ఆస్ట్రేలియాతో జరుగుతున్న టీ 20 సిరీస్‌లో యువ భారత్ జోరు మాములుగా లేదు. కంగారులతో జరిగిన తొలి టీ 20 మ్యాచ్‌లో అత్యధిక లక్ష్యాన్ని ఛేదించిన భారత జట్టు... రెండో టీ 20లోనూ ఘన విజయం సాధించింది. తొలుత భారీ స్కోరు సాధించిన సూర్యకుమార్‌ యాదవ్‌ సేన.. అనంతరం కంగారులను కంగారు పెట్టి విజయం సాధించింది. తొలుత బ్యాటింగ్‌ చేసిన టీమిండియా.. టపార్డర్‌ రాణించడంతో 4 వికెట్ల నష్టానికి 235 పరుగుల భారీ చేసింది. అనంతరం 236 పరుగుల భారీ లక్ష్యంతో బరిలోకి దిగిన కంగారులు 20 ఓవర్లలో తొమ్మిది వికెట్ల నష్టానికి 191 పరుగులకే పరిమతమయ్యారు. ఈ మ్యాచ్‌లో రెండు జట్లు కలిపి 426 పరుగులు చేయడం విశేషం. 
 ఈ మ్యాచ్‌లో టాస్‌ గెలిచిన ఆస్ట్రేలియా... టీమిండియాను బ్యాటింగ్‌కు అహ్వానించింది. ఇది ఎంత తప్పుదు నిర్ణయమో కంగారులకు పవర్ ప్లే లోనే అర్ధం అయింది. టీమిండియా బ్యాటర్లు మరోసారి జూలు విదిల్చడంతో కంగారులపై భారత, జట్టు మరోసారి భారీ స్కోరు చేసింది. తొలి టీ20 మ్యాచ్లో అత్యధిక లక్ష్యాన్ని ఛేదించిన టీమిండియా ఈసారి తొలుత బాటింగ్ చేసి భారీ స్కోర్ నమోదు చేసింది. టీమిండియా ఓపెనర్లు రుతురాజ్ గైక్వాడ్.. యశస్వి జైస్వాల్... భారత్ కు మెరుపు ఆరంభాన్ని ఇచ్చారు. కేవలం ఆరు ఓవర్ లలో 77 పరుగులు జోడించి భారీ స్కోరుకు పునాది వేశారు. యశస్వి జైస్వాల్ మెరుపు ఇన్నింగ్స్ ఆడాడు. కేవలం 25 బంతుల్లో 53 పరుగులు చేశాడు. జైస్వాల్ 9 ఫోర్లు, రెండు భారీ సిక్సర్లు బాదాదు.  జైస్వాల్ ని ఇంగ్లీష్ అవుట్ చేశాడు. అనంతరం రుతురాజ్ గైక్వాడ్ తో ఇషాన్ కిషన్ జత కలిసి స్కోర్ బోర్డు ను పరుగులు పెట్టించాడు.  కేవలం 32 బంతుల్లో ఇషాన్ కిషన్ 3 ఫోర్లు, 4 సిక్సర్ లతో 52 పరుగులు చేసి అవుట్ అయ్యాడు. 164 పరుగుల వద్ద భారత్ రెండో వికెట్ కోల్పోయింది. 
 అనంతరం కెప్టెన్ సూర్యకుమార్ యాదవ్... రుతురాజ్ తో కలిసి మరోసారి మెరుపు బాటింగ్ చేసాడు. కేవలం 10 బంతుల్లో 2 సిక్సర్లతో 19 పరుగులు చేసి సూర్య అవుట్ అయ్యాడు. దీంతో 189 పరుగుల వద్ద భరత్ మూడో వికెట్ కోల్పోయింది. గత మ్యాచ్ హీరో రింకూ సింగ్ రాకతో భారత్ భారీ స్కోర్ దిశగా దూసుకెళ్లింది. రుతురాజ్ గైక్వాడ్ 43 బంతుల్లో 3 ఫోర్లు, 2 సిక్సర్లతో 58 పరుగులు చేశాడు. రింకూ సింగ్ 9 బంతుల్లోనే 31 పరుగులు చేశాడు. తిలక్ వర్మ 2 బంతుల్లో 7 పరుగులు చేసాడు. టాప్ ఆర్డర్ విధ్వంసంతో నిర్ణీత 20 ఓవర్లలో టీం ఇండియా 4 వికెట్ల నష్టానికి 235 పరుగులు చేసింది. ఆసిస్‌ బౌలర్లలో నాథన్‌ ఎలిస్‌ 4 ఓవర్లలో 45 పరుగులు ఇచ్చి మూడు వికెట్లు తీశాడు. భారత బ్యాటర్ల ధాటికి సీన్‌ అబాట్‌ కేవలం 3 ఓవర్లలోనే 56 పరుగులు సమర్పించుకున్నాడు. 



 అనంతరం 236 పరుగుల లక్ష్యంతో బరిలోకి దిగిన ఆస్ట్రేలియా 35 పరుగుల వద్ద తొలి వికెట్‌ కోల్పోయింది. కళ్ల ముందు భారీ స్కోరు కనపడుతుండడంతో వేగంగా ఆడాలన్న ఒత్తిడిలో కంగారులు వరుసగా వికెట్లు కోల్పోయారు. రవి బిష్ణోయ్‌ ఆరంభంలోనే వికెట్లు తీసి కంగారులను కష్టాల్లోకి నెట్టేశాడు. 35 పరుగుల వద్ద తొలి వికెట్‌ కోల్పోయిన కంగారులు... 39 పరుగుల వద్ద రెండో వికెట్‌ కోల్పోయింది. ఆ తర్వాత వరుస విరామాల్లో ఆస్ట్రేలియా వికెట్‌ కోల్పోయింది. ఓ వైపు వికెట్లు పడుతున్నా స్టోయినిస్‌ పోరాడాడు. కానీ ఈ పోరాటం సరిపోలేదు. 25 బంతుల్లో 2 ఫోర్లు, 4 సిక్సర్లతో 45 పరుగులు చేశాడు. ఆస్ట్రేలియా జట్టులో ఇదే అత్యధిక స్కోరు. ఆస్ట్రేలియా ఇన్నింగ్స్‌లో కేవలం ముగ్గురు బ్యాటర్లు మాత్రమే 25 పరుగులు దాటగలిగారు. భారత బౌలర్లు రాణించడంతో 236 పరుగుల భారీ లక్ష్యంతో బరిలోకి దిగిన కంగారులు 20 ఓవర్లలో తొమ్మిది వికెట్ల నష్టానికి 191 పరుగులకే పరిమతమయ్యారు. భారత బౌలర్లలో ప్రసిద్ధ్‌ కృష్ణ మంచి బౌలింగ్‌తో ఆకట్టుకున్నాడు. 4 ఓవర్లలో 41 పరుగులు ఇచ్చిన ప్రసిద్ధ్‌ కృష్ణ మూడు వికెట్లు తీశాడు. రవి బిష్ణోయ్‌ కూడా 4 ఓవర్లలో 32 పరుగులు ఇచ్చి మూడు వికెట్లు తీశాడు.