IND vs AUS 1st ODI:
మొహాలి వన్డేలో టీమ్‌ఇండియా అదరగొట్టింది! బ్యాటింగ్‌కు స్వర్గధామమైన వికెట్‌పై అమేజింగ్‌ బౌలింగ్‌ చేసింది. సీనియర్‌ పేసర్‌ మహ్మద్ షమి (5/51) ఐదు వికెట్లతో ఆసీస్‌ను కంగారు పెట్టాడు. అతడికి మిగిలిన బౌలర్లు తోడవ్వడంతో ఆస్ట్రేలియా 50 ఓవర్లకు 278 పరుగులకు ఆలౌటైంది. ఓపెనర్‌ డేవిడ్‌ వార్నర్‌ (52; 53 బంతుల్లో 6x4, 2x6) హాఫ్ సెంచరీ సాధించాడు. జోష్‌ ఇంగ్లిస్‌ (45; 45 బంతుల్లో 3x4, 2x6), స్టీవ్‌ స్మిత్‌ (41; 60 బంతుల్లో 3x4, 2x6) అతడికి తోడుగా రాణించారు.
డేవిడ్‌ భాయ్ ధమాకా
మొదట బ్యాటింగ్‌కు దిగిన ఆసీస్‌కు శుభారంభం దక్కలేదు. ఇన్నింగ్స్‌ 4 పరుగుల వద్దే ఓపెనర్‌ మిచెల్‌ మార్ష్‌ (4)ను మహ్మద్ షమి పెవిలియన్‌ పంపించాడు. అతడు వేసిన పుల్లర్‌ లెంగ్త్‌ షార్ట్‌ బాల్‌ను మార్ష్‌ ఆఫ్‌స్టంప్‌ మీద డిఫెండ్‌ చేయబోయి శుభ్‌మన్‌ గిల్‌కు క్యాచ్‌ ఇచ్చాడు. ఆ తర్వాత డేవిడ్‌ వార్నర్‌, స్టీవ్‌ స్మిత్‌ అద్భుతమైన ఇన్నింగ్సులు ఆడారు. రెండో వికెట్‌కు 106 బంతుల్లో 94 పరుగుల భాగస్వామ్యం నెలకొల్పారు. చక్కని బంతుల్ని డిఫెండ్‌ చేసిన డేవిడ్‌ భాయ్ అందివచ్చిన బంతుల్ని నేరుగా బౌండరీకి తరలించాడు. దూకుడుగా ఆడేందుకు ప్రయత్నించాడు. 49 బంతుల్లోనే హాఫ్ సెంచరీ అందుకున్నాడు.
స్మిత్‌ అదే నిలకడ
అత్యంత ప్రమాదకరంగా మారిన వార్నర్‌ను రవీంద్ర జడేజా ఔట్‌ చేశాడు. ఆఫ్‌సైడ్‌ వెళ్తున్న బంతిని మోకాళ్లపై కూర్చొని స్లాగ్‌స్వీప్‌ చేయాలని వార్నర్‌ ప్రయత్నించాడు. బంతి కాస్త బౌన్స్‌ అవ్వడంతో బ్యాటు అంచుకు తగిలిన బంతి గాల్లోకి లేవడంతో గిల్‌ చక్కగా అందుకున్నాడు. అప్పటికి ఆసీస్‌ స్కోరు 98. మరోవైపు భారత పిచ్‌పై చక్కని అవగాహన కలిగిన స్టీవ్‌ స్మిత్‌ నెమ్మదిగా ఆడాడు. ఒక్కో బంతిని ఆడుతూ పోయాడు. ఎక్కడా అనవసర షాట్లు ఆడేందుకు ప్రయత్నించలేదు. టీమ్‌ఇండియాను ఇబ్బంది పెడుతున్న అతడిని మహ్మద్ షమి ఔట్‌ చేశాడు. అతడు వేసిన బంతి బ్యాటు, ప్యాడ్లకు మధ్యలోంచి వెళ్లి లెగ్‌వికెట్ ఎగరగొట్టింది. దాంతో కంగారూలు 112 పరుగులకు 3 వికెట్లు చేజార్చుకున్నారు.
విలువైన భాగస్వామ్యాలు
మధ్యలో మార్నస్‌ లబుషేన్‌ (39), కామెరాన్‌ గ్రీన్‌ (31) విలువైన ఇన్నింగ్సులు ఆడారు. నాలుగో వికెట్‌కు 68 బంతుల్లో 45 పరుగుల భాగస్వామ్యం సాధించారు. నిలదొక్కుకున్న ఈ జోడీని లబుషేన్‌ను స్టంపౌట్‌ చేయడం ద్వారా కేఎల్‌ రాహుల్‌ విడదీశాడు. మరికాసేపటికే గ్రీన్‌ రనౌట్‌ అయ్యాడు. అప్పటికి ఆసీస్‌ స్కోరు 39.3 ఓవర్లకు 186. ఈ సిచ్యువేషన్లో హల్క్‌ ఆల్‌రౌండర్‌ స్టాయినిస్‌ (29; 21 బంతుల్లో 5x4), జోస్‌ ఇంగ్లిష్ ఆదుకున్నారు. ఆచితూచి ఆడుతూనే అందివచ్చిన బంతుల్ని బౌండరీకి తరలించారు. 43 బంతుల్లోనే 62 పరుగుల పాట్నర్‌షిప్‌ అందించారు. ఇంగ్లిస్‌ను బుమ్రా, స్టాయినిస్‌ను బుమ్రా ఔట్‌ చేశారు. ఆఖర్లో ప్యాట్‌ కమిన్స్‌ (21*; 9 బంతుల్లో 2x4, 1x6) మెరుపుల మెరిపించడంతో ఆసీస్‌ 276కి చేరుకుంది. బుమ్రా, యాష్‌, జడ్డూకు తలో వికెట్‌ దక్కింది. ఈ మ్యాచులో టీమ్‌ఇండియా ఫీల్డింగ్‌ ప్రమాణాలకు తగ్గట్టు లేదు.