ఇండియన్‌ ప్రీమియర్‌ లీగుకు మరో వారం రోజులే ఉంది! ఫ్రాంచైజీలన్నీ తమ ఆటగాళ్లను ఇప్పటికే క్యాంపులకు పిలిపించాయి. ప్రాక్టీస్‌ చేయిస్తున్నాయి. మిగతా ఆటగాళ్లతో కలిసిపోయేలా సరదా ఆటలు ఆడిస్తున్నాయి. అయితే కొందరు ఆటగాళ్లు ఐపీఎల్ మొదలైన మొదటి వారంలో అందుబాటులో ఉండకపోవడం, కొందరు లీగ్‌ మొత్తానికీ దూరమవ్వడం ఫ్రాంచైజీలకు ఆందోళన కలిగిస్తోంది.
ఐపీఎల్ 15వ సీజన్‌ మార్చి 26 నుంచి మొదలవుతోంది. డిఫెండింగ్‌ ఛాంపియన్‌ చెన్నై సూపర్‌కింగ్స్‌, రన్నరప్‌ కోల్‌కతా నైట్‌రైడర్స్‌ మొదటి మ్యాచులో తలపడుతున్నాయి. ఈ సారి మ్యాచులన్నీ ముంబయి, పుణెలోనే జరుగుతున్నాయి. ఇందుకోసం కఠిన బయో బబుల్‌ను ఏర్పాటు చేస్తున్నారు. రెగ్యులర్‌గా కరోనా పరీక్షలు నిర్వహిస్తున్నారు.
ఎప్పట్లాగే ఈసారీ కొందరు ఇంగ్లాండ్‌ ఆటగాళ్లు తమ పైత్యాన్ని ప్రదర్శించారు. సీజనుకు అందుబాటులో ఉంటామని వేలంలో పేర్లు నమోదు చేయించుకున్నారు. తీరా సీజన్‌ దగ్గరపడుతుండటం, క్యాంపులకు రమ్మనడంతో బయో బుడగ ఒత్తిడి తట్టుకోలేకపోతున్నామని వెనక్కి తగ్గారు. గుజరాత్‌ టైటాన్స్‌ ఓపెనర్‌ జేసన్‌ రాయ్‌, కోల్‌కతా ఆటగాడు అలెక్స్‌ హేల్స్‌ తప్పుకున్నారు. ఇంగ్లాండ్‌ పేసర్‌ మార్క్‌వుడ్‌ మోచేతికి గాయం కావడంతో సీజన్‌కు అందుబాటులో ఉండటం లేదు.
ఇక ద్వైపాక్షిక సిరీసుల వల్ల కొందరు ఆస్ట్రేలియా ఆటగాళ్లు మొదటి వారం అందుబాటులో ఉండటం లేదు. పాకిస్థాన్‌తో వన్డే, టీ20 సిరీసులు ఆడుతుండటమే ఇందుకు కారణం. ఆరోన్‌ ఫించ్‌, ప్యాట్‌ కమిన్స్‌, గ్లెన్‌ మాక్స్‌వెల్‌, జోష్‌ హేజిల్‌వుడ్‌, మార్కస్‌ స్టాయినిస్‌ తొలివారం ఐపీఎల్‌కు రారు. ఇక ఇంగ్లాండ్‌, వెస్టిండీస్‌ సైతం టెస్టు సిరీసు ఆడుతోంది. దాంతో కైల్‌ మేయర్స్‌, అల్జారీ జోసెఫ్‌, జానీ బెయిర్‌స్టో తొలుత రాకపోవచ్చు.
| ఆటగాడు | దేశం | ఐపీఎల్ జట్టు |
| Pat Cummins | Australia | Kolkata Knight Riders |
| Aaron Finch | Australia | Kolkata Knight Riders |
| Glenn Maxwell | Australia | Royal Challengers Bangalore |
| Josh Hazlewood | Australia | Royal Challengers Bangalore |
| Marcus Stoinis | Australia | Lucknow Super Giants |
| Kyle Mayers | West Indies | Lucknow Super Giants |
| Alzaari Joseph | West Indies | Gujarat Titans |
| Jason Roy | England | Gujarat Titans |
| Jonny Bairstow | England | Punjab Kings |
| Mark Wood | England | Lucknow Super Giants |