Telangana News : తెలంగాణ అసెంబ్లీ ఎన్నికలకు ఈసీ పూర్తి స్థాయిలో ఏర్పాట్లు చేస్తోంది. అన్ని అసెంబ్లీ నియోజకవర్గాలకు రిటర్నింగ్ అధికారులు, సహాయ రిటర్నింగ్ అధికారుల నియామకాన్ని ఖరారు చేసింది. ఓటర్ల జాబితాలో ఏవైనా లోపాలను సరిదిద్దడానికి ఎన్నికల సంఘం ప్రయత్నాలలో భాగంగా ఈ నిర్ణయం తీసుకుంది. రాష్ట్రంలోని 119 అసెంబ్లీ నియోజకవర్గాల రిటర్నింగ్ అధికారులు , అసిస్టెంట్ రిటర్నింగ్ అధికారుల ల జాబితాను తెలంగాణ చీఫ్ ఎలక్టోరల్ ఆఫీసర్ వికాస్ రాజ్ విడుదల చేశారు.
తెలంగాణ సీఈవో సమర్పించిన జాబితా ఆధారంగా రిటర్నింగ్ అధికారుల నియామకాన్ని పరిశీలించి ఖరారు చేసిన అనంతరం భారత ఎన్నికల సంఘం ప్రిన్సిపల్ సెక్రటరీ అవినాష్ కుమార్ ఉత్తర్వులు జారీ చేశారు. భారత ఎన్నికల సంఘం నుంచి అందిన ఆదేశాల మేరకు తెలంగాణలోని అన్ని నియోజకవర్గాలకు రిటర్నింగ్ అధికారుల నియామకానికి సంబంధించి ఉత్తర్వులు జారీ చేస్తున్నట్లు తెలంగాణ ప్రధాన ఎన్నికల అధికారి మెమో జారీ చేశారు సీఈవో తెలంగాణ జారీ చేసిన ఉత్తర్వుల ప్రకారం చాలా అసెంబ్లీ నియోజకవర్గాలకు రెవెన్యూ డివిజనల్ అధికారులను రిటర్నింగ్ అధికారులుగా నియమించనున్నారు. దీంతోపాటు మున్సిపల్ కార్పొరేషన్ కోఆర్డినేటింగ్ అధికారి బాధ్యతను స్పెషల్ డిప్యూటీ కలెక్టర్లు, జోనల్ కమిషనర్లకు అప్పగించారు.
కొన్ని జిల్లాలకు సంబంధించి అదనపు కలెక్టర్లకు రిటర్నింగ్ అధికారుల బాధ్యతలు అప్పగించారు. అంతేకాకుండా అన్ని అసెంబ్లీ నియోజకవర్గాల్లో డివిజన్ల వారీగా అసిస్టెంట్ రిటర్నింగ్ అధికారుల నియామకానికి కూడా ఆమోదం లభించింది. మెజారిటీ తహసీల్దార్లు AROలుగా నియమిస్తారు. అలాగే గ్రేటర్ హైదరాబాద్ మున్సిపల్ కార్పొరేషన్ పరిధిలోని అసెంబ్లీ నియోజకవర్గాలకు మున్సిపల్ అధికారులను నియమిస్తారు.
తెలంగాణలో ఎన్నికల ప్రక్రియను సజావుగా మరియు సమర్ధవంతంగా నిర్వహించడం లక్ష్యంగా ఎన్నికల కమిషన్ ఈ ఖచ్చితమైన నియామక ప్రక్రియ చేపట్టింది. నియమించబడిన అధికారులు తమ తమ నియోజకవర్గాల్లో ఎన్నికలను పర్యవేక్షించడంలో, నిర్వహించడంలో కీలక పాత్ర పోషిస్తారు. అక్టోబర్‌లో తెలంగాణ ఎన్నికలకు షెడ్యూల్ జారీ అయ్యే అనవకాశం ఉంది. డిసెంబర్ మొదటి వారంలో పోలింగ్ ఉంటుందని అంచనా వేస్తున్నారు.