Punjab Kings defeat Delhi Capitals by 4 wickets: ఐపీఎల్‌(IPL)లో పంజాబ్(Punjab Kings) శుభారంభం చేసింది. ఢిల్లీ(Delhi Capitals )తో జరిగిన తొలి పోరులో విజయం సాధించి ఈ సీజన్‌ను ఘనంగా ఆరంభించింది. చివరి వరకూ ఇరు జట్లు పోరాడినా చివరికి గెలుపు పంజాబ్‌నే వరించింది. శామ్ కరణ్‌ 63 పరుగులతో పంజాబ్‌కు విజయాన్ని అందించాడు. లివింగ్‌ స్టోన్‌ కూడా చివరి వరకూ క్రీజులో నిలిచి పంజాబ్‌ను గెలిపించాడు. ఈ మ్యాచ్‌లో తొలుత బ్యాటింగ్ చేసిన ఢిల్లీ అభిషేక్‌ మెరుపు బ్యాటింగ్‌తో 174 పరుగులు చేసింది. 175 పరుగుల లక్ష్యంతో బరిలోకి దిగిన పంజాబ్... చివరి ఓవర్లో విజయం సాధించింది. కెప్టెన్ పంత్‌కు తొలి మ్యాచ్‌లోనే పరాజయం ఎదురైంది.
ఢిల్లీలో అభిషేక్‌ ఆటే హైలెట్‌
ఈ మ్యాచ్‌లో టాస్‌ నెగ్గిన పంజాబ్ కెప్టెన్ శిఖర్ ధావన్‌ బౌలింగ్‌ ఎంచుకున్నాడు. ఢిల్లీ ఓపెనర్లు మిచెల్‌ మార్ష్‌, వార్నర్‌ ధాటిగా బ్యాటింగ్ ఆరంభించారు. 12 బంతులలో 20 పరుగులు చేసి మార్ష్‌ అవుటయ్యాడు. నాలుగు ఓవర్లకు ఢిల్లీ స్కోరు 40 పరుగులకు చేరింది. రబాడ వేసిన ఐదో ఓవర్లో నాలుగో బంతికి ఫోర్, ఐదో బంతికి సిక్స్ బాదిన వార్నర్‌ ఢిల్లీ జట్టు స్కోరు 50 పరుగులు దాటించాడు. షై హోప్‌ కూడా ఫోర్, సిక్స్ బాది మంచి టచ్‌లో కనిపించాడు. కానీ మంచి ఫామ్‌లో కనిపించిన వార్నర్‌... 29 పరుగులు చేసి అవుటయ్యాడు. హర్షల్ పటేల్ వేసిన ఎనిమిదో ఓవర్లో చివరి బంతికి డేవిడ్‌ భాయ్‌ వికెట్ కీపర్‌ జితేశ్‌కు చిక్కాడు. తొలుత అంపైర్‌ నాటౌట్‌గా ప్రకటించిన పంజాబ్ డీఆర్‌ఎస్‌కు వెళ్లి ఫలితం రాబట్టింది. వార్నర్‌ అవుటైన తర్వాత క్రీజులోకి వచ్చిన పంత్ రిషభ్ పంత్ తొలి మ్యాచ్‌లో తక్కువ పరుగులకే పెవిలియన్‌ చేరాడు. ఆరంభంలో క్రీజులోకి స్వేచ్ఛగా కదులిన పంత్ ఓ ఫోర్ కొట్టి మంచి టచ్‌లో కనిపించాడు. ఆడిన తొలి మూడు బంతుల్లో రెండు సింగిల్స్‌ తీసి భారీ స్కోరు చేస్తాడని ఆశలు రేపాడు. రాహుల్ చాహర్‌ వేసిన 12 ఓవర్లో రెండో బంతిని బౌండరీకి పంపి ఈ ఐపీఎల్‌లో రిషభ్ పంత్ మొదటి బౌండరీ సాధించాడు. ఆ తర్వాత మరో బౌండరీ బాది ఫామ్‌లోకి వచ్చినట్లు కనిపించాడు. మొత్తం 13 బంతులు ఎదుర్కొన్న పంత్ 2 ఫోర్లతో 18 పరుగులు చేసి అవుటయ్యాడు. హర్షల్ పటేల్ బౌలింగ్‌లో బెయిర్‌ స్టోకు సులువైన క్యాచ్‌ ఇచ్చి పంత్ అవుటయ్యాడు. పంత్ తర్వాత ఢిల్లీ వరుసగా వికెట్లు కోల్పోయింది. రిషభ్ పంత్ (18) రికీ భుయ్‌ (3) స్టబ్స్‌ (5) తక్కువ పరుగులకే పెవిలియన్‌ చేరారు. 21 పరుగులు చేసి నిలకడగా ఆడుతున్న అక్షర్‌ పటేల్ రనౌట్‌ కావడంతో ఢిల్లీ కష్టాలు పెరిగాయి. హర్షల్ పటేల్ వేసిన 18 ఓవర్లో తొలి బంతికి రెండో పరుగు కోసం యత్నించి అక్షర్‌ రనౌటయ్యాడు. చివర్లో అభిషేక్‌ పటేల్ చెలరేగడంతో ఢిల్లీ 165 పరుగులు చేయగలిగింది. ఎనిమిది బంతులు ఎదుర్కొన్న అభిషేక్‌ 2 ఫోర్లు ఒక సిక్సుతో 20 పరుగులు చేశాడు. పంజాబ్ బౌలర్లలో అర్ష్‌దీప్‌ 2, హర్షల్ పటేల్ 2, రబాడ,బ్రార్‌, చాహల్‌ ఒక్కో వికెట్ తీశారు.
శామ్ కరణ్‌ జోరు..
175 పరుగుల లక్ష్యంతో బరిలోకి దిగిన పంజాబ్‌కు ఓపెనర్లు శుభారంభం అందించారు. తొలి వికెట్‌కు 34 పరుగులు జోడించారు. జట్టు స్కోరు 42 పరుగులకు చేరే సరికి పంజాబ్ రెండు వికెట్లు కోల్పోయింది. కానీ శామ్ కరణ్‌ పంజాబ్ ఇన్నింగ్స్‌కు వెన్నెముకగా నిలిచాడు. 47 బంతుల్లో 6 ఫోర్లు ఒక సిక్సుతో 63 పరుగులు చేశాడు. లివింగ్‌ స్టోన్‌ 21 బంతుల్లో 2 ఫోర్లు, 3 సిక్సులతో 38 పరుగులు చేసి పంజాబ్‌కు విజయాన్ని అందించాడు. లివింగ్‌స్టోన్‌ విధ్వంసంతో మరో నాలుగు బంతులు మిగిలి ఉండగానే పంజాబ్ విజయం సాధించింది. ఢిల్లీ బౌలర్లలో కుల్‌దీప్‌ 2, ఖలీల్‌ రెండు వికెట్లు తీశారు.