Wimbledon 2024 Womens Single Winner : మహిళల వింబుల్డన్ గ్రాండ్ స్లామ్ లో కొత్త విజేత ఆవిర్భవించింది. వింబుల్డన్ 2024 మహిళల సింగిల్స్ కొత్త ఛాంపియన్గా చెక్ రిపబ్లిక్ క్రీడాకారిణి బార్బర క్రెజికోవా అవతరించింది. శనివారం (జూలై 13న ) జరిగిన సింగిల్స్ ఫైనల్లో ఇటలీకి చెందిన జాస్మిన్ పావోలినిపై 6-2, 2-6, 6-4 తేడాతో గెలుపొందింది.
ఈ ఇద్దరికీ ఇదే తొలి వింబుల్డన్ ఫైనల్. కానీ ఒత్తిడిని జయిస్తూ క్రెజికోవా విజయం సాధించింది. తాజా విజయంతో క్రెజికోవా ఖాతాలో రెండో గ్రాండ్‌స్లామ్‌ చేరింది. మూడేళ్ల కిందట 2021లో జరిగిన ఫ్రెంచ్ ఓపెన్ విజేతగా క్రెజికోవా నిలవడం తెలిసిందే.
తొలి సెట్ ను 6-2తో చెక్ రిపబ్లిక్ ప్లేయర్ క్రెజికోవా నెగ్గింది. రెండో సెట్లో ఇటలీ భామ జాస్మిన్ నుంచి క్రేజికోవాకు గట్టి పోటి ఎదురైంది. 2-6 తో జాస్మిన్ రెండో సెట్ కొట్టింది. ఇక కీలకమైన మూడో సెట్లో ఇద్దరు హోరాహోరీగా తలపడ్డారు. కానీ గతంలో ఫ్రెంచ్ ఓపెన్ నెగ్గిన అనుభవంతో జాస్మిన్ పై క్రెజికోవా పైచేయి సాధిస్తూ సెట్ నెగ్గడంతో వింబుల్డన్ సింగిల్స్ ఛాంపియన్గా చ‌రిత్ర సృష్టించింది. ఈ గ్రాండ్ స్లామ్ ట్రోఫీతో ఏకంగా రూ.28.5 కోట్ల ప్రైజ్‌మ‌నీని చెక్ రిపబ్లిక్ భామ క్రెజికోవా సొంతం చేసుకుంది.
గత 8 ఏళ్లుగా వింబుల్డన్ లో సరికొత్త విజేతలు అవతరిస్తున్నారు. చివరగా అమెరికా దిగ్గజం సెరెనా విలియమ్స్‌ వింబుల్డన్ సింగిల్స్ టైటిల్ నెగ్గింది. 2016లో సెరెనా నెగ్గిన తరువాత జరిగిన ప్రతి వింబుల్డన్‌లోనూ మహిళల సింగిల్స్ విభాగంలో కొత్త ఛాంపియన్స్ ఆవిర్భావిస్తున్నారు. ఈ ఏడాది సైతం తొలిసారి ఫైనల్ చేరిన ఇద్దరు తలపడటంతో కొత్త చాంపియన్ అవతరించింది.