Breaking News Live: తెలంగాణలో ఇంటర్ ఫస్టియర్ విద్యార్థులంతా పాస్... విద్యాశాఖ సంచలన నిర్ణయం
ఏపీ, తెలంగాణ సహా జాతీయ, అంతర్జాతీయ స్థాయిలో నేటి బ్రేకింగ్ న్యూస్ అప్‌డేట్స్ ఇక్కడ పొందొచ్చు. ఈ పేజీ అప్ డేట్ అవుతుంటుంది. తాజా సమాచారం కోసం రీఫ్రెష్ చేస్తుండండి.
తెలంగాణ ప్రభుత్వం ఇంటర్ ఫస్టియర్ విద్యార్థులకు గుడ్ న్యూస్ చెప్పింది. ఇంటర్ ఫస్టియర్ విద్యార్థులందరినీ పాస్ చేస్తునట్లు ప్రకటించింది. ఇటీవల ఫలితాల్లో 49 శాతం మంది మాత్రమే ఉత్తీర్ణులు అయ్యారు. దీనిపై విద్యార్థులు, తల్లిదండ్రులు ఆందోళనకు దిగారు. దీంతో ప్రభుత్వం తాజాగా ఈ నిర్ణయం తీసుకుంది. కనీస మార్కులతో పాస్ చేస్తున్నామని మంత్రి సబితా ఇంద్రారెడ్డి ప్రకటించారు.
హైదరాబాద్ లో విషాద ఘటన చోటుచేసుకుంది. కుకట్ పల్లి హౌస్సింగ్ బోర్డు కాలనీలో ఓ ఆపార్ట్ మెంట్ సెల్లార్ గుంతలో పడి ముగ్గురు బాలికలు మృతి చెందారు. కేపీహెచ్బీ 4వ ఫేజ్ లో ఈ ప్రమాదం జరిగినట్లు తెలుస్తోంది.
కర్నూలు జిల్లాలో థియేటర్లలో జిల్లా కలెక్టర్ కోటేశ్వరరావు ఆకస్మిక తనిఖీలు నిర్వహించారు. థియేటర్లలో ప్రేక్షకులకు కల్పిస్తున్న సౌకర్యాలు, భద్రతా ప్రమాణాలపై ఆరా తీసారు. ఏపీ వ్యాప్తంగా జరుగుతున్న తనిఖీల్లో భాగంగానే థియేటర్లలో ప్రమాణాలు చెక్ చేస్తున్నట్లు కలెక్టర్ తెలిపారు. థియేటర్లలో ధరలు, సౌకర్యాలు వివరాలు ఆరాతీస్తున్నారు.
మధ్యాహ్న భోజనం ఎత్తివేసి పేదలకు విద్యను దూరం చేసే కుట్ర జరుగుతోందని టీపీసీసీ సీనియర్ ఉపాధ్యక్షుడు మల్లు రవి ఆరోపించారు. తెలంగాణలో మధ్యాహ్న భోజన పథకాన్ని ఎత్తివేసి పేద విద్యార్థులను చదువుకు దూరం చేసే కుట్ర జరుగుతోందని మల్లు రవి విమర్శించారు. రాష్ట్రంలో లక్షలాది మంది పేద విద్యార్థులకు ఏంతో ఉపయోగకరంగా ఉండి, పాఠశాలలో పేద విద్యార్థులను చేర్పించేందుకు అవకాశాలు ఉండేవన్నారు. ఇప్పుడు ప్రభుత్వం మధ్యాహ్న భోజన పథకానికి నిధులు విడుదల చేయకుండా నిలిపి వేసిందని, దీంతో నిధుల కొరత ఏర్పడి పాఠశాలలో మధ్యాహ్న భోజన పథకం ఆగిపోయిందని చెప్పారు.
