David Warner : సిడ్నీలోని మారూబ్రా ప్రాంతంలో న్యూసౌత్ వేల్స్ పోలీసులు ఆదివారం సాయంత్రం 5 ఏప్రిల్ 2026న తనిఖీలు నిర్వహించారు. 39 ఏళ్ల వార్నర్ తన వ్యాన్ను నడుపుతూ వెళ్తున్న టైంలో పోలీసులు చెకింగ్ చేస్తున్నారని గ్రహించారు. అందుకే పరీక్షలు జరిగే కొద్ది దూరంలోనే వాహనాన్ని ఆపేశారు. టెస్ట్ నుంచి తప్పించుకోవడానికి ప్రయత్నించారు. దీన్ని గమనించిన ట్రాఫిక్ పోలీసులు వెంటనే ఆయన వద్దకు వెళ్లి పరీక్షలు చేశారు.
ఈ ప్రాథమిక పరీక్షలో వార్నర్ మద్యం సేవించినట్టు తేలింది. అనంతరం ఆయనను మారూబ్రా పోలీసు స్టేషన్కు తరలించి రెండోసారి పరీక్షించగా, ఆయన రక్తంలో ఆల్కహాల్ శాతం 0.104గా నమోదైంది. ఆస్ట్రేలియా చట్టాల ప్రకారం ఇది అనుమతించదగిన పరిమితి కంటే ఎక్కువ. దీంతో పోలీసులు ఆయనను అరెస్టు చేసి మధ్యస్థ స్థాయి నేర కిందగా కేసు నమోదు చేశారు.
కోర్టు విచారణ, తదుపరి చర్యలు
అరెస్టు అనంతరం వార్నర్కు కోర్టు అటెండెన్స్ నోటీసు జారీ చేసి విడుదల చేశారు. దీని ప్రకారం, ఆయన మే 7, 2026 గురువారం నాడు సిడ్నీలోని డౌనింగ్ సెంటర్ లోకల్ కోర్టులో హాజరుకావాల్సి ఉంటుంది. అప్పటి వరకు ఆయన తన వృత్తిపరమైన బాధ్యతలను కొనసాగించవచ్చు. కానీ ఈ చట్టపరమైన సమస్య ఆయన కెరీర్పై ప్రభావం చూపే అవకాశం ఉంది.
పీఎస్ఎల్ 2026పై ప్రభావం
వార్నర్ ప్రస్తుతం పాకిస్థాన్ సూపర్ లీగ్లో కరాచీ కింగ్స్ జట్టుకు కెప్టెన్గా ప్రాతినిధ్యం వహిస్తున్నారు. వరుసగా మూడు విజయాలతో కరాచీ కింగ్స్ ప్రస్తుతం పాయింట్ల పట్టికలో అగ్రస్థానంలో ఉంది. ఈ టోర్నీలో వార్నర్ ఇప్పటి వరకు 93 పరుగులు సాధించి జట్టు విజయాల్లో కీలక పాత్ర పోషించారు. అయితే వ్యక్తిగత పనుల మీద వెళ్లిన కెప్టెన్ ఇలా వివాదంలో చిక్కుకోవడం ఫ్రాంచైజీ మేనేజ్మెంట్కు మింగుడుపడని విషయమే. ఏప్రిల్ 9 గురువారం నాడు పెషావర్ జల్మీతో జరగబోయే తదుపరి మ్యాచ్కు వార్నర్ అందుబాటులో ఉంటారని సమాచారం. కానీ భవిష్యత్లో ఇలాంటి విరామ అభ్యర్థలను బోర్డు తిరస్కరించే అవకాశం ఉంది.
వివాదాల వార్నర్
2018లో సౌతాఫ్రికాతో జరిగిన కేప్ టౌన్ టెస్టులో బాల్ ట్యాంపరింగ్కుప ప్లాన్ చేసినట్టు తేలడంతో వార్నర్పై ఏడాదిపాటు నిషేధం విధించారు. ఈ కుట్రలో వార్నర్ కీలక సూత్రధారి అని క్రికెట్ ఆస్ట్రేలియా విచారణలో వెల్లడైంది. 2018 ఘటన తర్వాత వార్న్పై జీవితకాల కెప్టెన్సీ నిషేధం విధించారు. అయితే ఆరేళ్ల సుదీర్ఘ నిరీక్షణ తర్వాత అక్టోబర్ 2024లో ఈ నిషేధాన్ని ఎత్తివేసి, ఆయనకు మళ్లీ నాయకత్వ బాధ్యతలు చేపట్టే అవకాశం కల్పించారు. 2013లో బర్మింగ్హామ్లోని ఒక బార్లో ఇంగ్లండ్ ఆటగాడు జోరూట్పై దాడి చేసినందుకు వార్నర్ సస్పెన్షనకు గురయ్యారు. అలాగే మైదానంలో ప్రత్యర్థి ఆటగాళ్లతో వాగ్వాదానికి దిగం ఆయన శైలిలో భాగంగా ఉండేది.