Apple Event: యాపిల్ ఫార్అవుట్ ఈవెంట్ నేడే - ఐఫోన్ 14 సిరీస్ లాంచ్ - లైవ్ ఎలా చూడాలి?

ఐఫోన్ 14 సిరీస్ ఫోన్లను యాపిల్ నేడు లాంచ్ చేయనుంది. నేడు జరగనున్న యాపిల్ ఫార్ అవుట్ ఈవెంట్లో ఇవి లాంచ్ కానున్నాయి.

యాపిల్ ఫార్ అవుట్ ఈవెంట్ నేడు (సెప్టెంబర్ 7వ తేదీ) జరగనుంది. భారత కాలమానం ప్రకారం రాత్రి 10:30 గంటలకు ఈ ఈవెంట్ ప్రారంభం కానుంది. ఐఫోన్ 14, ఐఫోన్ 14 ప్రో, ఐఫోన్ 14 మ్యాక్స్, ఐఫోన్ 14 ప్రో మ్యాక్స్ ఈ ఈవెంట్లో లాంచ్ కానున్నాయి.

లైవ్ స్ట్రీమింగ్ చూడటం ఎలా?
సెప్టెంబర్ 7వ తేదీన భారత కాలమానం ప్రకారం రాత్రి 10:30 గంటలకు ప్రారంభం అయ్యే ఈవెంట్‌ను యాపిల్ యూట్యూబ్ చానెల్లో లైవ్ చూడవచ్చు. యాపిల్ టీవీ యాప్ ద్వారా కూడా ఈ కార్యక్రమాన్ని లైవ్ స్ట్రీమ్ చేయవచ్చు.

ఏమేం లాంచ్ కానున్నాయి?
ఐఫోన్ 14, ఐఫోన్ 14 ప్రో, ఐఫోన్ 14 మ్యాక్స్, ఐఫోన్ 14 ప్రో మ్యాక్స్‌లు ఈ ఈవెంట్లో లాంచ్ కానున్నాయి. వీటితో పాటు యాపిల్ వాచ్ సిరీస్ 8, వాచ్ ప్రో కూడా ఈ సిరీస్‌లో మార్కెట్లోకి ఎంట్రీ ఇవ్వనున్నారు. యాపిల్ ఎయిర్‌పోడ్స్ ప్రో 2ను కూడా కంపెనీ తీసుకురానుంది.

ఐఫోన్ 14 సిరీస్ స్మార్ట్ ఫోన్ల ధర కూడా ఇటీవలే ఆన్‌లైన్‌లో లీకైంది. ఈ కథనాల ప్రకారం... సిరీస్ ధర 749 డాలర్ల (సుమారు రూ.60,000) నుంచి ప్రారంభం కానుందని వార్తలు వస్తున్నాయి. దీన్ని బట్టి చూస్తే మనదేశంలో దాదాపు రూ.75 వేల నుంచి రూ.80 వేల మధ్య నుంచి ఐఫోన్ 14 సిరీస్ ధర ప్రారంభం కానుంది.

ట్రెండ్ ఫోర్స్ అనే వెబ్ సైట్ కథనం ప్రకారం... ఐఫోన్ 14 ధర 749 డాలర్ల (సుమారు రూ.60,000), ఐఫోన్ మ్యాక్స్ ధర 849 డాలర్ల (సుమారు రూ.68,000), ఐఫోన్ 14 ప్రో ధర 1,049 డాలర్ల (సుమారు రూ.83,000), ఐఫోన్ 14 ప్రో మ్యాక్స్ ధర 1,149 డాలర్ల (సుమారు రూ.91,000) నుంచి ప్రారంభం కానుంది.

ఐఫోన్ 14 మ్యాక్స్ స్పెసిఫికేషన్లు, ఫీచర్లు (అంచనా)
లీకైన వివరాల ప్రకారం... ఐఫోన్ 14 మ్యాక్స్ స్మార్ట్ ఫోన్‌లో 6.68 అంగుళాల ఫ్లెక్సిబుల్ ఓఎల్ఈడీ డిస్‌ప్లే అందించనున్నారు. దీని స్క్రీన్ రిఫ్రెష్ రేట్ 90 హెర్ట్జ్ కాగా... పిక్సెల్ డెన్సిటీ 458 పిక్సెల్స్ పర్ ఇంచ్‌గా ఉండనుంది. 6 జీబీ వరకు ఎల్పీడీడీఆర్4ఎక్స్ ర్యామ్ ఇందులో అందుబాటులో ఉండనుంది.

యాపిల్ లేటెస్ట్ ప్రాసెసర్ ఏ15 బయోనిక్ చిప్‌ను ఐఫోన్ 14 మ్యాక్స్‌లో అందించే అవకాశం ఉంది. ఐఫోన్ 13 సిరీస్, ఐఫోన్ ఎస్ఈ (2022) స్మార్ట్ ఫోన్లలో కూడా ఇదే ప్రాసెసర్‌ను కంపెనీ అందించింది. అయితే యాపిల్ ప్రస్తుతం కొత్త ఏ16 బయోనిక్ ప్రాసెసర్‌ను రూపొందించనుందని అవి ఐఫోన్ 14 ప్రో, ఐఫోన్ 14 ప్రో మ్యాక్స్‌ల్లో ఉండనున్నాయని గతంలో వార్తలు వచ్చాయి. ఏ ప్రాసెసర్ ఉండనుందో తెలియాలంటే మాత్రం సెప్టెంబర్ వరకు ఆగాల్సిందే.

ఈ స్మార్ట్ ఫోన్‌లో వెనకవైపు రెండు కెమెరాలు అందించనున్నట్లు తెలుస్తోంది. వీటి సామర్థ్యం 12 మెగాపిక్సెల్‌గా ఉండే అవకాశం ఉంది. 512 జీబీ, 1 టీబీ స్టోరేజ్ వేరియంట్లు ఇందులో ఉండే అవకాశం ఉంది. ఇందులో నాచ్, ఫేస్ ఐడీ రికగ్నిషన్ వంటి ఫీచర్లు కూడా ఉండనున్నాయి.