Vivo X100 Ultra: వివో ఎక్స్100 సిరీస్‌లో కొత్త ఫోన్లు రెడీ - లాంచ్ ఎప్పుడంటే?

Vivo X100s: ప్రముఖ స్మార్ట్ ఫోన్ బ్రాండ్ వివో తన కొత్త స్మార్ట్ ఫోన్లను లాంచ్ చేయడానికి రెడీ అవుతోంది. ఇందులో వివో ఎక్స్100 అల్ట్రా, వివో ఎక్స్100ఎస్, వివో ఎక్స్100ఎస్ ప్రో ఫోన్లు ఉండనున్నాయి.

Vivo X100s Pro: వివో ఎక్స్100 సిరీస్‌లో కొత్త ఫోన్లు చైనాలో వచ్చే వారం లాంచ్ కానున్నాయి. ఈ సిరీస్‌లో వివో ఎక్స్100 అల్ట్రా, వివో ఎక్స్100ఎస్, వివో ఎక్స్100ఎస్ ప్రో ఫోన్లు ఉండనున్నాయి. వీటికి సంబంధించిన ప్రీ-రిజర్వేషన్లు చైనాలో ఇప్పటికే ప్రారంభం అయ్యాయి. వీటిలో 16 జీబీ వరకు ర్యామ్, 1 టీబీ వరకు స్టోరేజ్ ఉండనున్నాయి. దీనికి సంబంధించిన ధరలు కూడా ఇప్పుడు లీకయ్యాయి.

మే 13వ తేదీన లాంచ్...
వివో ఎక్స్100 అల్ట్రా (Vivo X100 Ultra), వివో ఎక్స్100ఎస్ (Vivo X100s), వివో ఎక్స్100 ప్రో స్మార్ట్ ఫోన్లు మే 13వ తేదీన లాంచ్ కానున్నట్లు వీబో ద్వారా కంపెనీ రివీల్ చేసింది. ఈ మూడు ఫోన్లకు సంబంధించిన కలర్ ఆప్షన్లు కూడా ఆన్‌లైన్‌లో లీకయ్యాయి. వివో ఎక్స్100 అల్ట్రా, ఎక్స్100ఎస్ ప్రో ఫోన్లను స్పేస్ గ్రే, టైటానియం, వైట్ మూన్‌లైట్ కలర్ ఆప్షన్లలో కొనుగోలు చేయవచ్చు. వివో ఎక్స్100ఎస్‌ స్పేస్ గ్రే, బ్లూ క్లౌడ్, టైటానియం, వైట్ మూన్‌లైట్ రంగుల్లో అందుబాటులో ఉంది. వీటిలో జీస్ బ్రాండెడ్ కెమెరాలు ఉన్నాయి.

1 టీబీ వరకు స్టోరేజ్
చైనీస్ టిప్‌స్టర్ డిజిటల్ చాట్ స్టేషన్ పోస్టు ప్రకారం... వివో ఎక్స్100 అల్ట్రా, వివో ఎక్స్100ఎస్ ఫోన్లు మూడు ర్యామ్, స్టోరేజ్ వేరియంట్లలో అందుబాటులో ఉన్నాయి. 12 జీబీ ర్యామ్ + 256 జీబీ స్టోరేజ్, 16 జీబీ ర్యామ్ + 512 జీబీ స్టోరేజ్, 16 జీబీ ర్యామ్ + 1 టీబీ స్టోరేజ్ వేరియంట్లలో దీన్ని కొనుగోలు చేయవచ్చు. ఇక వివో ఎక్స్100ఎస్ 12 జీబీ ర్యామ్ + 256 జీబీ స్టోరేజ్, 16 జీబీ ర్యామ్ + 256 జీబీ స్టోరేజ్, 16 జీబీ ర్యామ్ + 512 జీబీ స్టోరేజ్, 16 జీబీ ర్యామ్ + 1 టీబీ స్టోరేజ్ మోడల్స్‌లో అందుబాటులో ఉండనుందని సమాచారం.

ధర ఎంత ఉండవచ్చు?
భారతీయ టిప్‌స్టర్ అభిషేక్ యాదవ్ ఈ ఫోన్ల ధరలను లీక్ చేశాడు. దీని ప్రకారం వివో ఎక్స్100 అల్ట్రా (Vivo X100 Ultra Price) ధర 6,699 చైనీస్ యువాన్ల (మనదేశ కరెన్సీలో సుమారు రూ.77,500) నుంచి ప్రారంభం కానుంది. వివో ఎక్స్100ఎస్ ధర (Vivo X100s Price) 3,999 చైనీస్ యువాన్ల (మనదేశ కరెన్సీలో సుమారు రూ.46,200) నుంచి, వివో ఎక్స్100ఎస్ ప్రో (Vivo X100 Pro Price) ధర 4,999 చైనీస్ యువాన్ల (మనదేశ కరెన్సీలో సుమారు రూ.57,000) నుంచి ప్రారంభం కానుందని తెలుస్తోంది.

ఇండియా లాంచ్ ఉంటుందా? (Vivo X100 Ultra India Launch)
చైనాలో వివో ఎక్స్100ఎస్, వివో ఎక్స్100ఎస్ ప్రోలకు సంబంధించిన సేల్ మే 17వ తేదీ నుంచి ప్రారంభం కానుంది. వివో ఎక్స్100 అల్ట్రా సేల్ మే 28 నుంచి జరగనుంది. మనదేశంలో ఈ ఫోన్లు ఎప్పుడు లాంచ్ అవుతాయో తెలియరాలేదు. కానీ కచ్చితంగా లాంచ్ అవుతాయని మాత్రం చెప్పవచ్చు.