ఇన్‌ఫీనిక్స్ హాట్ 12 ప్లే స్మార్ట్ ఫోన్ మనదేశంలో లాంచ్ అయింది. గతేడాది నవంబర్‌లో లాంచ్ అయిన హాట్ 11 ప్లేకు తర్వాతి వెర్షన్‌గా ఈ ఫోన్ లాంచ్ అయింది. ఇందులో హోల్ పంచ్ తరహా డిజైన్ అందించారు. వెనకవైపు రెండు కెమెరాలు ఉన్నాయి. 6000 ఎంఏహెచ్ భారీ బ్యాటరీ కూడా ఇందులో ఉంది. యూనిసోక్ టీ610 ప్రాసెసర్‌పై ఈ ఫోన్ పనిచేయనుంది.
ఇన్‌ఫీనిక్స్ హాట్ 12 ప్లే ధర
ఈ స్మార్ట్ ఫోన్‌లో కేవలం ఒక్క వేరియంట్ మాత్రమే అందుబాటులో ఉంది. 4 జీబీ ర్యామ్ + 64 జీబీ స్టోరేజ్‌తో వచ్చిన ఈ వేరియంట్ ధరను రూ.8,499గా నిర్ణయించారు. షాంపేన్ గోల్డ్, డేలైట్ గ్రీన్, హారిజన్ బ్లూ, రేసింగ్ బ్లాక్ కలర్ ఆప్షన్లలో ఈ ఫోన్ కొనుగోలు చేయవచ్చు. మే 30వ తేదీ నుంచి ఫ్లిప్‌కార్ట్‌లో దీని సేల్ జరగనుంది.
ఇన్‌ఫీనిక్స్ హాట్ 12 స్పెసిఫికేషన్లు
ఆండ్రాయిడ్ 11 ఆధారిత ఎక్స్ఓఎస్ 10 ఆపరేటింగ్ సిస్టంపై ఈ ఫోన్ పనిచేయనుంది. 6.82 అంగుళాల ఫుల్ హెచ్‌డీ+ డిస్‌ప్లేను అందించారు. దీని స్క్రీన్ రిఫ్రెష్ రేట్ 90 హెర్ట్జ్‌గా ఉంది. 180 హెర్ట్జ్ టచ్ శాంప్లింగ్ రేట్ ఫీచర్‌ను కూడా అందించారు. దీని పీక్ బ్రైట్‌నెస్ 480 నిట్స్ కాగా... స్క్రీన్ టు బాడీ రేషియో 90.66గా ఉంది.
6000 ఎంఏహెచ్ భారీ బ్యాటరీని ఇందులో అందించారు. 10W ఫాస్ట్ చార్జింగ్‌ను ఈ ఫోన్ సపోర్ట్ చేయనుంది. ఆక్టాకోర్ యూనిసోక్ టీ610 ప్రాసెసర్‌పై ఈ ఫోన్ పని చేయనుంది. 4 జీబీ ర్యామ్ ఉంది. ర్యామ్‌ను ఎక్స్‌ప్యాన్షన్ ఫీచర్ ద్వారా మరో 3 జీబీ వరకు పెంచుకోవచ్చు. అంటే మొత్తంగా 7 జీబీ వరకు ర్యామ్ ఇందులో ఉండనుందన్న మాట. 64 జీబీ స్టోరేజ్ అందించారు. స్టోరేజ్‌ను మైక్రో ఎస్‌డీ కార్డు ద్వారా 256 జీబీ వరకు పెంచుకోవచ్చు.
4జీ ఎల్టీఈ, జీఎస్ఎం, వైఫై, బ్లూటూత్ వీ5, జీపీఎస్/ఏ-జీపీఎస్ వంటి కనెక్టివిటీ ఫీచర్లు ఇందులో ఉన్నాయి. యాంబియంట్ లైట్ సెన్సార్, జీ-సెన్సార్, ఈ-కంపాస్, గైరోస్కోప్, ప్రాక్సిమిటీ సెన్సార్లు కూడా ఇందులో ఉన్నాయి. ఫోన్ పక్కభాగంలో ఫింగర్ ప్రింట్ సెన్సార్‌ను అందించారు. దీని మందం 0.89 సెంటీమీటర్లు కాగా... బరువు 209 గ్రాములుగా ఉంది.
Also Read: వన్‌ప్లస్ 10ఆర్ వచ్చేసింది - ఏకంగా 150W ఫాస్ట్ చార్జింగ్ - ధర ఎంతంటే?
Also Read: రూ.10 వేలలోనే ట్యాబ్లెట్ - లాంచ్ చేసిన రియల్‌మీ - ఎలా ఉందో చూశారా!