యూఎస్ ఓపెన్ మహిళల సింగిల్స్‌లో ఇంగ్లాండ్‌కు చెందిన ఎమ్మా రాడుకాను సంచలనం సృష్టించింది. గ్రాండ్ స్లామ్ ఫైనల్ చేరిన పిన్న వయస్కురాలిగా ఎమ్మా రికార్డు నెలకొల్పింది. సెమీఫైనల్లో 17వ సీడ్‌ గ్రీస్‌ క్రీడాకారిణి మారియా సక్కారీపై 6-1, 6-4 తేడాతో ఎమ్మా విజయం సాధించింది.
దీంతో 17 ఏళ్ల తర్వాత గ్రాండ్‌స్లామ్‌ ఫైనల్ చేరిన పిన్న వయస్కురాలిగా ఆమె రికార్డు నెలకొల్పింది. ఇంతకుముందు రష్యాకు చెందిన మరియా షరపోవా 2004లో 17 ఏళ్ల వయసులోనే వింబుల్డన్‌ టైటిల్‌ గెలవడం గమనార్హం.
మారియాను ఓడించిన వీడియోను యూఎస్ ఓపెన్ టెన్నిస్‌ ట్విటర్‌లో పంచుకుంది. అందులో ఈ బ్రిటన్‌ చిన్నది సాధించిన విజయాన్ని తనను తానే నమ్మలేకపోయింది. ఆఖరి పాయింట్‌ సాధించాక ఎమ్మా కాసేపు నిశ్శబ్దంగా ఉండిపోయింది. మ్యాచ్‌ అనంతరం ఆమె మాట్లాడుతూ... తాను ఫైనల్‌కు చేరానంటే నమ్మలేకపోతున్నానని చెప్పింది. తనపై ఒత్తిడి లేదని, తుది పోరులో మంచి ప్రదర్శన చేస్తానని తెలిపింది.
ప్రస్తుతం 150వ ర్యాంక్‌లో కొనసాగుతున్న ఎమ్మా.. ఫైనల్స్‌లో కెనడా క్రీడాకారిణి లెయ్‌లా ఫెర్నాండెజ్‌(19)తో తలపడనుంది. రెండు దశాబ్దాల తర్వాత ఇద్దరు యువ క్రీడాకారిణులు మహిళల గ్రాండ్‌స్లామ్‌ ఫైనల్స్‌లో పోటీపడనుండటం విశేషం. 1999లో అమెరికాకు చెందిన 17 ఏళ్ల సెరీనా విలియమ్స్‌... 18 ఏళ్ల మార్టినా హింగిస్‌‌ను ఓడించింది.