Puja Tips: హిందూ సంస్కృతిలో ప్రతిరోజు ఉదయం, సాయంత్రం పూజ చేసి హారతి ఇచ్చే సంప్రదాయం త‌ర‌త‌రాలుగా కొన‌సాగుతోంది. పూజ సమయంలో తప్పనిసరిగా దీపం వెలిగించాలి. ఇంటి ప్రధాన ద్వారం ముందు, తులసి మొక్క ముందు ప్రతిరోజూ దీపం వెలిగిస్తారు. అదే సమయంలో పూజ చేస్తుండగా దీపం అకస్మాత్తుగా ఆరిపోయినట్లయితే, అది అప శకునంగా, అశుభంగా పరిగణిస్తుంటారు. పూజ చేసేట‌ప్పుడు దీపం ఆరిపోతే అది దేనిని సూచిస్తుంది? అసలు ఆరిపోవడం అనే పదం వినియోగించడమే అపచారం అని కొండెక్కిందని, ఘనమైందని అనాలంటారు. ఇంతకీ దీపం ఆగిపోతే ఏమవుతుంది...ఏం చేయాలి?
1. దేవునికి దీపం వెలిగించడంలో విశిష్టత ఏమిటి.?
దేవతారాధన, హవనం, పారాయణ లేదా ఏదైనా శుభ కార్యక్రమంలో దీపం వెలిగించడం శుభప్రదంగా పరిగణిస్తారు. దీపం వెలిగించడం వల్ల జీవితంలోని చీకట్లు తొలగిపోవడమే కాకుండా ఇంట్లో ఉన్న ప్రతికూల శక్తి కూడా తొలగిపోతుంది. శాస్త్రాల ప్రకారం, దీపం వెలిగించడం వల్ల జీవితంలోని కష్టాలు తొలగిపోతాయి. అలాగే దీపం వెలిగించడం వల్ల వాస్తు దోషాలు తొలగిపోతాయని వాస్తు శాస్త్రంలో పేర్కొన్నారు.
Also Read : భగవద్గీతను పూజించాలా - అనుసరించాలా!
2. దీపం అకస్మాత్తుగా ఆరిపోతే దాని అర్థం ఏమిటి?
పూజ సమయంలో దీపం ఆరిపోవడం సాధారణంగా అప శకునంగా పరిగణిస్తారు. పూజ సమయంలో దీపం ఆరిపోతే, అది దేవతలు మనపై అసంతృప్తితో ఉన్నారని సూచిస్తుంది. పూజ పూర్తికాలేదని, పూజ చేసినా పూర్తి ఫలం మీకు లభించదని అర్థం. అంతేకాదు, దేవుని ముందు మీరు కోరిన కోరిక నెరవేరదని అర్థం. మనిషి పవిత్రమైన మనస్సుతో భగవంతుడిని పూజించకపోయినా, దేవుని దీపం కొండెక్కిపోతుందంటారు. కానీ...అస్సలు ఇలాంటివి పట్టించుకోరాదు..దేవుడిపై భక్తి ప్రధానం అంటారు మరికొందరు పండితులు
3. దీపం అకస్మాత్తుగా ఆరిపోతే?
పూజ సమయంలో దీపం ఆరిపోవడానికి గాలి, వత్తిలో తగినంత నెయ్యి లేదా నూనె లేకపోవడం వంటి ఇతర కారణాలు ఉండవచ్చు. అలాంటి పరిస్థితిలో, పూజ సమయంలో మీరు వెలిగించిన దీపం ఆరిపోతే, భగవంతుడికి క్షమాపణ చెప్పి మళ్లీ దీపం వెలిగించండి. దీపంలో తగినంత నెయ్యి లేదా నూనె ఉండేలా చూసుకోవాలి.
4. అఖండ జ్యోతి వెలిగించేటప్పుడు వీటిని గుర్తుంచుకోండి
ఒక వ్యక్తి తన సంకల్పాన్ని నెరవేర్చుకోవడానికి అఖండ జ్యోతిని వెలిగిస్తే దానిని చాలా జాగ్రత్తగా చూసుకోవాలి. ఎందుకంటే అఖండ జ్యోతి కొండెక్కితే కోరిక తీరదు. అలా జరగకుండా ఉండాలంటే జ్యోతి నిరంత‌రంగా వెలిగేలా, దాని చుట్టూ ఒక గాజు పాత్ర ఉంచండి, దానిలో పుష్కలంగా నూనె లేదా నెయ్యి పోయండి. అలాగే అఖండ జ్యోతి పక్కన చిన్న దీపం వెలిగించండి. అఖండ జ్యోతి పెద్ద దీపం కొండెక్కిపోతే ఈ చిన్న దీపంతో మళ్లీ అఖండ జ్యోతిని వెలిగించవచ్చు.
Also Read : పూజ గదిలో బల్లి కనిపించడం దేనికి సంకేతమో తెలుసా!
మనం చేసే పూజలు భగవంతుడికి ఆమోదయోగ్యం కానప్పుడు, కొన్ని కష్టాలు వచ్చినప్పుడు, మనం ప్రార్థించిన కోరికలు తీరనప్పుడు, దేవుని వ‌ద్ద వెలిగించిన దీపం ఆరిపోతుందని చాలామంది విశ్వాసం. అయితే దీపం కొండెక్కడానికి రకరకాల కారణాలు ఉండొచ్చు...ఆ సమయంలో భగవంతుడికి నమస్కరించి తిరిగి వెలిగించండి కానీ ఏదో జరిగిపోతుందనే భయం అవసరం లేదంటారు పండితులు.
Disclaimer: ఇక్కడ అందించిన సమాచారం కేవలం మత విశ్వాసాల మీద ఆధారపడి సేకరించింది మాత్రమే. దీనికి సంబంధించిన శాస్త్రీయ ఆధారాలకు సంబంధించి ‘ఏబీపీ దేశం’ ఎలాంటి భాధ్యత తీసుకోదు. ఈ సమాచారాన్ని పరిగణనలోకి తీసుకునే ముందు పండితులను సంప్రదించి పూర్తి వివరాలు తెలుసుకోగలరు. ‘ఏబీపీ దేశం’, ‘ఏబీపీ నెట్‌వర్క్’ ఈ విషయాలను ధృవీకరించడం లేదని గమనించగలరు.