BRS Maharastra : తెలంగాణ రాష్ట్ర సమితిని భారత రాష్ట్ర సమితిగా పేరు మార్చిన తర్వాత కేసీఆర్ వేరే ఏ రాష్ట్రంలోనూ పర్యటించలేదు..ఒక్క మహారాష్ట్రలో తప్ప. పదే పదే మహారాష్ట్రకు వెళ్తున్నారు. నాగపూర్ లో ఆఫీసు కూడా ప్రారంభించారు. ఆ కార్యాలయం ప్రారంభోత్సవానికి తాను కూడా స్వయంగా వెళ్లారు. ఏపీలో ఆఫీసు ప్రారంభోత్సవానికి కనీసం పార్టీ ప్రతినిధిని కూడా పంపలేదు. కేసీఆర్ మహారాష్ట్రపై ఇంత గరి పెట్టడానికి కారణం ఏమిటి అన్నది మాత్రం సస్పెన్స్ గానే ఉంది.
తెలంగాణ కన్నా ఎక్కువగా మహారాష్ట్రకు ప్రయారిటీ ఇస్తున్నారా ?
కేసీఆర్ తెలంగాణలో రెండు రోజుల పాటు పాలనను పక్కన పెట్టి మహారాష్ట్ర పర్యటనకు వెళ్లారు. ఇటీవలి కాలంలో ఆయన దాదాపుగా ప్రతి పది రోజులకు ఓ సారి మహారాష్ట్ర పర్యటనకు వెళ్తున్నారు. అది కూడా పూర్తిగా మహారాష్ట్రలోని ఓ ప్రాంతానికే వెళ్తున్నారు. తెలంగాణతో సరిహద్దు ఉన్న ప్రాంతం.. విదర్భ ప్రాంతాలకు వెళ్తున్నారు. ఇక్కడ బలమైన పార్టీ నేషనలిస్ట్ కాంగ్రెస్ పార్టీ. అంటే శరద్ పవార్ పార్టీ. ఈ పార్టీని బలహీనం చేసి తన పార్టీని బలోపేతం చేసుకోవాలన్న లక్ష్యంతో కేసీఆర్ ఇలా పర్యటనలు .. రాజకీయాలు చేస్తున్నారు. బీఆర్ఎస్‌లో చేరేందుకు అత్యధికంగా వస్తున్న నేతలు కూడా ఎన్సీపీకి చెందినవారే. కేసీఆర్ మరే రాష్ట్రంలోనూ ఈ విధంగా రాజకీయాలపై దృష్టి పెట్టలేదు. కర్ణాటకలో కనీసం ప్రచారం చేయలేదు. రాష్ట్ర అధ్యక్షుల్ని ప్రకటించిన బీఆర్ఎస్, ఏపీల గురించి ఒక్క ఆలోచన చేయడం లేదు. కానీ మహారాష్ట్రపై మాత్రం తన ఎఫర్ట్ అంతా పెడుతున్నారు.
శరద్ పవార్ పార్టీని బలహీనం చేసి బీఆర్ఎస్‌ను బలోపేతం చేయడం టార్గెట్ గా పెట్టుకున్నారా ?
మహారాష్ట్రలో ప్రస్తుతం బీజేపీ, శివసేన ప్రభుత్వం ఉంది.ఈ శివసేన వర్జినల్ కాదు. చీలిక వర్గానికి అసలైన శివసేనగా గుర్తించడంతో శివసేన అయింది. వచ్చే ఎన్నికల్లో కాంగ్రెస్, ఉద్దవ్ శివసేన, ఎన్సీపీ కలిసి పోటీ చేయడం ఖాయం. అధికారం నిలబెట్టుకోవాలంటే ఇప్పుడు బీజేపీ ముందున్న టాస్క్ శివసేన, ఎన్సీపీలను బలహీనం చేయడం. శివసేన విషయంలో ఇప్పటికే చాలా వరకూ బీజేపీ సక్సెస్ అయింది. దాదాపుగా నేతలందర్నీ తిరుగుబాటు గూటికి చేర్చారు. ఎలా చూసినా వచ్చే ఎన్నికల్లో షిండే దగ్గర ఉన్న శివసేన అసలు గుర్తుకు.. థాక్రే వర్గం గుర్తుకు మధ్య క్లాష్ ఉంటుంది. ఇప్పుడు ఎన్సీపీని బలహీనం చేయాలని బీజేపీ అనుకుంది. గతంలో తమతో చేతులు కలపడానికి సిద్ధమైన అజిత్ పవార్ ను మొదట చేరదీశారు. కానీ అది వర్కవుట్ కాలేదు. అదే సమయంలో కేసీఆర్ ను రంగంలోకి దిగారు.
తెలంగాణలో కేసీఆర్ ఇబ్బంది పడతారా ?
కేసీఆర్ అంటే తెలంగాణ నేత. తాను తెలంగాణకు అంకితమన్నట్లుగా ఉద్యమాన్ని నడిపించారు కేసీఆర్. ఇప్పుడు తాను చేయాల్సినదంతా అయిపోయిందని తాను ఇక మహారాష్ట్ర వెళ్లి రాజకీయాలు చేస్తానన్నట్లుగా కేసీఆర్ తీరు ఉంది. తెలంగాణ కంటే మహారాష్ట్రపైనే ఎక్కువ దృష్టి పెట్టారని సహజంగానే ప్రజల్లో చర్చ జరుగుతోంది. తెలంగాణలో ఇబ్బందులు వస్తాయని తెలిసి కూడా కేసీఆర్ మహారాష్ట్రలో రాజకీయాల కోసం పరుగులు పెడుతున్నారు. ఆయన ఇలా చేయడం వెనుక బీజేపీ ఉందని ఎస్పీ ఆరోపిస్తోంది. ఇందులో ఎంత నిజం ఉందో తెలియదు కానీ.. జరుగుతున్న పరిణామాలు మాత్రం అలాగే ఉన్నాయని ఎక్కువ మంది నమ్ముతున్నారు.