World Cup Final 2023: ప్రపంచ క‌ప్‌ ఫైనల్లో ఆల్‌రౌండర్‌ హార్దిక్ పాండ్యా(Hardic Pandya) లేని లోటు స్పష్టంగా కనిపించింది. బ్యాట్‌తోనూ బంతితోనూ సమర్థంగా రాణించే పాండ్యా ఉంటే ఆరో బౌలర్‌గానూ.. బ్యాట్స్‌మెన్‌గానూ టీమిండియా(Team India)కు ఎంతోకొంత మేలు జరిగేది. ఇప్పటివరకూ జరిగిన మ్యాచుల్లో హార్దిక్ లేనిలోటు స్పష్టంగా కనిపించకపోయినా ఫైనల్‌ మ్యాచులో అయితే ఆ లోటు స్పష్టంగా కనిపించింది. ఎందుకంటే భారత జట్టులో ఉన్న నాణ్యమైన పేస్ ఆల్‌రౌండర్‌ హార్దిక్ పాండ్యా ఒక్కడే. బ్యాట్‌తోనే కాక బంతితోనూ పాండ్యా తన వంతు పాత్రను సమర్థంగా పోషించగలడు. వికెట్ల త్వరగా పడితే నిలబడి సమర్థంగా ఆచితూచి ఆడే సామర్థ్యంతో పాటు చివర్లో విధ్వంసకర బ్యాటింగ్ చేయగల సత్తా పాండ్యా సొంతం. అది టీమిండియాకు ఫైనల్లో కలిసి వచ్చేది.
బౌన్సర్లతో బ్యాటర్లను పాండ్యా ముప్పుతిప్పలు కూడా పెట్టగలడు. టీమిండియాలో ఇద్దరు పేసర్లతో బరిలోకి దిగితే మూడో సీమర్‌ పాత్రను పాండ్యా నిర్వర్తించి జట్టు సమతుల్యతను కాపాడేవాడు. కానీ ఇప్పుడు పాండ్యా లేకపోవడంతో జట్టు సమతుల్యత దెబ్బతిని పైనల్లో టీమిండియా బోల్తా పడింది. జట్టు క్లిష్ట పరిస్థితుల్లో ఉన్నప్పుడు పాండ్యా సమర్థంగా ఆదుకున్న సందర్భాలు చాలా ఉన్నాయి. ఇలాంటి మెగా టోర్నీలో ఆల్‌రౌండర్‌గా జట్టుకు పాండ్యా సేవలు చాల ముఖ్యమన్నది నిర్వివాద అంశం. ఫీల్డింగ్‌లో కూడా పాండ్యా చాలా చురుగ్గా కదులుతాడు. ఇవన్నీ టీమిండియాపై ప్రభావం చూపే అవకాశం స్పష్టం కనిపించింది. నాకౌట్‌లో ప్రతీ అవకాశాన్ని సద్వినియోగం చేసుకోవాల్సిందే. ఇలాంటి సమయంలో స్టార్‌ ఆల్‌రౌండర్‌ హార్దిక్ పాండ్యా జట్టుకు దూరం కావడం టీమిండియాపై తీవ్ర ప్రభావాన్ని చూపింది. హార్దిక్ పాండ్యా గాయంతో దూరమవ్వడం కీలక సమయంలో రోహిత్ సేనకు భారీగా దెబ్బతీసింది.
పాండ్యా జట్టులో ఉంటే బ్యాటింగ్ పరంగా.. బౌలింగ్ పరంగా భారత్‌కు ఒక ఆటగాడు ఎక్కువ ఉన్నట్లే లెక్క. ఎవరైనా బౌలర్ లయ తప్పితే ఆ స్థానాన్ని పాండ్యాతో భర్తీ చేయవచ్చు. అలా కాకుండా స్పెషలిస్ట్‌ బౌలర్‌నో... స్పెషలిస్ట్‌ బ్యాటర్‌నో తీసుకుంటే వాళ్లు కేవలం అదే విభాగానికి పరిమితం అవుతారు. ఇదీ జట్టు సమతుల్యతను దెబ్బతీస్తుంది. బ్యాటింగ్, బౌలింగ్ , ఫీల్డింగ్‌లో మెరుగ్గా రాణిస్తూ టీమిండియా విజయాల్లో హార్దిక్ కీలకపాత్ర పోషించాడు. భారత్‌ వేదికగా జరిగిన ప్రపంచకప్‌లో బ్యాట్‌తో ఇంకా మెరుపులు మెరిపించనప్పటికీ.. బౌలింగ్‌లో మాత్రం హార్దిక్ రాణించాడు.
ధర్మశాల వేదికగా కివీస్‌తో జరిగిన మ్యాచ్‌లో హార్దిక్ పాండ్యా లేని లోటు స్పష్టంగా కనిపించింది. హార్దిక్ లేకపోవటంతో కివీస్‌తో మ్యాచ్‌లో ఐదుగురు బౌలర్లతోనే టీమిండియా ఆడాల్సి వచ్చింది. కుల్దీప్ యాదవ్ తొలుత భారీగా పరుగులు ఇచ్చాడు. ఈ పరిస్థితుల్లో పాండ్యా ఉంటే రోహిత్‌కు బౌలింగ్ మార్పు చేసే అవకాశం ఉండేది. కానీ ఆరో బౌలర్ లేకపోవటంతో రోహిత్... కుల్దీప్‌నే కొనసాగించాల్సి వచ్చింది. అదే పాండ్యా ఉంటే ఎవరైనా బౌలర్ లయ అందుకోకపోతే బౌలింగ్ మార్పుగా హార్దిక్‌ను దించే అవకాశం జట్టుకు ఉంటుంది. ఫైనల్లో మాత్రం హార్దిక్ లేని లోటు స్పష్టంగా కనిపించింది. సూర్యకుమార్‌ ఈ మ్యాచ్‌లో నిరాశపరిచాడు. హార్దిక్ ఉంటే.. జడేజా కంటే ముందే అతను క్రీజులోకి వచ్చి కీలక ఇన్నింగ్స్‌ ఆడేవాడేమో. ఇక బౌలింగ్‌లో హార్దిక్ అందుబాటులో ఉంటే.. ఆరో బౌలర్‌గా ఉపయోగపడేవాడు. సిరాజ్‌తో పాటు స్పిన్నర్లు ప్రభావం చూపలేకపోతున్నపుడు కెప్టెన్‌ అతడి వైపు చూసేవాడు.