ఆస్ట్రేలియన్‌ ఓపెన్‌(Australian Open 2024)లో సంచలనం నమోదైంది. స్పెయిన్‌ యువ సంచలనం, గతేడాది వింబుల్డన్‌ విజేత కార్లోస్‌ అల్కరాజ్‌కు భారీ షాక్‌ తగిలింది. పురుషుల సింగిల్స్‌లో ప్రపంచ రెండో ర్యాంకర్‌, స్పెయిన్‌కు చెందిన అల్కరాజ్‌(Carlos Alcaraz) కథ ముగిసింది. క్వార్టర్‌ ఫైనల్లో ఆరో సీడ్‌ జ్వెరెవ్‌  6–1, 6–3, 6–7 (2/7), 6–4తో అల్‌కరాజ్‌ను ఓడించి సెమీఫైనల్లోకి దూసుకెళ్లాడు.  


తొలి రెండు సెట్లు కోల్పోయినా మూడో రౌండ్‌లో పుంజుకున్న అల్కరాజ్‌.. నాలుగో సెట్‌లో మళ్లీ తడబడి పరాభవాన్ని మూటగట్టుకున్నాడు. 3 గంటల 6 నిమిషాల పాటు జరిగిన ఈ పోరులో జ్వెరెవ్‌ ఆదినుంచే దూకుడుగా ఆడాడు. ఈ మ్యాచ్‌కు ముందువరకూ జ్వెరెవ్‌కు టాప్‌ – 5 సీడ్‌ ఆటగాళ్లతో పది మ్యాచ్‌లు ఆడితే అందులో ఒక్కటి కూడా గెలవలేదు. మరో క్వార్టర్‌ ఫైనల్లో మూడో సీడ్‌ మెద్వెదెవ్‌ 7–6 (7/4), 2–6, 6–3, 5–7, 6–4తో తొమ్మిదో సీడ్‌ హుర్కాజ్‌ పై గెలిచి సెమీస్‌లోకి ప్రవేశించాడు. మెద్వెదెవ్‌, జ్వెరేవ్‌ సెమీఫైనల్లో తలపడనున్నారు. 


మహిళల సింగిల్స్‌లో...
మహిళల సింగిల్స్‌ క్వార్టర్‌ ఫైనల్స్‌లో క్వాలిఫయర్‌ డయానా యాస్‌ట్రెమ్‌స్కా 6–3, 6–4తో లిండా నొస్కోవాపై గెలిచి సెమీస్‌ చేరింది. 12వ సీడ్‌ కిన్‌వెన్‌ జెంగ్‌ (చైనా) 6–7 (4/7), 6–3, 6–1తో అనా కలిన్‌స్కాయ (రష్యా)పై గెలిచి తమ కెరీర్‌లో తొలిసారి ఓ గ్రాండ్‌స్లామ్‌ సెమీఫైనల్‌కు దూసుకెళ్లింది. 


ఇప్పటికే సెమీస్‌లో గాఫ్‌.. సబలెంక
మహిళల సింగిల్స్‌ విభాగంలో డిఫెండింగ్‌ ఛాంపియన్, రెండో సీడ్‌ బెలారస్‌కు చెందిన సబలెంకా, నాలుగో సీడ్‌, అమెరికాకు చెందిన  కోకో గాఫ్‌ సెమీఫైనల్లోకి అడుగు పెట్టారు. మహిళల సింగిల్స్‌ క్వార్టర్‌ ఫైనల్లో కోకో గాఫ్‌ 7-6 8-6, 6-7 3-7, 6-2తో కోస్త్యుక్‌పై విజయం సాధించింది. హోరాహోరిగా జరిగిన ఈ మ్యాచులో ఇద్దరు శివంగుల్లా తలపడ్డారు. ప్రతీ పాయింట్‌ కోసం తీవ్రంగా శ్రమించారు. మూడు గంటలా 8 నిమిషాల పాటు సాగిన పోరులో 17 విన్నర్లు కొట్టిన గాఫ్‌.. 51 అనవసర తప్పిదాలు చేయగా.. 39 విన్నర్లు బాదిన కోస్త్యుక్‌ 8 డబుల్‌ ఫాల్ట్స్‌ చేసింది. నిరుడు యూఎస్‌ ఓపెన్‌ గెలిచిన తర్వాత గాఫ్‌కు గ్రాండ్‌స్లామ్‌ టోర్నీల్లో ఇది వరుసగా 12వ విజయం కావడం విశేషం. క్వార్టర్‌ ఫైనల్లో సబలెంకా 6–2, 6–3తో తొమ్మిదో సీడ్‌ క్రిచికోవా (చెక్‌ రిపబ్లిక్‌)పై, కోకో గాఫ్‌ 7–6 (8/6), 6–7 (3/7), 6–2తో మార్టా కొస్టుక్‌ (ఉక్రెయిన్‌)పై విజయం సాధించారు. క్రిచికోవాతో 71 నిమిషాల్లో ముగిసిన మ్యాచ్‌లో సబలెంకా నాలుగు ఏస్‌లు సంధించడంతోపాటు ప్రత్యర్థి సర్వీస్‌ను ఆరుసార్లు బ్రేక్‌ చేసింది. సెమీస్‌లో కోకో గాఫ్‌- సబలెంక మధ్య మ్యాచ్‌ జరగనుంది. ఈ మ్యాచ్‌ కోసం అభిమానులు ఆసక్తిగా ఎదురుచూస్తున్నారు.


జోకో జోరు మాములుగా లేదు
తనకెంతో కలిసొచ్చిన ఆస్ట్రేలియన్‌ ఓపెన్‌ పురుషుల సింగిల్స్‌లో ప్రపంచ నంబర్‌వన్‌ నొవాక్‌ జొకోవిచ్‌ రికార్డు స్థాయిలో 11వ సారి ఆస్ట్రేలియా ఓపెన్‌ సెమీఫైనల్‌కు చేరాడు. గతంలో సెమీస్‌కు చేరిన పదిసార్లు.. ఫైనల్లో అడుగుపెట్టడంతో పాటు టైటిల్‌ నెగ్గిన జొకోవిచ్‌.. ఈసారి కూడా సేమ్‌ సీన్‌ రిపీట్‌ చేసేందుకు తహతహలాడుతున్నాడు.