Modi Govt Youth Rebellion: భారత రాజకీయాల్లో ఇప్పుడు ఏడాది అనే కాలపరిమితి చుట్టూ పెద్ద చర్చ నడుస్తోంది. లోక్సభలో విపక్ష నేత రాహుల్ గాంధీ ఇటీవల కాంగ్రెస్ సమావేశంలో చేసిన వ్యాఖ్యలు చర్చనీయాంశమవుతున్నాయి. ప్రస్తుత మోదీ ప్రభుత్వం ఏడాది కంటే ఎక్కువ కాలం మనుగడ సాగించలేదు అని ఆయన వేసిన జోస్యం కేవలం రాజకీయ విమర్శ మాత్రమేనా? లేక దీని వెనుక పక్కా వ్యూహం ఉందా? అన్నది ఇప్పుడు హాట్ టాపిక్. నిరుద్యోగం, పెరుగుతున్న ధరలు, ఆర్థిక లోటును అస్త్రంగా చేసుకుని ప్రభుత్వంపై రాహుల్ గాంధీ సంధిస్తున్న బాణాలు ఇండియా కూటమిలో కొత్త ఉత్సాహాన్ని నింపుతున్నాయి.
బీజేపీ టూల్ కిట్ ఆరోపణలు
రాహుల్ గాంధీ వ్యాఖ్యలపై కేంద్ర మంత్రులు తీవ్రస్థాయిలో మండిపడుతున్నారు. దేశంలో అస్థిరతను సృష్టించేందుకు విపక్షాలు అంతర్జాతీయ శక్తులతో కలిసి టూల్ కిట్ ను వాడుతున్నాయని బీజేపీ ఆరోపిస్తోంది. దేశ ఆర్థిక వ్యవస్థను బద్నాం చేయడం ద్వారా విదేశీ పెట్టుబడులు రాకుండా అడ్డుకోవాలని, తద్వారా కృత్రిమ ఆర్థిక మాంద్యాన్ని సృష్టించి ప్రభుత్వాన్ని కూల్చాలనేది రాహుల్ ప్లాన్ అని అధికార పక్షం వాదిస్తోంది. ఈ ' అస్థిరత రాజకీయాలు దేశ ప్రయోజనాలకు గండమని బీజేపీ హెచ్చరిస్తోంది.
కాక్రోజ్ జనతా పార్టీ - సోషల్ మీడియా సెన్సేషన్
ఈ గందరగోళం మధ్య సోషల్ మీడియాలో కాక్రోజ్ జనతా పార్టీ అనే పేరుతో వచ్చిన వ్యూహాత్మక సెటైరికల్ పేజీలు, ట్రెండ్స్ యువతను విపరీతంగా ఆకర్షిస్తున్నాయి. అభిజీత్ డిప్కే అనే యువ స్ట్రాటజిస్ట్ నేతృత్వంలో వచ్చిన ఈ ట్రెండ్.. ప్రస్తుతం ఉన్న రాజకీయ వ్యవస్థపై విరక్తి చెందిన యువతకు ఒక గొంతుకగా మారింది. రాహుల్ గాంధీ తన ప్రసంగాల్లో తరచూ ప్రస్తావిస్తున్న యువత తిరుగుబాటు కు ఇలాంటి సోషల్ మీడియా గ్రూపులే వెన్నుదన్నుగా నిలుస్తాయని భావిస్తున్నారు. ఈ డిజిటల్ ఉద్యమం ద్వారా యువతలో అసంతృప్తిని పెంచి, దాన్ని ఓట్ల రూపంలో మార్చడమే రాహుల్ లక్ష్యంగా కనిపిస్తోంది.
ఆర్థిక సంక్షోభం - విపక్షాల అస్త్రం
రాహుల్ గాంధీ కేవలం గాలిలో మాటలు చెప్పడం లేదు. డాలరుతో రూపాయి మారకం విలువ పడిపోవడం, ఆహార ద్రవ్యోల్బణం, ఇంధన కొరత వంటి అంశాలను ఆయన తన 'డెడ్ లైన్' వ్యాఖ్యలకు ప్రాతిపదికగా తీసుకుంటున్నారు. బడ్జెట్ 2026 యువతకు ఏమీ ఇవ్వలేదని, కేవలం అంకెల గారడీతో కాలక్షేపం చేస్తున్నారని ఆయన ఆరోపిస్తున్నారు. ఈ ఆర్థిక ఇబ్బందులే ప్రజలను వీధుల్లోకి తెస్తాయని, అప్పుడు ప్రభుత్వం దానంతట అదే పడిపోతుందని ఆయన అంచనా వేస్తున్నారు.
రాహుల్ కల నెరవేరుతుందా?
లోక్సభలో విపక్ష నేత హోదా వచ్చిన తర్వాత రాహుల్ గాంధీ శైలిలో స్పష్టమైన మార్పు వచ్చింది. గతంలో మాదిరిగా కేవలం వ్యక్తిగత విమర్శలు చేయకుండా, వ్యవస్థాగత లోపాలపై ఆయన దృష్టి సారిస్తున్నారు. అయితే, బీజేపీకి ఉన్న భారీ మెజారిటీ , పటిష్టమైన యంత్రాంగం ముందు రాహుల్ వ్యూహాలు ఎంతవరకు పారుతాయి అనేది సందేహమే. రాహుల్ గాంధీ కోరుకుంటున్న యువత తిరుగుబాటు క్షేత్రస్థాయిలో ఇంకా విస్ఫోటనం చెందలేదు. కానీ, కాక్రోజ్ జనతా పార్టీ వంటి ట్రెండ్స్ యువతలో నివురుగప్పిన నిప్పులా ఉన్న అసంతృప్తిని సూచిస్తున్నాయి. 2026 చివరి నాటికి దేశ రాజకీయ చిత్రం ఏ మలుపు తిరుగుతుందో చూడాలి.