Spirituality: అతిరథ మహారథులు అంటారు కదా.. వాళ్లెవరో తెలుసా...

అతిరథ మహారథులంతా వచ్చారనే మాట వింటుంటాం. వాళ్లెవరు.. వ్యక్తులా, శక్తులా...అసలు అతి రథమహారథులు అనే మాట ఎప్పటి నుంచి మొదలైంది..

అతిరథ మహరథులు అనగానే ఎవరో గొప్పవాళ్లు వచ్చారనే అర్థం స్పురిస్తుంది. మహా మహా గొప్పోళ్లకి ఆ మాట వాడతారని తెలుసు కానీ ఇంతకీ అతిరథ మహారథులంటే సరైన అర్థం చాలామందికి తెలియదు. వాస్తవానికి ఈ పదాలు వ్యక్తుల పేర్లు కాదు...పురాణాల్లో  కొన్ని పాత్రల యుద్ధనైపుణ్యాన్ని, యుద్ధంలో పాల్గొనే యోధుల సామర్ధ్యాన్ని తెలుపుతాయి. వాళ్లవరో, వారి సామర్థ్యం ఏంటో తెలిపేందుకు  ఇందులో 5 స్థాయులున్నాయి. అవి..
1)రథి
2)అతిరథి
3)మహారథి
4)అతి మహారథి
5) మహామహారథి

రథి: ఏకకాలంలో 5,000 మందితో యుద్ధం చేయగలవారిని రథి అని అంటారు.  సోమదత్తుడు, సుదక్షిణ, శకుని, శిశుపాల, పాటు కౌరవుల్లో 96 మంది, శిఖండి, ఉత్తమౌజులు, ఉపపాండవులు వీరందరూ రథులు. 

అతిరథి : రథికి 12రెట్లు అంటే ఏకకాలంలో  60,000మందితో ఒకేసారి యుద్ధం చేయగలవారిని అతిరథి అని అంటారు. లవకుశులు, కృతవర్మ, శల్య, కృపాచార్య, భూరిశ్రవ, ద్రుపద, యుయుత్సు, విరాట, అకంపన, సాత్యకి, దృష్టద్యుమ్న, కుంతిభోజ, ఘటోత్కచ, ప్రహస్త, అంగద, దుర్యోధన, జయద్రథ, దుశ్శాసన, వికర్ణ, విరాట, యుధిష్ఠిర, నకుల, సహదేవ, ప్రద్యుమ్నులు వీరంతా అతిరథులు. ఏకకాలంలో 60వేల మందితో యుద్ధం చేయగల వీరులు.

మహారథి : అతిరథికి 12రెట్లు.. అంటే 7,20,000 మందితో ఒకేసారి యుద్ధం చేయగల వీరుడిని మహారథి అని అంటారు. రాముడు, కృష్ణుడు, లక్ష్మణుడు , అభిమన్యుడు, వాలి, అంగద, అశ్వత్థామ, అతికాయ, భీమ, కర్ణ, అర్జున, భీష్మ, ద్రోణ, కుంభకర్ణ, సుగ్రీవ, జాంబవంత, రావణ, భగదత్త, నరకాసుర, లక్ష్మణ, బలరామ, జరాసంధుడు తదితర వీరులంతా మహారథుల కోవలోకి వస్తారు. వీరిని మహారథులు అంటారు. 

అతిమహారథి : మహారథికి 12రెట్లు అంటే 86,40,000 మందితో ఒకేసారి యుద్ధం చేయగల వీరుడిని అతిమహారథుడు అని అంటారు. ఇంద్రజిత్తు, పరశురాముడు, ఆంజనేయుడు, వీరభద్రుడు, భైరవుడు వీరంతా అతి మహారథులు. వీరు ఏకకాలంలో  ఎనభై ఆరులక్షల నలభైవేల మందితో యుద్ధం చేయగలరు. సీతను విడిపించే సమయంలో జరిగిన రామరావణ యుద్ధంలో పాల్గొన్నది ఇద్దరే ఇద్దరు అతి మహారథులు..రావణుడి కొడుకు ఇంద్రజిత్తు –రామ భక్తుడు ఆంజనేయుడు.

మహామహారథి: అతిమహారథికి 24రెట్లు అంటే ఏకకాలంలో 20,73,60,000 మందితో ఏకకాలంలో యుద్ధం చేయగల వీరుడిని మహామహారథి అని అంటారు.  త్రిమూర్తులైన బ్రహ్మ, విష్ణు మహేశ్వరులు, దుర్గాదేవి, గణపతి , సుబ్రహ్మణ్య స్వామి వస్తారు.  వీరంతా..మహామహారథులు.. ఒకేసారి ఇరవై కోట్ల డెబ్భై మూడు లక్షల అరవై వేలమందితో యుద్ధం చేయగల నైపుణ్యం వీరి సొంతం. 

అతిరథమహారథులు అనే పదం వాడుక భాషలోకి వచ్చేసరికి ..ఎంతో గొప్పవాళ్లకి వినియోగిస్తుంటారు. అలా  ఈ పదానికి అర్థం చాలామందికి తెలియకపోయినా ఉపయోగించేవారి సంఖ్య మాత్రం ఎక్కువే....

Also Read: అప్పులు, అనారోగ్యం, శత్రుబాధలు తొలగించే సూర్యారాధన ...రథసప్తమి ప్రత్యేకత ఇదే..
ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి