకొంటున్న హంతకుడు కేసీఆర్. ఇంకెంత మందిని బలితీసుకొంటే ఉద్యోగాలు ఇస్తారు సారూ? నీ బిడ్డలే బిడ్డలు కానీ ఇతరుల బిడ్డలు బిడ్డలు కాదా? వాళ్ళ ప్రాణాలు నీకు లెక్కలేదా?’ అని వైఎస్ షర్మిల ట్వీట్ చేశారు.

27/11/2021 10:49:27

నారాయణపూర్‌లో నక్సలైట్లు మళ్లీ బీభత్సం.. పోస్టర్ల కలకలం

నారాయణపూర్‌లో నక్సలైట్లు మళ్లీ బీభత్సం సృష్టించారు. సర్పంచ్ భర్తను దారుణంగా హతమార్చిన అనంతరం గ్రామంలో బ్యానర్ పోస్టర్లు కనిపించాయి. మరోవైపు సర్పంచ్ భర్త హత్యతో గ్రామంలో భయానక వాతావరణం నెలకొంది. శుక్రవారం రాత్రి సాయుధ నక్సలైట్లు పెద్ద ఎత్తున గ్రామానికి చేరుకున్నారు. ప్రధాన మంత్రి గ్రామ్ సడక్ యోజనలో నిమగ్నమైన జేసీబీ యంత్రాన్ని కూడా మావోయిస్టులు తగలబెట్టారు. నారాయణపూర్ జిల్లాలోని ఫరస్‌గావ్ పోలీస్ స్టేషన్ పరిధిలోని కర్మరి గ్రామం కేసు ఇది. నక్సలైట్ల కోసం పోలీసులు రంగంలోకి దిగారు.

27/11/2021 10:07:38

టాలీవుడ్ డైరెక్టర్ KS నాగేశ్వరరావు కన్నుమూత

టాలీవుడ్ దర్శకుడు KS నాగేశ్వరరావు కన్నుమూశారు. ఆయన శ్రీశైలం, వైజయంతి, శివన్న మొదలగు చిత్రాలకు దర్శకత్వం వహించారు.

27/11/2021 09:34:25

ఇందిరాపార్క్ ధర్నా చౌక్ వద్ద కాంగ్రెస్ నేతల వరి దీక్ష

కిసాన్ కాంగ్రెస్ ఆధ్వర్యంలో ఈ రోజు ఉదయం 10 గంటల నుంచి రేపు సాయంత్రం 5 గంటల వరకు ఇందిరాపార్క్ ధర్నా చౌక్ వద్ద వరి దీక్ష చేపట్టనున్నారు. టీపీసీసీ అధ్యక్షుడు రేవంత్ రెడ్డి, సీఎల్పీ నేత భట్టి విక్రమార్క తదితర ముఖ్య నేతలు పాల్గొంటారు. 27న రాత్రి ముఖ్య నేతలు ఇందిరా పార్కు వద్దనే బస చేస్తారు.  

కర్షకులకు అండగా కాంగ్రెస్..  27, 28 తేదీలలో ఇందిరాపార్క్ వద్ద రెండు రోజుల వరి దీక్ష కాంగ్రెస్ చేపట్టనుంది. దగా పడుతున్న ధాన్యం రైతులకు అండగా ఉందాం.. ప్రభుత్వాల మెడలు వంచుదాం అన్నదాతను అదుకుందామంటూ టీ కాంగ్రెస్ నేతలు ఈ దీక్షలో పాల్గొంటున్నారని తెలంగాణ కిసాన్ కాంగ్రెస్ తెలిపింది.

27/11/2021 08:32:12

హైదరాబాద్‌లో కాన్ఫెడరేషన్‌ ఆఫ్‌ ఉమెన్‌ ఎంటర్‌ప్రెన్యూర్స్‌ సదస్సు

కాన్ఫెడరేషన్‌ ఆఫ్‌ ఉమెన్‌ ఎంటర్‌ప్రెన్యూర్స్‌ (కోవే) తెలంగాణ చాప్టర్‌ 17వ అవతరణ దినోత్సవం నేడు నిర్వహిస్తున్నారు. హైదరాబాద్‌లోని బేగంపేటలోగల కోవే కార్యాలయంలో నిర్వాహకులు ఈ సదస్సు ఏర్పాటు చేశారు. ఈ కార్యక్రమంలో 40 మంది మహిళా పారిశ్రామికవేత్తలు పాల్గొననున్నారు. బిజినెస్ ప్రారంభం, తమకు ఎదురైన ఇబ్బందులు, వాటిని ఎలా అధిగమించారు.. ఎలాంటి సవాళ్లను ఎదుర్కొని విజయం సాధించారన్నదానిపై మాట్లాడనున్నారు.