Ayodhya Ram Mandir Rules: అయోధ్య రామ మందిరం చూసేందుకు వెళ్తున్నారా? ఈ రూల్స్ తప్పక పాటించాలి

Ayodhya Ram Mandir: రామజన్మ భూమి అయోధ్యలో రామ మందిర ప్రారంభోత్సవ వేడుకలో పాల్గొనే వారు తప్పక కొన్ని నియమాలు పాటించి తీరాలి. అవేమిటో చూడండి.

రాముడంటే మర్యాద పురుషోత్తముడు. రాజ ధర్మాన్ని, క్షత్రీయ ధర్మాన్ని, మానుష ధర్మాన్ని మానవ సమాజానికి ఆచరించి చూపిన ఆదర్శప్రాయడు. అందుకే, హిందువులు అంతగా ఆరాధిస్తారు. అయోధ్యలో రామ మందిరంలో ఆయన కొలువై ఉండగా చూడాలనేది ఎంతోమంది కల. ఎట్టకేలకు ఆ కల నెరవేరే రోజు వచ్చేస్తోంది. అది కనులారా చూసేందుకు ఎంతో మంది భక్తులు అయోధ్యకు బయల్దేరుతున్నారు. మీరు కూడా అక్కడికి వెళ్లాలి అనుకుంటున్నారా? అయితే, ముందుగా ఈ నియమ నిబంధనలు గురించి తెలుసుకోంటే.. ఎలాంటి ఇబ్బందులు లేకుండా శ్రీరామ్ లల్లా దర్శనం చేసుకోవచ్చు.

అయోధ్యలో అత్యంత ప్రతిష్టాత్మకంగా నిర్మించిన రామ మందిరం అయోధ్యలో జనవరి 22, 2024 న ప్రారంభించబోతున్నారు. రామభక్తులందరూ అత్యంత ఆసక్తిగా ఎదురుచూస్తున్న సందర్భం. అయోధ్యలో అణువణువున శ్రీరాముడుంటాడని నమ్మకం. అందుకే అయోధ్య ఎప్పుడూ చర్చలో ఉంటుంది. రాముడు పుట్టింది ఇక్కడే అయినప్పటికీ 500 సంవత్సరాలుగా రాముడికి ఇక్కడ చోటు దొరకలేదు. ఇన్నాళ్ల అజ్ఞాతం తర్వాత ఇప్పుడు తిరిగి రాముడు ఈ నేలమీద అడుగు పెడుతున్నాడు. అందుకే ఈ ఉత్సవం రామభక్తులకు అత్యంత ఉద్వేగ భరితం. ఆలయంలో జరిపే విగ్రహ ప్రాణప్రతిష్ట చాలా ప్రాధాన్యత కలిగి ఉంటుంది. దీన్ని చూసేందుకు భారీ సంఖ్యలో రామభక్తులు అయోధ్య చేరుకుంటున్నారు. ఏర్పాట్లు చాలా ఘనంగా జరుగుతున్నాయి.

అయోధ్యలో భక్తులు పాటించాల్సిన రూల్స్ ఇవే:

జనవరి 22న రామ మందిర ప్రారంభోత్సవానికి వెళ్లాలని అనుకుంటే కొన్ని జాగ్రత్తలు తప్పక పాటించాలి.

• ఆలయ ప్రాంగణంలోకి ఎలాంటి ఎలక్ట్రానిక్ పరికరాలను కూడా అనుమతించరు. కనుక వాటిని తీసుకుపోవద్దు.


• మొబైల్, ఎలక్ట్రానిక్ వాచి, ల్యాప్ ట్యాప్, కెమెరా వంటి వస్తువులేవీ తీసుకు వెళ్ల కూడదు. ఈ నిబంధనను ఉల్లంఘిస్తే ఇబ్బందుల్లో పడే ప్రమాదం ఉంది.


• తినుబండారాలు, పానీయాలు ఏవీ కూడా ఆలయ ప్రాంగణంలోకి అనుమతించరు.


• ఇంటి వంటకాలైనా, ఫాస్ట్ ఫూడ్ అయినా సరే ఎటువంటి తినుబండారాలను, పానీయాలకు ఆలయంలోకి అనుమతి లేదు.


• బూట్లూ, బెల్ట్ వంటి వస్తువులు ధరించి ఆలయంలోకి ప్రవేశం నిశిద్ధం. వీటిని ప్రవేశద్వారం వద్దే వదిలేసి వెళ్లాల్సి ఉంటుంది.


• చాలా మందికి ఆలయానికి వెళ్లే సమయంలో హారతి పళ్లేం తీసుకువెళ్లే ఆచారం ఉంటుంది. కానీ జనవరి 22న జరిగే కార్యక్రమానికి మాత్రం హారతి పళ్లెం తీసువెళ్లకూడదు. ఎందుకంటే ఎలాంటి పూజకు మీకు అనుమతి ఉండదు. కనుక అది తీసుకువెళ్లాల్సిన అవసరం లేదు.


• ఆహ్వాన పత్రిక ఉన్నవారికి మాత్రమే ఆలయంలోకి అనుమతి ఉంటుంది. ఆహ్వాన పత్రిక లేకుండా ఆలయ ప్రవేశం చేసే అనుమతి లేదు. కనుక పత్రిక లేకుండా ఆలయంలో ప్రవేశించే ప్రయత్నం చెయ్యకపోవడమే మంచిది.


• రామాలయ ప్రారంభోత్సవ వేడుకకు తప్పకుండా సంప్రదాయ దుస్తులు మాత్రమే ధరించాలి. అలాంటి వారికి మాత్రమే అనుమతి లభిస్తుంది. అయితే డ్రెస్ కోడ్ గురించి ప్రత్యేక నియమం లేదు. అయినప్పటికీ సంప్రదాయ దుస్తులు ధరించాలని నిర్వాహకులు విజ్ఞప్తి చేస్తున్నారు.


• అయోధ్య రామ మందిరాన్ని జనవరి 22న సందర్శించాలంటే చాలా కష్టం. వీఐపీల రాకపోకల వల్ల సామాన్యులకు దర్శన భాగ్యం అంత సులభం కాదు. కాబట్టి.. మరొక రోజును ఎంపిక చేసుకోవడం ఉత్తమం.