గుంటూరు: తుళ్లూరు పోలీసులపై మంగళగిరి కోర్టు జడ్జి ఆగ్రహం వ్యక్తం చేశారు. సీఐ దుర్గాప్రసాద్ సహా పలువురు పోలీసులపై చర్యలకు ఆదేశించారు. ఓ కేసులో రాత్రి 8 మందిని జడ్జి ఎదుట- పోలీసులు హాజరుపరిచారు. తమను పోలీసులు చిత్రహింసలకు గురిచేశారని జడ్జి ఎదుట నిందితులు వాపోయారు. వైద్య పరీక్షల కోసం వారిని న్యాయమూర్తి జీజీహెచ్‍కు పంపాలని సూచించారు. నిందితులకు గాయాలు ఉన్నట్లు జీజీహెచ్ వైద్యులు నివేదిక ఇచ్చారు. 8 మంది నిందితుల రిమాండ్ రద్దు చేసి విడుదల చేయాలని మంగళగిరి కోర్టు జడ్జి ఆదేశించారు. నిందితులను కొట్టిన పోలీసులపై చర్యలు తీసుకోవాలని డీఎస్పీకి ఆదేశాలు జారీ చేశారు.
శ్రీలంక ప్రధాని మహింద రాజపక్సే శ్రీవారిని దర్శించుకున్నారు. సతీసమేతంగా రాజపక్సే శుక్రవారం ఉదయం తిరుమల శ్రీవారిని దర్శించుకున్నారు. నేటి ఉదయం ఆలయం వద్దకు చేరుకున్న శ్రీలంక ప్రధాని రాజపక్సేకు టీటీడీ జేఈఓ వీరబ్రహ్మం, సివిఎస్వో గోపినాథ్ జెట్టి మ‌హ‌ద్వారం వద్ద సంప్రదాయబద్ధంగా స్వాగతం పలికి దర్శన ఏర్పాట్లు చేశారు. శ్రీవారిని దర్శించుకున్న అనంతరం ఆలయంలోని రంగనాయకుల మండపంలో వేదపండితులు రాజపక్సే దంపతులకు వేదాశీర్వచనం చేశారు. ఆ త‌రువాత జెఈవో తీర్థప్రసాదాలు, శ్రీవారి చిత్రపటం వారికి అందించారు. ఈ కార్యక్రమంలో రాష్ట్ర ఉప‌ముఖ్య‌మంత్రి నారాయ‌ణ‌స్వామి, అర్బన్ ఎస్పీ వెంకట అప్పల నాయుడు, ఆలయ డెప్యూటీ ఈవో రమేష్ బాబు, రిసెప్షన్ డెప్యూటీ ఈఓ లోకనాథం తదితరులు పాల్గొన్నారు.
బంగ్లాదేశ్‌లోని ఢాకాలో అత్యంత దారుణమైన ప్రమాదం చోటు చేసుకుంది. ఏకంగా 32 మంది ప్రయాణికులు సజీవంగా దహనమయ్యారు. ఓ ఓడలో జరిగిన అగ్ని ప్రమాదం కారణంగా ఈ ఘోరం చోటు చేసుకుంది. ఝలోకరి అనే నదిపై మూడు అంతస్తుల ఓడ ప్రయాణిస్తుండగా.. అందులో ఒక్కసారిగా మంటలు వ్యాపించాయి. దీంతో ప్రాణాలు కాపాడుకునేందుకు చాలా మంది ప్రయాణికులు నదిలోకి దూకేశారు. మంటల్లో చిక్కుకొని 32 మంది మరణించారు. చనిపోయిన వారి సంఖ్య ఇంకా పెరిగే అవకాశం ఉందని అధికారులు తెలిపారు.
