DC vs PBKS, Match Highlights: ఐపీఎల్‌ 2022లో దిల్లీ క్యాపిటల్స్‌ అతిపెద్ద విక్టరీ సాధించింది. కేవలం 10.3 ఓవర్లలో మ్యాచ్‌ను ముగించింది. పంజాబ్‌ నిర్దేశించిన 116 పరుగుల టార్గెట్‌ను 9 వికెట్ల తేడాతో ఛేదించింది. పృథ్వీ షా (41; 20 బంతుల్లో 7x4, 1x6), డేవిడ్‌ వార్నర్‌ (60*; 30 బంతుల్లో 10x4, 1x6) నువ్వానేనా అన్నట్టుగా ఆడారు. కేవలం పవర్‌ప్లేలోనే 81 పరుగులు చేశారు. పంజాబ్‌ బౌలర్లను చితకబాదారు. ఐపీఎల్‌ 2022లో అత్యధిక పవర్‌ప్లే స్కోరు సాధించారు. 6.3వ బంతికి షాను రాహుల్‌ చాహర్‌ ఔట్‌ చేసినా సర్ఫరాజ్‌ ఖాన్‌ (12*; 13 బంతుల్లో 1x4) సాయంతో వార్నర్‌ గెలిపించేశాడు.
దిల్లీ బౌలింగ్‌కు విలవిల
మొదట బ్యాటింగ్‌కు వచ్చిన పంజాబ్‌ కింగ్స్‌కు ఏ మాత్రం కలిసి రాలేదు. పవర్‌ప్లేలో 47 పరుగులు చేసి 3 వికెట్లు చేజార్చుకుంది. మయాంక్‌ అగర్వాల్‌ నాలుగు బౌండరీల బాదడం వల్లే ఆ మాత్రం పరుగులు వచ్చాయి. అయితే దిల్లీ బౌలర్ల సమష్టి ప్రదర్శనకు పంజాబ్‌ విలవిల్లాడింది. సగటున ప్రతి 10 పరుగులకు ఒక వికెట్‌ చేజార్చుకున్నారు. అయితే జితేశ్ శర్మ (32) ఓ ఐదు బౌండరీలు బాదడంతో ఆ మాత్రం స్కోరైనా వచ్చింది. తొలి వికెట్‌కు ధావన్‌, మయాంక్‌ (33), ఐదో వికెట్‌కు షారుక్‌, జితేశ్ (31) నెలకొల్పిన భాగస్వామ్యాలే స్కోరును వంద దాటించాయి. ఖలీల్‌, లలిత్‌, అక్షర్‌, కుల్‌దీప్‌ తలో 2 వికెట్లు తీయడంతో పంజాబ్‌ 115కు ఆలౌటైంది.