Congress BRS Political War: ప్రజాస్వామ్య వ్యవస్థలో ఓటరే అత్యున్నతుడు. రాజ్యాంగం పౌరుడికి ప్రసాదించిన ఓటు హక్కు ద్వారా వ్యక్తం అయ్యే తీర్పే తుది నిర్ణయం. అయితే, ఇటీవల బిఆర్ఎస్ వర్కింగ్ ప్రెసిడెంట్ కేటీఆర్ ఓటర్ల తీర్పును, వారి విచక్షణను ప్రశ్నించేలా చేసిన వ్యాఖ్యలు తీవ్ర రాజకీయ చర్చకు దారితీశాయి. ప్రజలు సరిగ్గా ఆలోచించకుండా ఓటేశారు అనే భావన వచ్చేలా మాట్లాడుతున్నారు. నిజాన్ని అంగీకరించలేని ఆయన మానసిక స్థితిని ప్రతిబింబిస్తోందని కాంగ్రెస్ నేతలంటున్నారు. పదేళ్లపాటు తిరుగులేని అధికారంలో ఉండి, ఒక్కసారిగా ప్రతిపక్ష స్థానానికి పరిమితమవ్వడంతో వ్యక్తమవుతున్న తీవ్ర నైరాశ్యమే దీనికి ప్రధాన కారణమని కనిపిస్తోంది.
ప్రజల్ని నిందించడం కరెక్ట్ కాదు!
ప్రజాస్వామ్యంలో ఎన్నికల్లో గెలిచినా, ఓడిపోయినా ప్రజల తీర్పును శిరసావహించడమే బాధ్యతాయుతమైన నాయకత్వ లక్షణం. ప్రస్తుత ప్రభుత్వ పాలన వల్ల ప్రజలు తీవ్ర ఇబ్బందులు పడుతున్నారు అని విమర్శించడం ప్రతిపక్షంగా బిఆర్ఎస్ ప్రాథమిక హక్కు. కానీ, మేము లేకపోవడం మీరు చేసుకున్న తప్పు , అవగాహన లేక తీర్పు ఇచ్చారు అని అనడం ప్రజల విచక్షణా జ్ఞానాన్ని అవమానించడమే అవుతుంది. గత పదేళ్లలో తమ ప్రభుత్వం సాధించిన పురోగతిని ప్రజలు గుర్తించలేదనే బాధ కేటీఆర్లో ఉండవచ్చు, కానీ దాన్ని బహిరంగంగా ఓటర్ల తప్పుగా చిత్రీకరించడం పొలిటికల్ మెచ్యూరిటీ అనిపించుకోదు.
తామేం తప్పు చేయలేదన్నభావన కల్పించడానికేనా?
ఈ తరహా వ్యాఖ్యలు బిఆర్ఎస్ పార్టీలో అంతర్గతంగా జరగాల్సిన ఆత్మపరిశీలన దిశను తప్పుదోవ పట్టిస్తున్నాయి. 2023 అసెంబ్లీ ఎన్నికల్లో కాంగ్రెస్కు స్పష్టమైన మెజారిటీ దక్కడం వెనుక బిఆర్ఎస్ ప్రభుత్వంలో పెరిగిన వ్యతిరేకత, క్షేత్రస్థాయి నాయకుల అహంకారం, నిరుద్యోగ సమస్యలు , సమన్వయ లోపం వంటి ప్రధాన కారణాలు ఉన్నాయి. ఈ వాస్తవాలను పక్కనబెట్టి, ఓటర్ల నిర్ణయాన్నే తప్పుబట్టడం వల్ల పార్టీకి చెందిన క్షేత్రస్థాయి కార్యకర్తలకు తమ వైపు ఎలాంటి తప్పు లేదు అనే భ్రమను కలిగించేందుకే ప్రయత్నిస్తున్నారని భావిస్తున్నారు.
ఓడిన ఎవరూ ప్రజల్ని నిందించరు!
ఇందిరా గాంధీ నుంచి పశ్చిమ బెంగాల్ లేదా తమిళనాడులోని దిగ్గజ నేతల వరకు అందరూ ఓటమిని చవిచూసినవారే. అయితే, మళ్లీ అధికారంలోకి వచ్చిన నాయకులు ఎవరూ ఓటర్లను నిందించలేదు; బదులుగా ప్రజల నాడిని అర్థం చేసుకుని తమ వ్యూహాలను మార్చుకున్నారు. కేటీఆర్ లాంటి విద్యావంతుడు, ఆధునిక రాజకీయ నాయకుడి నుంచి ఓటర్ల తీర్పు పట్ల మరింత నిష్పాక్షికమైన గౌరవం ప్రజలు ఆశిస్తారు. విమర్శలను స్వీకరించకుండా ఓటర్ల తీర్పునే ప్రశ్నించడం వల్ల తటస్థ ఓటర్లలో పార్టీ పట్ల మరింత వ్యతిరేకత పెరిగే ప్రమాదం ఉందన్నభావన వ్యక్తమవుతోంది.
మళ్లీ ప్రజల విశ్వాసాన్ని పొందాలి!
ప్రస్తుతం తెలంగాణలో బీఆర్ఎస్ తన ఉనికిని చాటుకోవడానికి, అధికార కాంగ్రెస్ వైఫల్యాలను ఎండగట్టడానికి అనేక ప్రజా సమస్యలు అందుబాటులో ఉన్నాయి. హైడ్రా చర్యలు, రైతు భరోసా, రుణమాఫీ అమలు, శాంతిభద్రతల వంటి అంశాలపై పదునైన విమర్శలు గుప్పిస్తూ ప్రభుత్వాన్ని నిలదీస్తే ప్రజల్లో ఆదరణ లభిస్తుంది. అలా కాకుండా, గతాన్ని తలచుకుంటూ "ప్రజలు పొరపాటు చేశారు" అని మాట్లాడటం కేవలం నైరాశ్యాన్నే ప్రతిబింబిస్తుంది తప్ప ప్రజాదరణను తిరిగి తెచ్చిపెట్టదు. ప్రజాస్వామ్యంలో ప్రజల తీర్పు ఎల్లప్పుడూ అంతిమమైనది , గౌరవించదగినది. కేటీఆర్ తన ప్రసంగాల్లో 'ఓటర్ల తీర్పుపై అసంతృప్తి' వ్యక్తం చేయడం కంటే, ప్రజల విశ్వాసాన్ని తిరిగి ఎలా పొందాలో అనే స్పష్టమైన ప్రణాళికను ప్రదర్శించాల్సి ఉంది. స్వయంగా ఆత్మపరిశీలన చేసుకుని, ప్రజల మధ్యకు వెళ్తేనే బిఆర్ఎస్కు రాజకీయంగా పూర్వవైభవం దక్కుతుంది కానీ, ఓటర్ల విచక్షణను ప్రశ్నించడం వల్ల ఆ పార్టీ పొలిటికల్ గ్రాఫ్ మరింత దిగజారే ప్రమాదం ఉంది.