తిరుపతిలోని పద్మావతి మహిళా విశ్వవిద్యాలయంలో నిన్న రాత్రి క్రిస్మస్ వేడుకలు నిర్వహించడం తీవ్ర చర్చనీయాంశంగా మారుతోంది. టీటీడీ ఆధ్వర్యంలో నడిచే మహిళా విశ్వవిద్యాలయంలో అన్య మతాలకు సంబంధించిన వేడుకలు నిషేధం ఉన్నప్పటికీ క్రిస్మస్ వేడుకలు జరిపారు. సాక్షాత్తు పద్మావతి అమ్మవారి పేరుతో నడుపబడే మహిళా విశ్వవిద్యాలయంలో జరిగిన క్రిస్మస్ వేడుకల్లో వందలాది మంది విద్యార్థులు, అధ్యాపకులు పాల్గొన్నారు. దీనిపై హిందూ ధార్మిక సంఘాలు తీవ్ర ఆగ్రహం వ్యక్తం చేస్తున్నాయి. శ్రీవారి నిధులతో నడిచే యూనివర్సిటీలో అన్యమత వేడుకలు జరగడంపై మండి పడుతున్నారు. మహిళా యూనివర్సిటీ అధికారులు, అధ్యాపకుల సమక్షంలో వేడుకలు జరపడంపై భగ్గుమంటున్నారు హిందూ సంఘాలు. దీనిపై టీటీడీ వెంటనే సమాధానం చెప్పడమే కాకుండా సంబంధిత అధికారులపై చర్యలు తీసుకోవాలని డిమాండ్ చేస్తున్నారు.
నల్గొండ జిల్లాలో విషాదం చోటు చేసుకుంది. జిల్లాలోని దామెరచర్ల మండలం నునావత్ తండాలో ఇద్దరు పిల్లలతో సహా ఉరి వేసుకుని తండ్రి ఆత్మహత్య చేసుకున్నాడు. దీనికి సంబంధించి పూర్తి వివరాలు తెలియాల్సి ఉంది.
Background
నడిరోడ్డుపై నెలలు నిండని పిండం
హైదరాబాద్‌లో నెలలు నిండని పిండం అల్వాల్ సమీపంలోని అంజనాపురి కాలనీ వీధిలో కనిపించడం కలకలం సృష్టించింది. అల్వాల్ పోలీసులు తెలిపిన వివరాల ప్రకారం.. మచ్చబొల్లారం డివిజన్‌లోని అంజనాపురి కాలనీ వీధిలో ఉదయం సుమారు 4 నెలల వయసున్న పిండం రోడ్డుపై పడి ఉంది. కుక్కలు పీక్కుతింటుండడంతో స్థానికులు గమనించి పోలీసులకు సమాచారం అందించారు. పంచనామా చేసిన అనంతరం పోలీసులు స్థానికంగా ఓ నిర్జీవ ప్రదేశంలో పిండాన్ని పాతిపెట్టారు. సీసీటీవీ ఫుటేజీలను పరిశీలించినా వారికి ఎలాంటి సమాచారమూ లభించలేదు. దర్యాప్తు చేస్తున్నట్లు పోలీసులు తెలిపారు.
ఫుడ్ డెలివరీ బాయ్స్ ముసుగులో దొంగలు
హైదరాబాద్‌లోని వివిధ ప్రాంతాల్లో ఇళ్లలోని ల్యాప్‌టా‌ప్‌లను దొంగిలించే ఓ ముఠాను కూకట్‌పల్లి పోలీసులు అరెస్టు చేశారు. సంగారెడ్డికి చెందిన పాటిల్‌ శివాజీ, బోయిన్‌ వెంకటేశం, అజ్జంపల్లి గోవర్ధన్‌రెడ్డి అనే వ్యక్తులు కూకట్‌పల్లి ఎల్లమ్మబండలో ఉంటూ ఫుడ్ డెలివరీ బాయ్స్‌గా పనిచేస్తున్నారు. వీరు ముఠాగా ఏర్పడి దొంగతనాలు చేయడం మొదలు పెట్టారు. కొద్దిరోజులుగా ఫుడ్ డెలివరీ బాయ్స్‌గా పనిచేస్తూ రెక్కీ నిర్వహించేవారు. ఇళ్లలోని కిటికీలు, తలుపుల వద్ద అందుబాటులో ఉన్న వాటిని దొంగిలించేవారు. తాజాగా పోలీసులు వీరిని అరెస్టు చేశారు.
