జియో ఫోన్ 5జీ ఇటీవలే బ్యూరో ఆఫ్ ఇండియన్ స్టాండర్డ్స్ వెబ్ సైట్లో కనిపించింది. దీన్ని బట్టి ఈ ఫోన్ త్వరలో మనదేశంలో లాంచ్ కానుందని అంచనా వేయవచ్చు. 2022 జులైలో ఈ ఫోన్ లాంచ్ అవుతుందని అందరూ అనుకున్నారు. కానీ అది వాయిదాలు పడుతూనే ఉంది.
క్వాల్‌కాం స్నాప్‌డ్రాగన్ 480 ప్లస్ ప్రాసెసర్‌పై ఈ ఫోన్ పని చేయనుందని వార్తలు వస్తున్నాయి. 4 జీబీ ర్యామ్, 32 జీబీ స్టోరేజ్ ఇందులో ఉండనున్నాయని తెలుస్తోంది. ఫోన్ వెనకవైపు 13 మెగాపిక్సెల్ డ్యూయల్ కెమెరాను అందిస్తున్నారు. LS1654QB5 మోడల్ నంబర్‌తో ఈ ఫోన్ బీఐఎస్ డేటాబేస్‌లో కనిపించింది. బీఐఎస్ లిస్టింగ్‌లో స్పెసిఫికేషన్లను ఎక్కువగా ఉంచరు. ఇది మనదేశంలోనే అత్యంత చవకైన 5జీ ఫోన్ కానుందని సమాచారం.
జియోఫోన్ 5జీ స్పెసిఫికేషన్లు (అంచనా)
ఆండ్రాయిడ్ 12 ఆపరేటింగ్ సిస్టంపై ఈ ఫోన పని చేయనుందని తెలుస్తోంది. ఇందులో 6.5 అంగుళాల హెచ్‌డీ+ ఎల్సీడీ డిస్‌ప్లేను అందించనున్నారు. దీని స్క్రీన్ రిఫ్రెష్ రేట్ 90 హెర్ట్జ్‌గా ఉంది. క్వాల్‌కాం స్నాప్‌డ్రాగన్ 480 ప్లస్ ప్రాసెసర్‌పై ఈ ఫోన్ పని చేయనుంది. 4 జీబీ ఎల్పీడీడీఆర్4ఎక్స్ ర్యామ్, 32 జీబీ స్టోరేజ్ ఇందులో ఉండనున్నాయి.
ఇక కెమెరాల విషయానికి వస్తే... ఫోన్ వెనకవైపు రెండు కెమెరాలు ఉండనున్నాయని తెలుస్తోంది. వీటిలో ప్రధాన కెమెరా సామర్థ్యం 13 మెగాపిక్సెల్ కాగా, దీంతోపాటు 2 మెగాపిక్సెల్ మాక్రో సెన్సార్ కూడా ఉన్నాయి. సెల్ఫీలు, వీడియో కాల్స్ కోసం ముందువైపు 8 మెగాపిక్సెల్ కెమెరా ఉంది. దీని బ్యాటరీ సామర్థ్యం 5000 ఎంఏహెచ్ కాగా, 18W ఫాస్ట్ చార్జింగ్‌ను ఈ ఫోన్ సపోర్ట్ చేయనుంది.
జియో ఈ ఫోన్ కోసం గూగుల్‌తో భాగస్వామ్యం కుదుర్చుకున్నట్లు తెలుస్తోంది. ఈ ఫోన్ మనదేశంలో LYF బ్రాండింగ్‌తో లాంచ్ అయ్యే అవకాశం ఉంది. దీని ధర మనదేశంలో రూ.8 వేల నుంచి రూ.12 వేల మధ్యలో ఉండనుందని గతంలో లీకులు వచ్చాయి.
Also Read: ఐఫోన్ 14 సిరీస్ వ‌చ్చేసింది - ధర విషయంలో జాగ్రత్త పడ్డ యాపిల్ - మనదేశంలో ఎంతంటే?