వాతావరణం
చలి గాలుల ప్రభావం తెలుగు రాష్ట్రాలపై అధికంగా ఉంటుంది. ఓ వైపు తక్కువ ఎత్తులో ఉత్తర దిశ నుంచి వీస్తున్న గాలులతో ఉత్తరాంధ్రలో, తూర్పు దిశ నుంచి వీస్తున్న గాలులతో దక్షిణ ఆంధ్రప్రదేశ్, రాయలసీమలో ఉష్ణోగ్రతలు భారీగా పడిపోతున్నాయి. ఉత్తర, తూర్పు దిశల నుంచి వీస్తున్న గాలుల ప్రభావంతో ఉత్తర కోస్తాంధ్ర, యానాం ప్రాంతాలలో నేటి నుంచి మరో మూడు రోజులపాటు ఉష్ణోగ్రతలు మరింత తగ్గనున్నాయని అమరావతి వాతావరణ కేంద్రం తెలిపింది. సగటు ఉష్ణోగ్రతల కంటే 2 నుంచి 4 డిగ్రీల సెంటిగ్రేడ్ వరకు తక్కువా నమోదు కానున్నాయి. కొన్ని చోట్ల పొగ మంచు కురియడంతో చలి తీవ్రత అధికంగా ఉంటుందని అధికారులు హెచ్చరించారు.
పలు ప్రాంతాల్లో కనిష్ఠ ఉష్ణోగ్రతలు సగటు కంటే 4 నుంచి 5 డిగ్రీలు తక్కువగా నమోదవుతున్నాయి. పాడేరు ఏజెన్సీలో కనిష్టం 6 డిగ్రీలుగా నమోదైంది. తూర్పు గోదావరి, పశ్చిమ గోదావరి, కృష్ణా, గుంటూరు జిల్లాల్లో దట్టమైన పొగ మంచు కురిసే అవకాశాలు ఉన్నాయి. ముఖ్యంగా కొనసీమ ప్రాంతాలైన అమలాపురం, రాజోలులో.. గుంటూరు, విజయవాడ ప్రాంతాల్లోనూ పొగ మంచు దట్టంగా కురవడంతో ఉష్ణోగ్రతలు పడిపోనున్నాయి. ఉదయం వేళ ప్రయాణం చేసేవారు జాగ్రత్తలు తీసుకోవడం చాలా ముఖ్యమని సూచించారు. నెల్లూరు జిల్లాలో కూడ పొగ మంచు కురవనుంది. తెలంగాణ రాష్ట్రం నుంచి చలి గాలులు వీస్తున్నాయి కనుక చల్లదనం ఎక్కువై ఉష్ణోగ్రతలు భారీ పడిపోతాయి. మరోవైపు సముద్రం నుంచి వీస్తున్న గాలులతో ప్రజలకు చలి మరింత ఎక్కువ కానుందని సూచించారు.
పెట్రోల్, డీజిల్ ధరలు
హైదరాబాద్‌లో పెట్రోల్ డీజిల్ ధరలు గత కొద్ది రోజులుగా నిలకడగానే ఉంటున్నాయి. నేడు కూడా పెట్రోల్ ధర లీటరుకు రూ.108.20గా.. డీజిల్ ధర లీటరుకు రూ.94.62 గా నిలకడగానే కొనసాగుతోంది. ఇక వరంగల్‌లో కూడా నేడు (డిసెంబరు 24) పెట్రోల్ ధర రూ.107.69 గా స్థిరంగానే కొనసాగుతోంది. డీజిల్ ధర రూ.94.14 గానే ఉంటోంది. కొద్ది రోజులుగా వరంగల్‌లో ఈ ధరలే ఉంటున్నాయి. వరంగల్ రూరల్ జిల్లాలో సైతం ఇవే ఇంధన ధరలు కొనసాగుతున్నాయి. నిజామాబాద్‌లో ఇంధన ధరలు నేడు కాస్త పెరిగాయి. పెట్రోల్ ధర లీటరుకు రూ.0.24 పైసలు పెరిగి రూ.109.93 గా ఉంది. డీజిల్ ధర రూ.0.22 పైసలు పెరిగి రూ.96.23 గా ఉంది. గత కొన్ని రోజులుగా నిజామాబాద్‌లో ఇతర ప్రాంతాలతో పోలిస్తే ఇంధన ధరల్లో హెచ్చుతగ్గులు ఎక్కువగా కనిపిస్తున్నాయి.
ఇక విజయవాడ మార్కెట్‌లో పెట్రోల్ ధర నేడు స్వల్పంగా తగ్గింది. లీటరు ధర ప్రస్తుతం రూ.0.06 పైసలు తగ్గి రూ.110.29 గా ఉంది. డీజిల్ ధర రూ.0.08 పైసలు తగ్గి రూ.96.36గా ఉంది. అయితే, అమరావతి ప్రాంతంలో కొద్ది రోజుల ఇంధన ధరలు గమనిస్తే స్వల్పంగా హెచ్చుతగ్గులు ఉన్నాయి. విశాఖపట్నం మార్కెట్‌లో పెట్రోల్ ధర ప్రస్తుతం రూ.109.05గా ఉంది. పాత ధరతో పోలిస్తే ఏకంగా రూ.0.70 పైసలు తగ్గింది. డీజిల్ ధర విశాఖపట్నంలో రూ.95.18 గా ఉంది. ఇది రూ.0.65 పైసలు తగ్గింది.
బంగారం, వెండి ధరలు
తెలుగు రాష్ట్రాల్లో బంగారం ధర నేడు పెరిగింది. గ్రాముకు రూ.20 వరకూ తగ్గి పది గ్రాములకు రూ.200 వరకూ తేడా కనిపించింది. ముందు రోజు గ్రాముకు రూ.15 తగ్గిన సంగతి తెలిసిందే. వెండి ధర కిలోకు రూ.0.40 పైసలు పెరిగింది. తాజాగా 22 క్యారెట్ల 10 గ్రాముల (తులం) బంగారం ధర, ఇవాళ హైదరాబాద్ మార్కెట్‌లో రూ.45,350 గా ఉంది. 24 క్యారెట్ల ప్యూర్ బంగారం ధర ప్రస్తుతం రూ.49,480 గా ఉంది. ఇక స్వచ్ఛమైన వెండి ధర హైదరాబాద్ మార్కెట్‌లో కిలో రూ.66,200గా ఉంది. తెలంగాణ వ్యాప్తంగా మిగతా నగరాల్లోనూ ఇవే ధరలు అమల్లో ఉంటున్నాయి.
ఇక విశాఖపట్నం మార్కెట్‌లోనూ 22 క్యారెట్ల బంగారం ధర రూ.45,350 గా ఉండగా.. 24 క్యారెట్ల బంగారం ధర రూ.49,480గా ఉంది. ఇక్కడ వెండి ధర హైదరాబాద్ తరహాలోనే కిలో రూ.66,200 గా ఉంది. విజయవాడలోనూ పసిడి ధర పెరిగింది. 22 క్యారెట్ల ఆర్నమెంటు బంగారం ధర నేడు రూ.45,350 గా ఉంది. 24 క్యారెట్ల బిస్కెట్ బంగారం ధర రూ.49,480గా ఉంది. ఇక్కడ కిలో వెండి ధర రూ.66,200గా ఉంది.
- - - - - - - - - Advertisement - - - - - - - - -